Tramp zajaviŭ, što hatovy znoŭ bambić Iran, kali damovicca z Tehieranam nie ŭdasca

Prezident ZŠA Donald Tramp zajaviŭ u aŭtorak, što Złučanym Štatam, mahčyma, pryjdziecca znoŭ nanieści ŭdar pa Iranie i što jon amal pryniaŭ rašeńnie ab naniasieńni ŭdaru, ale potym adkłaŭ jaho, piša Bi-bi-si.

Tramp vystupiŭ pierad žurnalistami ŭ Biełym domie na nastupny dzień paśla svajoj zajavy ab tym, što jon prypyniŭ zapłanavanaje adnaŭleńnie ŭdaraŭ u suviazi z novaj mirnaj prapanovaj Tehierana.

«Ja byŭ za hadzinu ad pryniaćcia rašeńnia ab tym, kab pačać siońnia», — skazaŭ Tramp.

Jon taksama zajaviŭ, što iranskija lidary prosiać zaklučyć ździełku, ale novaja ataka ZŠA adbudziecca ŭ bližejšyja dni, kali pahadnieńnie nie budzie dasiahnuta: «Nu, ja maju na ŭvazie, ja kažu pra dva ci try dni, moža być, u piatnicu, subotu, niadzielu, niešta ŭ hetym rodzie, moža być, u pačatku nastupnaha tydnia, abmiežavany pramiežak času, tamu što my nie možam dazvolić im atrymać novuju jadziernuju zbroju».

«My ličym, što nam udałosia dasiahnuć značnaha prahresu. My miarkujem, što irancy zacikaŭlenyja ŭ zaklučeńni pahadnieńnia», — zajaviŭ Vens žurnalistam na bryfinhu ŭ Biełym domie.

Vens paviedamiŭ, što tolki što pahavaryŭ z Trampam, jaki padkreśliŭ, što hałoŭnaja zadača dla ZŠA zaklučajecca ŭ tym, kab Iran nie zmoh atrymać jadziernuju zbroju. Pavodle jaho słoŭ, kali heta adbudziecca, krainy Piersidskaha zaliva taksama zachočuć zavieści jadziernuju zbroju, a za imi rušać uśled i inšyja.

«My chočam, kab kolkaść krain, jakija vałodajuć jadziernaj zbrojaj, zastavałasia nievialikaj, i mienavita tamu Iran nie moža mieć jadziernuju zbroju», — skazaŭ jon.

Na pytańnie ab tym, ci moža Rasija atrymać u svajo rasparadžeńnie iranski ŭzbahačany ŭran, Vens adkazaŭ: «U ciapierašni čas heta nie ŭvachodzić u płany ŭrada ZŠA. Iranski bok hetaje pytańnie nie padymaŭ».

Raniej u aŭtorak iranskija dziaržaŭnyja ŚMI paviedamili, što apošniaja mirnaja prapanova Tehierana praduhledžvaje spynieńnie bajavych dziejańniaŭ na ŭsich frantach, uklučajučy Livan, vyvad amierykanskich vojskaŭ z rajonaŭ, jakija miažujuć ź Iranam, a taksama vypłatu kampiensacyi za razbureńni, naniesienyja amierykana-izrailskaj vajnoj.

Namieśnik ministra zamiežnych spraŭ Kaziem Harybabadzi zajaviŭ, što Tehieran taksama damahajecca źniaćcia sankcyj, razmarožvańnia zamarožanych srodkaŭ i spynieńnia marskoj błakady krainy z boku ZŠA, paviedamlaje ahienctva IRNA.

Prapanavanyja Tehieranam umovy zaviaršeńnia kanfliktu praktyčna nie źmianilisia ŭ paraŭnańni z papiaredniaj prapanovaj Irana, jakuju Tramp na minułym tydni adchiliŭ jak «śmiećcie».

• 1
• 0
• 0
• 0
• 0
• 0
• 0
• 0