U Litvie pačali sudzić abvinavačanych u teraryźmie, na łavie padsudnych i biełarus
U Litvie pačaŭsia sudovy praces nad šaściu zamiežnikami, siarod jakich jość i hramadzianin Biełarusi. Ich abvinavačvajuć u terarystyčnaj dziejnaści, źviazanaj sa sprobaj padpału vajskovaha abstalavańnia, jakoje pryznačałasia dla vykarystańnia va Ukrainie, piša «Radyjo Svaboda».
Spravu razhladaje akruhovy sud u horadzie Šaŭli. Sud prachodzić u zakrytym režymie, kab nie raskryvać słužbovuju infarmacyju i harantavać biaśpieku śviedak, u tym liku ananimnych. Padčas dastaŭki abvinavačanych u sud ich supravadžali ŭzmocnienyja siły palicyi, a častka supracoŭnikaŭ była ŭzbrojenaja.
Usiaho pierad sudom pastaŭlenyja šeść čałaviek — piać mužčyn i adna žančyna. Siarod ich hramadzianie roznych krain: Biełarusi, Kałumbii, Ispanii, Kuby i Rasii. Usie jany znachodziacca pad aryštam. Palicyja nie dazvoliła žurnalistam mieć niepasredny kantakt z abvinavačanymi.
Zhodna z materyjałami spravy, hetyja ludzi padazrajucca ŭ arhanizacyi i ŭdziele ŭ terarystyčnaj hrupie, sprobie ździajśnieńnia terarystyčnaha aktu, a taksama ŭ finansavańni takoj dziejnaści. Śledstva ličyć, što jany dziejničali pa instrukcyjach Hałoŭnaha raźviedvalnaha ŭpraŭleńnia (HRU) Rasii.
Asnoŭny epizod spravy tyčycca vieraśnia 2024 hoda, kali, pavodle abvinavačańnia, hrupa płanavała padpał infrastruktury kampanii, jakaja zajmajecca technikaj dla analizu radyjočastotnaha śpiektru i jakaja pryznačałasia dla patreb Uzbrojenych sił Ukrainy. Košt hetaj techniki aceńvajecca prykładna ŭ niekalki miljonaŭ jeŭra.
Taksama paviedamlajecca, što častka ŭdzielnikaŭ raniej sprabavała ažyćciavić padpał, ale biez značnaha vyniku. Niekatoryja ź ich paśla hetaha ŭciakali ŭ Łatviju, adnak byli zatrymanyja i viernutyja ŭ Litvu.
Abvinavačańni vielmi surjoznyja, usim fihurantam spravy pahražaje da 15 hadoŭ pazbaŭleńnia voli. Asoba biełaruskaha abvinavačanaha nie raskryvajecca — viadomyja tolki jaho inicyjały M. B.
Spravu pieradali ŭ sud jašče ŭ studzieni, ale jaje razhlad pačaŭsia tolki ciapier.
Ciapier čytajuć
U Čechii małady biełarus trapiŭ u komu — nahłytaŭsia tabletak praz prablemy ź lehalizacyjaj i razryŭ ź dziaŭčynaj7
Kamientary