Starejšaha syna zasnavalnika suśvietna viadomaha brenda Mango zatrymali pa padazreńni ŭ zabojstvie baćki-miljardera
U Ispanii palicyja aryštavała 45‑hadovaha Džonatana Andzika, syna zasnavalnika znakamitaj sietki kram adzieńnia Mango Isaka Andzika. Mužčynu padazrajuć u naŭmysnym zabojstvie svajho baćki, bahaćcie jakoha, pavodle źviestak Forbes, na momant śmierci aceńvałasia na 4,5 miljarda dalaraŭ.
Katałonskaja palicyja ŭ aŭtorak ranicaj praviała zatrymańnie 45‑hadovaha Džonatana Andzika ŭ jaho ŭłasnym domie. Hety krok staŭ vynikam praciahłaha rasśledavańnia hibieli jaho baćki, 71‑hadovaha zasnavalnika modnaj impieryi Mango Isaka Andzika, jaki sarvaŭsia sa skały ŭ harach Mansierat 14 śniežnia 2024 hoda.
Džonatana dastavili ŭ sud horada Martarel (pravincyja Barsiełona) dla dačy pakazańniaŭ.
Siamja Andzik užo vypuściła zajavu, adznačyŭšy, što rasśledavańnie znachodzicca pad hryfam nierazhałošańnia, tamu jany nie mohuć paviedamić detali, ale harantujuć «maksimalnaje supracoŭnictva z pravasudździem».
Jak stała viadoma ispanskim ŚMI, palicyja ličyła Džonatana padazravanym jak minimum z kastryčnika minułaha hoda. Padstavaj dla hetaha stali supiarečnaści ŭ pakazańniach, jakija starejšy syn davaŭ u jakaści śviedki (u dzień trahiedyi jon byŭ adzinym, chto supravadžaŭ baćku ŭ pachodzie).
Paśla hetaha detektyvy sustreli Džonatana na vychadzie z ofisa Mango i paprasili jaho mabilny telefon, jaki toj addaŭ dobraachvotna. Analiz pryłady pravodziŭsia niekalki miesiacaŭ z metaj vyjavić datyčnaść da złačynstva.
Akramia taho, śledstva vyjaviła važny fakt: za niekalki dzion da trahiedyi Džonatan tajemna pryjazdžaŭ mienavita na toje miesca ŭ harach, dzie paśla zahinuŭ jaho baćka. Abarona śćviardžaje, što syn prosta «rychtavaŭ maršrut dla budučaj prahułki».
Śledčyja taksama adnavili karcinu składanych adnosin unutry siamji miljardera.
U 2014 hodzie Isak Andzik pieradaŭ kiravańnie kampanijaj starejšamu synu, adnak užo praz hod byŭ vymušany terminova viarnucca, kab sabrać novuju kamandu i vyratavać brend ad krachu. Hetaja niaŭdałaja pieradača ŭłady, pavodle źviestak palicyi, surjozna sapsavała adnosiny pamiž baćkam i synam.
Paśla śmierci biznesmiena — najbahaciejšaha čałavieka Katałonii z bahaćciem 4,5 młrd jeŭra — pamiž svajakami pačalisia vostryja sprečki. Pavodle apošniaha tastamientu ad lipienia 2023 hoda, majomaść pavinna była padzialicca paroŭnu pamiž tryma dziećmi, a kachanaj kabiecie Isaka zastavałasia 5 miljonaŭ jeŭra. Žančyna paličyła hetuju sumu źnievažalnaj i zapatrabavała 70 miljonaŭ.
Paśla praciahłych i ciažkich pieramoŭ dzieciam udałosia dasiahnuć ź joj papiaredniaha pahadnieńnia na sumu kala 30 miljonaŭ jeŭra.
Natalla Kalehava raskazała pra dapamohu biełaruskim uciekačam, svaju siamju, staŭleńnie da Cichanoŭskaj. I patłumačyła, chto takija «babry» i «zajcy»34
Kamientary