Što robiać ź biełarusami, jakich aryštavali, ale nie paśpiavajuć asudzić za pratesty. Jość dva šlachi
Abodva nie nadta pryjemnyja, ale straty ad ich usio ž minimalnyja — adnosna taho, jakoje pakarańnie prymianiałasia raniej.
Na dvare ŭžo 24 žniŭnia 2025 hoda, a značyć, užo skončyŭsia piacihadovy termin pryciahnieńnia da kryminalnaj adkaznaści za ŭdzieł u maršach 16 i 23 žniŭnia 2020. Nieŭzabavie stanie jurydyčna niemahčyma pakarać za marš 30 žniŭnia, paśla 6 vieraśnia i hetak dalej.
Što ž u takoj situacyi robiać ź biełarusami, jakich aryštavali za ŭdzieł u pratestach, adpravili ŭ SIZA, ale jašče nie paśpieli asudzić?
«Naša Niva» daviedałasia pra dva asnoŭnyja šlachi, ź jakimi sutykajucca aryštanty. Adznačym, što samastojna vybirać pamiž hetymi šlachami amal niemahčyma — rašeńnie prymaje śledčy.
1. Siadzieć da suda — i tady vychodzić na svabodu
U takoj situacyi ludziej trymajuć u SIZA da vyniasieńnia prysudu — navat kali termin užo skončyŭsia. Naprykład, čałavieka sudziać za ŭdzieł u maršy 16 žniŭnia 2020 hoda, a sud moža pryznačany na ŭmoŭnaje 1 vieraśnia 2025 hoda. 16 žniŭnia 2025 hoda demanstranta nie adpuskajuć, trymajuć da suda.
Adnak usie padobnyja vypadki, pra jakija stała viadoma «Našaj Nivie», zakančvalisia adnolkava. Sud pryznavaŭ čałavieka vinavatym, adnak kanstatavaŭ, što pakarańnie nie moža być pryznačanaje praz terminy daŭniny, paśla čaho pastanaŭlaŭ vyzvalić z-pad varty.
Ludzi, jakija prajšli takim šlacham, paśla buduć usio adno ŭklučanyja ŭ milicejski śpis «ekstremistaŭ».
2. Pierachodzić z kryminałki na administratyŭku
Niekatorym ludziam śledčyja prapanujuć prymianić artykuł 86 Kryminalkaha kodeksa — vyzvaleńnie ad kryminalnaj adkaznaści z pryciahnieńniem da administracyjnaj adkaznaści.
Pakolki łukašenkaŭcy ličać udzieł u maršach «mienš ciažkim złačynstvam», to zakanadaŭstva pakidaje takuju mahčymaść. Demanstrant pavinien pryznać vinu i niejkim čynam zahładzić naniesienuju «škodu» — i tady moža atrymać nie kryminalny, a administratyŭny pieraśled.
Jamu pryznačajuć štraf (farmalna moža być ad 5 da 30 bazavych, ale va ŭsich viadomych nam vypadkach pryznačalisia maksimalnyja 30 bazavych) — i adpuskajuć ź SIZA dadomu.
Tearetyčna možna i admovicca, ale sensu niama — tady prosta daviadziecca čakać suda ŭ SIZA.
Ci ŭklučajuć u śpis ekstremistaŭ ludziej, kamu dazvolili prajści pa hetym šlachu, pakul nieviadoma.
«Naša Niva» — bastyjon biełaruščyny
PADTRYMAĆCiapier čytajuć
Biełarus nabyŭ kvateru ŭ Ispanii, ale jaje zaniali akupasy. Ciapier jon nie moža jaje viarnuć32
Kamientary
Kali redakcyja ładzićmie piarebary ŭ Miensk?
Jakija terminy daŭniny za kamienty i padpiski?