Kaleśnikava: Apošnim kancleram Hiermanii, jaki razmaŭlaŭ z Łukašenkam, była Mierkiel. Mahčyma, patrebna novaja sproba
Byłaja paplečnica Śviatłany Cichanoŭskaj pa vybarčaj kampanii 2020 dała intervju niamieckamu vydańniu TAZ.de, u jakim raskazała pra svaje piać hadoŭ i try miesiacy za kratami, a taksama padzialiłasia bačańniem palityčnaj situacyi.
«Ciapier ZŠA ŭpłyvajuć na Łukašenku bolš, čym Jeŭropa. I ja ŭdziačnaja amierykanskaj administracyi — jana spryjała majmu vyzvaleńniu i vyzvaleńniu jašče 500 źniavolenych. Ale ja dumaju, što i ES pavinien znoŭ adkryć dypłamatyčnyja kanały z Łukašenkam — dla jaho Jeŭrasajuz byŭ by bolš naturalnym partnioram. Aficyjna ŭsio jašče kala 1000 čałaviek znachodziacca ŭ źniavoleńni pa palityčnych pryčynach. Ich vyzvaleńnie pavinna być pryjarytetam», — miarkuje jana.
Karespandent zaŭvažyŭ, ci nie budzie heta aznačać peŭnuju lehitymizacyju Łukašenki?
«Nie, heta nie aznačaje lehitymizacyi. Ale Łukašenka de-fakta — adziny čałaviek, jaki vyrašaje, jak biełarusy žyvuć u Biełarusi. Kali chočaš mieć upłyŭ, treba ź im kantaktavać. My ciapier sustrakajemsia tut, na Špreje, u Bierlinie. Tam, dzie my razmaŭlajem, kaliści prachodziła miaža Bierlinskaha muru. Ja časta źviartajusia da hetaj niamieckaj historyi, bo ŭ niejki momant nadychodzić čas dla dypłamatyi i dyjałohu, i tady historyju možna pierapisać. Apošnim niamieckim kancleram, jaki razmaŭlaŭ z Łukašenkam, była spadarynia Mierkiel. Mahčyma, patrebna novaja sproba», — miarkuje Kaleśnikava.
Nahadajem, što Anhieła Mierkiel telefanavała Łukašenku 15 listapada 2021 hoda padčas mihracyjnaha kryzisu na polskaj miažy, kali niekalki sotniaŭ mihrantaŭ šturmavali biełaruska-polskuju miažu. Razmova doŭžyłasia kala 50‑ci chvilin i była pryśviečanaja hetamu kryzisu.
Darečy siońnia Maryja vystupić z kancertam u Bierlinie ŭ kulturnym centry Radialsystem.
«Narešcie znoŭ budu ihrać na flejcie — na traviers-flejcie, bas-flejcie i papiaročnaj flejcie. Ja budu raskazvać pra svoj dośvied, a taksama čytać uryŭki z knih, jakija pračytała padčas źniavoleńnia. Ja syhraju tvor na papiaročnaj flejcie, jaki maje dla mianie asablivaje značeńnie. U 2022 hodzie jaho pryśviaciŭ mnie biełaruski kampazitar Viktar Kapyćka, i za heta ŭ jaho ŭźnikli prablemy ŭ Biełarusi. Mnie biaskonca sumna, što ja nie zmahła asabista padziakavać jamu: jon pamior na nastupny dzień paśla majho vyzvaleńnia», — raskazała Maryja.
Kamientary