Raniej Pucin padpisaŭ anałahičny ŭkaz, jaki spraščaŭ atrymańnie rasijskaha hramadzianstva dla žycharoŭ Abchazii i Paŭdniovaj Asiecii.
Pucin padpisaŭ ukaz ab razdačy pašpartoŭ žycharam Prydniastroŭja. U dakumiencie, apublikavanym na aficyjnym partale pravavoj infarmacyi, paznačana, što jon pryniaty «ŭ metach abarony pravoŭ i svabod čałavieka i hramadzianina» z aporaj na «ahulnapryznanyja pryncypy i normy mižnarodnaha prava», piša Moscow Times.
Zhodna z ukazam, prava na sproščanaje atrymańnie rasijskaha pašparta (biez vykanańnia šerahu standartnych patrabavańniaŭ) atrymlivajuć zamiežnyja hramadzianie i asoby biez hramadzianstva, starejšyja za 18 hadoŭ, jakija pastajanna pražyvajuć u Prydniastroŭi na dzień ustupleńnia dakumienta ŭ siłu. Taksama prapisany paradak pryjomu ŭ hramadzianstva niepaŭnaletnich i niedziejazdolnych žycharoŭ rehijona. Zajavy na atrymańnie pašparta RF treba budzie padavać u rasijskija dyppradstaŭnictvy abo konsulskija ŭstanovy pa zaćvierdžanych formach.
Raniej, viasnoj 2025 hoda, Pucin padpisaŭ anałahičny ŭkaz, jaki spraščaŭ atrymańnie rasijskaha hramadzianstva dla žycharoŭ Abchazii i Paŭdniovaj Asiecii. U lipieni minułaha hoda Pucin taksama zaćvierdziŭ afarmleńnie pašpartoŭ RF u hetych rehijonach da žniŭnia 2028 hoda.
Na hetym fonie 13 maja Dziaržduma adnahałosna pryniała ŭ druhim i trecim čytańniach zakon, jaki dazvalaje Pucinu pryciahvać armiju dla «abarony hramadzian RF» u vypadku ich aryštu, utrymańnia, kryminalnaha abo inšaha pieraśledu za miažoj — u pryvatnaści, sudami, jakija Rasija nie pryznaje. U tłumačalnaj zapiscy padkreślivajecca, što dakumient nakiravany na «ŭzmacnieńnie abarony rasijskich hramadzian ad niepravamiernych dziejańniaŭ niedružalubnych zamiežnych dziaržaŭ».
Prydniastroŭje (Prydniastroŭskaja Małdoŭskaja Respublika) — heta niepryznanaje terytaryjalnaje ŭtvareńnie, raźmieščanaje ŭ vuzkaj pałasie pamiž rakoj Dniestr i miažoj z Ukrainaj. Farmalna jana źjaŭlajecca častkaj Małdovy, ale paśla ŭzbrojenaha kanfliktu z Kišyniovam u pačatku 1990‑ch faktyčna isnuje jak asobnaje ŭtvareńnie. Nasielnictva — kala 350 tysiač čałaviek, pieravažna ruskamoŭnyja. Prydniastroŭje nie pryznana nivodnaj dziaržavaj — členam AAN, a na jaho terytoryi z 1992 hoda znachodziacca rasijskija vojski. Rehijon mocna zaležyć ad Rasii ŭ ekanamičnym i palityčnym płanie i zastajecca adnym z «zamarožanych» kanfliktaŭ na postsavieckaj prastory.
Kamientary