Pamiatajecie historyju amierykanki, jakuju trymali ŭ komie paśla śmierci, kab nie spyniać ciažarnaść? Prajšoŭ hod: što ciapier ź dziciem
Historyju Adryjany Śmit adny ličać adnym z samych nieetyčnych miedycynskich ekśpierymientaŭ u sučasnaj historyi, a inšyja — dokazam navukova-techničnaha prahresu. Jaje synu niadaŭna spoŭniŭsia hod — i babula pakazała fota Čensa.
Nahadajem: Adryjanie Śmit było 30 hadoŭ, jana žyła ŭ Atłancie (štat Džordžyja, ZŠA) i pracavała miedsiastroj, mieła 7‑hadovaha syna. Letaś u studzieni maładaja žančyna (jana tady była na 9 tydni ciažarnaści) pakutavała ad hałaŭnoha bolu. Adryjana źviarnułasia pa miedycynskuju dapamohu — u balnicy joj pryznačyli leki i adpuścili damoŭ.
Ale nastupnym rankam jaje partnior pračnuŭsia ad taho, što Adryjana zadychajecca. Jon vyklikaŭ chutkuju dapamohu, ale miedyki nie zmahli vyratavać žančynu — tromb. Daktary ŭ balnicy kanstatavali śmierć mozha.
I tut uźnikła vialikaja dylema nakont taho, što rabić dalej. Bo ŭnutry cieła Adryjany zastavaŭsia embryjon. A ŭ štacie Džordžyja dziejničajuć strohija antyabortnyja zakony.
Maci Adryjany, Ejprył Ńjukirk, raspaviała ŚMI, što siamji nie dazvolili pryniać rašeńnie. Rodnyja ličyli, što bolš pravilnym budzie adklučyć cieła ad usich aparataŭ. Baćki chacieli spakojna pachavać svaju dačku.
Miedyki ž vyrašyli štučna padtrymlivać pracesy ŭ arhaniźmie, kab nie spyniać ciažarnaść. Heta vyklikała šmat abureńnia pa ŭsim śviecie: ludzi kazali, što nieetyčna vykarystoŭvać cieła pamierłaj žančyny jak inkubatar.
Letaś kiejs Adryjany staŭ hałoŭnaj temaj abmierkavańnia etyki ŭ miedycynskaj supolnaści.
Bolš za toje, za miedycynskija pasłuhi pavinna była płacić siamja Śmit. Byŭ abvieščany zbor, jaki praciahvajecca i siońnia — sabrana bolš za 620 tysiač dalaraŭ (paznačana, što nieabchodna 660 tysiač).
Miedyki płanavali, što zrobiać kiesarava ŭ žniŭni, ale daciahnuć da takoha terminu nie atrymałasia. Rabić terminovuju apieracyju pryjšłosia 13 červienia 2025 hoda. Maleńkamu chłopčyku (jon važyŭ kala 800 hram) dali imia Čens («Šaniec»).
Jašče praź niekalki dzion, 19 červienia, žančynu narešcie adklučyli ad usich aparataŭ.
Aficyjna paviedamlałasia, što žyćciu niemaŭlaci ničoha nie pahražaje. Ale nasamreč situacyja była davoli składanaja. Trapić dadomu Čens zmoh tolki sioleta ŭ lutym — navat tady jon jašče atrymlivaŭ kisłarod praź śpiecyjalnuju trubku.
U hadavinu trahiedyi siamja Adryjany zamoviła 10 biłbordaŭ ź jaje fota i podpisam: «Pravasudździe dla Adryjany Śmit», kab nahadać pra trahičnuju historyju i damahčysia źmien u zakonach Džordžyi.
Babula Čensa pieryjadyčna publikuje jaho zdymki ŭ kamientarach da dabračynnaha zboru. Dniami jana padzialiłasia fota ŭnuka, jakomu spoŭniŭsia hod. Ejprył napisała, što vielmi lubić hetaha małyša. I pachvaliłasia, što ŭ taho ŭžo jość dva zubiki.
Kamientary