«Užo i pa Jeŭropie niebiaśpiečna padarožničać». Biełaruska, jakuju zatrymali ŭ Italii pa zapycie Minska, viarnułasia da siamji ŭ Polšču
Karyna Zdanievič-Spychalska — biełaruska, u jakoj jość i polskaje hramadzianstva, — viarnułasia ŭ Polšču paśla troch z pałovaj miesiacaŭ vymušanaha znachodžańnia ŭ Italii. Tam jaje zatrymali pa nocie Interpała. Zapyt u mižnarodnuju palicyju nakiravali biełaruskija ŭłady, jakija šukajuć žančynu pa ekanamičnym artykule. Ale Karyna ŭpeŭnienaja, što ŭsia sprava ŭ jaje palityčnaj aktyŭnaści 2020 hoda. Jana raskazała Most pra zatrymańnie i viartańnie dadomu.
Prablemy ź Interpałam byli i raniej
Pra toje, što biełaruskija ŭłady šukajuć Karynu, jana daviedałasia bolš za dva hady tamu. U lutym 2024 hoda jana prylacieła na Bali, ale na pamiežnym kantroli raptam uźnikli pytańni.
«U vas prablema ź Interpałam», — apisvaje Karyna tuju razmovu z pamiežnikami. — Vosiem hadzin u aeraporcie ja pračakała, ale mianie raźviarnuli — nie puścili na Bali».
Zatym źjaviłasia prablema z ujezdam u Turcyju, jakuju da hetaha žančyna naviedvała spakojna. U mai 2025 hoda jana pryjechała tudy z mužam i dziećmi. Siamju prapuścili, a jaje nie.
Adnojčy jaje zatrymlivali i ŭ Polščy. Karyna zhadvaje, što tady ŭźnikła akaličnaść, kali jana sama vyklikała palicyju. Patrul vyrašyŭ prablemu, ale praź piać chvilin palicyjanty viarnulisia. Jany spytali žančynu, ci viedaje jana, što jaje šukaje Interpał. Karyna adkazała śćviardžalna, i pravaachoŭniki paviedamili, što joj daviadziecca pajechać ź imi.
«Mianie dapytaŭ prakuror. Spytaŭ, z čym źviazany zapyt [Biełarusi]. Ja skazała, što, chutčej za ŭsio, jon palityčny. Tady mianie papiaredzili, kab nie jeździła ŭ Biełaruś. I skazali: «Budźcie aściarožnyja ŭ inšych krainach». Praz 15 chvilin mianie vypuścili», — uzhadvaje Karyna.
«Było vielmi ciažka bieź dziaciej»
Tym nie mienš u Šenhienskaj zonie da hetaha hoda prablem u Karyny nie było. Tolki letaś jana siem razoŭ była ŭ Paryžy, dva hady tamu pryjazdžała ŭ Italiju.
Apošni raz u krainu jana taksama ŭjechała biez prablem, a voś na zvarotnym šlachu, pry skanavańni bileta ŭ aeraporcie, spracavała sistema. Žančynu zatrymali.
«Užo i pa Jeŭropie niebiaśpiečna padarožničać», — źviartaje surazmoŭca ŭvahu na ryzyki dla ludziej, jakija znachodziacca ŭ toj ža situacyi, što i jana.
Pieršyja piać dzion paśla aryštu Karyna praviała ŭ turmie ŭ Bierhama, a zatym jaje adpuścili pad abaviazacielstva ab jaŭcy. Try z pałovaj miesiacy jana nie mahła pakidać Italiju i žyła ŭ znajomych. Paźniej mieru strymańnia anulavali, i 18 maja Karyna zdoleła viarnucca ŭ Polšču, ale ŭsio jašče abaviazanaja pryjazdžać u Italiju na słuchańni svajoj spravy.
Doma ŭ Polščy biełarusku čakali dvoje dziaciej — dvuch i čatyroch hadoŭ.
«Było vielmi ciažka bieź dziaciej», — apisvaje apošnija miesiacy Karyna.
Sprava ekanamičnaja ci palityčnaja?
Uvieś toj čas, pakul zapyt aficyjnaha Minska abmiažoŭvaŭ pieramiaščeńnie Karyny, jana sprabavała vyśvietlić, u čym sprava. Jašče padčas pieršych prablem na Bali joj stała viadoma, što jaje šukajuć pa ekanamičnaj spravie. Ale padrabiaznaściaŭ daviedacca nie ŭdałosia. Paźniej na zapyt žančyny joj adkazali, što Biełaruś schavała infarmacyju.
Ciapier ža, kali sud Italii pavinien byŭ vyrašyć, ci vydavać Karynu, akaličnaści stali prajaśniacca. Biełarusku šukajuć u suviazi z daviadzieńniem da naŭmysnaj ekanamičnaj niazdatnaści (bankructva). Jana kaža, što ŭ pradstaŭlenych dakumientach značycca, što jana vinnaja banku 60 tysiač jeŭra. Pavodle jaje słoŭ, raniej suma składała 6 tysiač jeŭra.
Karyna tłumačyć: niekali ŭ Biełarusi ŭ jaje sapraŭdy było IP, jakoje pajšło ŭ praceduru bankructva. Było heta jašče ŭ 2017 hodzie. Tady žančyna ŭžo žyła ŭ Polščy, a spravaj zajmalisia biełaruskija advakaty.
«Zaraz ja razumieju, što pavinna była atrymać niejki kančatkovy dakumient ab bankructvie. Ja jaho nie atrymała. Ale inšyja advakaty mnie kazali, što jon jość», — raskazvaje Karyna.
Tym nie mienš da 2020 hoda Biełaruś jaje nie šukała. Zapyt nakiravali tolki ŭ vieraśni 2020 hoda, a ŭ bazu Interpała jaje ŭnieśli praz hod. Ordar surazmoŭca źviazvaje sa svajoj aktyŭnaściu paśla prezidenckich vybaraŭ, kali jana padtrymała pratesty. Tady jana vychodziła na mitynhi ŭ Varšavie, a taksama raźmiaščała pasty ŭ siabie ŭ sacsietkach.
Paśla aryštu ŭ Italii Karyna źviazałasia z ofisam Śviatłany Cichanoŭskaj. Tam dapamahli i napisali list z tłumačeńniem situacyi.
«Mnie skazali, što heta jašče vielmi dobra, što mnie napisali ekanamičnaje złačynstva. Tamu što niekatorym prypisvajuć handal narkotykami. I heta pa-inšamu razhladajecca ŭ Jeŭropie».
Pa zaviaršeńni spravy Karyna maje namier dabivacca svajho vyklučeńnia z bazy Interpała.
Ciapier čytajuć
«Nadzieja Ściapanaŭna». Mikita Najdzionaŭ apublikavaŭ paemu, jakaja naradziłasia ŭ Žodzinskaj turmie. Takoha paetyčnaha epasu ŭ biełaruskaj paezii XXI stahodździa jašče nie było66
Kamientary