Siłaviki zavitvajuć da biełarusaŭ, jakich užo nie mohuć pryciahnuć pa kryminałcy za ŭdzieł u maršach, z maski-šou — dla prafiłaktyki
Pra novuju praktyku pomsty za ŭdzieł u pratestach 2020‑ha «Našaj Nivie» paviedamili adrazu ź niekalkich krynic.
Siłaviki brutalna ŭvarvalisia ŭ niekalki kvater u Mahilovie, ale paśla zapužvańnia i prafiłaktyčnaj razmovy zatrymanych adpuścili dadomu, bo minuŭ termin daŭnaści pryciahnieńnia da kryminalnaj adkaznaści pa pratesnym artykule 342 KK (pa im zvyčajna sudzili za ŭdzieł u maršach).
Vyjaznaja akcyja zapužvańnia vyhladała tak. Supracoŭniki HUBAZiKa, niekalki čałaviek, prychodzili kala 7 ranicy. Kali čałaviek adčyniaŭ dźviery paśla hrukatu, jaho kłali tvaram u padłohu, ruki załamali. Doma pieratrasali i raskidali rečy (nibyta bolš dla ptušački, čym z metaj niešta adšukać).
Paśla čałavieka zabirali ŭ miascovaje adździaleńnie na prafiłaktyčnuju razmovu. Kazali pra adkaznaść za lubuju pratesnuju dziejnaść i toje, jak adsočvajuć «ekstremistaŭ». Davali taksama padpisać papierku, što ludzi ŭsio pasłuchali i zrazumieli ryzyku kryminalnaj adkaznaści za novyja fakty pratestu.
Da ludziej prychodzili za maršy 2020 hoda. Siłaviki tłumačyli, što heta «kab nie rassłablalisia». Na sutki nie zabirali.
Nieviadoma, heta praktyka prymianiecca tolki ŭ Mahilovie abo ŭ inšych rehijonach taksama.
U apošnija hady za maršy, kali pa hetym artykule jašče dziejničaŭ termin daŭnaści, zvyčajna sudy davali chatniuju chimiju. Sa žniŭnia 2025-ha piacihadovy termin pryciahnieńnia da kryminalnaj adkaznaści staŭ skančvacca (dla kožnaj akcyi pratestu svaja data ŭ zaležnaści ad taho, kali jana prajšła). Tych, kaho na toj momant zatrymali, ale nie paśpieli asudzić, abo trymali ŭ SIZA da suda i adpuskali, abo pieravodzili z kryminałki ŭ administracyjnuju spravu.
Kali padobnaje zdaryłasia z vami ci vašymi znajomymi ŭ inšym horadzie Biełarusi, napišycie «Našaj Nivie» na mejł [email protected] albo ŭ telehram redaktaru @nn_editor. Taksama možacie źviazacca z žurnalistami redakcyi, jakich viedajecie asabista.
Ciapier čytajuć
«Zaprasiŭ mianie na spatkańnie i pryjechaŭ na jaho z pakietam pamidoraŭ zamiest kvietak». Što ŭspaminajuć pra Jana Pamiedora Reuckaha, admina šmattysiačnaj supołki biełarusaŭ Polščy55
Kamientary