Navina ad «Słavianki» — pinžak, uładalniku jakoha harantujecca «abarona ad elektramahitnaha vypramieńvańnia».
Sioleta ŭ Biełarusi ciažka znajści školnuju formu ajčynnaj vytvorčaści z naturalnych vałoknaŭ.
55% poliesteru i 45% viskozy — jašče ŭ najlepšym vypadku. Čaściej traplajucca stroi, vyrablenyja całkam z paliesteru. I heta dla školnika!
Reparciorka «NN» naviedała ŭniviermah «Biełaruś». Dadatkovyja siekcyi dziciačaj vopratki arhanizavanyja adrazu na ŭvachodzie. Pieršym traplajecca pad ruku bliskučy pinžak dla chłopčykaŭ fabryki «Kamintern». Skład: 63% poliester, 34% viskozy i 3% spandeks. Pobač visić davoli padobny stroj ad «Baranavickaj šviejnaj fabryki»: 65% paliesteru i 35% viskozy.
«Abarona ad elektramahitnaha vypramieńvańnia»
A voś navina ad «Słavianki» — pinžak, uładalniku jakoha harantujecca «abarona ad elektramahitnaha vypramieńvańnia». Ci praściej — ad mabilnaha telefona. Jak paznačana na etykietcy, materyjał prajšoŭ vyprabavańnie ŭ Instytucie prykładnoj fiziki Akademii navuk! I što za cudadziejnaja vysokatechnałahičnaja materyja? Cha! 63% poliester, 34% viskozy i 3% spandeks.
«Z bavoŭny dakładna ničoha nie znojdziecie», — kaža Natalla Šakun, pradavačka.
«Ich zaraz prosta nie vyrablajuć, — dadaje jaje kaleha. — Darahija, mabyć. Časam traplajucca paŭšarścianyja stroi, ale ich chutka raźbirajuć».
Tym časam adna babula raić mnie pašukać bavaŭnianyja pinžaki ad fabryki «Marusia».
U pošukach «Marusi» padymajusia na treci pavierch u siekcyju dziciačaha adzieńnia. Znachodžu modny, nie padobny da inšych pinžačok hetaj marki. Nu voś, dziakuj bohu, — 97% bavoŭna, 3% ełastan. Ale cana amal u try razy vyšejšaja za «sintetyčny» anałah — 249 900 rubloŭ (pobač visić pinžak inšaha biełaruskaha vytvorcy ŭsiaho za 87 890 rubloŭ).
Sintetyčnaje — niezdarovaje
Jak upłyvaje sintetyčnaja vopratka na zdaroŭje i samaadčuvańnie dziaciej? Jakaja dola poliesteru i viskozy dapuščalnaja?
Daktary adnaznačna vykazvajucca nakont «nienaturalnych» tkaninaŭ. Sintetyka pravakuje nazapašvańnie statyčnaj elektryčnaści i pryvodzić da dyskamfortu, upłyvaje na centralnuju nervoruju sistemu, a pylinki, brud, mikraarhanizmy «prylipajuć» da vopratki.
Da taho ž, sintetyka parušaje i pavietrapranikalnaść tkaniny, u vyniku čaho cieła «nie dychaje», dzicia pacieje, pieraachałodžvajecca i chvareje.
U Jeŭropie dobryja firmy šyjuć dla dziaciej adzieńnie z bavoŭny i voŭny.
«Dla ŭračystych vypadkaŭ»
Pa kamientar my źviarnulisia da zahadčycy adździełam hihijeny dziaciej i padletkaŭ Respublikanskaha centra hihijeny, epidemijałohii i hramadskaha zdaroŭja Ały Małachavaj.
«Kab takija pakaźniki, jak pavietrapranikalnaść i hihiraskapičnaść adpaviadali normie, dola sintetyčnych vałoknaŭ u strojach nie pavinna pieravyšać 67%. Dla kašulaŭ i błuzak — da 40%. Kali ž skład tkaniny — čystaja sintetyka, to paznačajecca, što heta stroj «dla ŭračystych vypadkaŭ», — kaža Małachava.
Takim čynam, biełaruskija vytvorcy nie parušajuć zakanadaŭstva, vyrablajučy adzieńnie z vysokaj dolaŭ utrymańnia sintetyki. U inšym vypadku ich pradukcyja dla bolšaści nasielnictva budzie nie pa kišeni.
Ciapier čytajuć
«Ja dumaŭ, mianie nie moža ničoha ździvić». Na fudkorcie ŭ minskim HC zrabili płatnyja stały3
Kamientary