U francuzskaj Hvijanie demantavali startavuju placoŭku dla zapusku rasijskich rakiet
U francuzskaj Hvijanie demantavali startavuju placoŭku, jakaja raniej vykarystoŭvałasia dla zapusku rasijskich rakiet «Sajuz». Jeŭrapiejskaje kaśmičnaje ahienctva likvidavała asnoŭnyja elemienty kompleksu, u tym liku 52‑mietrovuju absłuhovuju viežu, jakuju źniščyli vybucham. Da hetaha byli razrezanyja klučavyja kanstrukcyi puskavoj ustanoŭki — apory, što trymali rakietu pierad startam, i dapamožnyja mačty, paviedamlaje The Moscow Times.
Astatniuju infrastrukturu, naprykład techničnyja budynki, čyhunku i sistemy zachoŭvańnia paliva, płanujuć pieradać francuzskaj kampanii MaiaSpace. Jana budzie vykarystoŭvać hetyja abjekty dla zapusku novaj rakiety, pieršyja starty jakoj čakajucca ŭ 2027 hodzie.
Supracoŭnictva pamiž Jeŭrapiejskim kaśmičnym ahienctvam i «Raskosmasam», jakoje doŭžyłasia kala 15 hadoŭ, spyniłasia paśla pačatku vajny Rasii suprać Ukrainy. Za hety čas z kasmadroma Kuru ŭ francuzskaj Hvijanie praviali 26 paśpiachovych zapuskaŭ «Sajuzaŭ». Paśla ŭviadzieńnia sankcyj suprać rasijskaj kaśmičnaj haliny Rasija spyniła ŭdzieł u prahramie i adklikała svaich śpiecyjalistaŭ.
Ciapier ža były rasijski startavy kompleks pierabudoŭvajuć pad novyja jeŭrapiejskija prajekty, a supracoŭnictva z Rasijaj u hetaj śfiery faktyčna zavieršana.
Novaja rakieta Maia, jakuju raspracoŭvaje MaiaSpace, budzie dvuchstupiennaj. Płanujecca, što jana zmoža vyvodzić na arbitu karysnuju nahruzku roznaj vahi ŭ zaležnaści ad kanfihuracyi — adnarazovaj abo častkova šmatrazovaj.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna6
Kamientary