Na Anharskaj pierarablajuć vyjezd na MKAD. Voś jak chočuć arhanizavać ruch
Vyjechać budzie praściej, piša Blizko.by.
U mikrarajonie Anharskaja-4 u Minsku pačali rekanstrukcyju darohi, jakaja złučaje vulicu Ilimskuju i MKAD.
Jašče ŭ kastryčniku 2023 hoda staršynia Minharvykankama Uładzimir Kucharaŭ pravioŭ vyjazny pryjom hramadzian u Zavodskim rajonie. Žycharka vulicy Nieścierava źviarnułasia z prośbaj pašyryć prajezd, jaki złučaje vulicu Ilimskuju z MKAD. Jana paskardziłasia na toje, što ŭ viečarovy čas pik praz vuzkaść prajezdu na im pieryjadyčna ŭźnikajuć zatory. Akramia taho, jana vykazała pažadańni pa źmienie arhanizacyi darožnaha ruchu ŭ hetym miescy. Uładzimir Kucharaŭ paviedamiŭ, što prajezd płanujecca pašyryć: adpaviedny prajekt raspracoŭvajecca.
I voś zaraz dajšło da darožnych rabot, paviedamlajuć na transpartnym forumie.
Na sajcie administracyi Zavodskaha rajona Minska jość prezientacyja hramadskaha abmierkavańnia prajekta rekanstrukcyi hetaj zony. Tam pradstaŭleny kartahramy intensiŭnaści aŭtamabilnych patokaŭ u rozny čas sutak pa napramkach ruchu.
U prezientacyi havorycca, što byŭ varyjant zachavać isny nierehulavany prajezd sa stvareńniem raździalalnaj zony, ale jaho pryznali niemetazhodnym. U vyniku spynilisia na kalcavoj raźviazcy z radyusam unutranaha astraŭka 20 mietraŭ pablizu MKAD. Kalco bolšaha pamieru zakranuła b aŭtastajanku i AZS.
A ŭ tym miescy, dzie złučalny prajezd prymykaje da vulicy Ilimskaj, zrobiać rehulavanaje skryžavańnie; prypynak hramadskaha transpartu adniasuć za skryžavańnie na 65 mietraŭ paŭnočniej.
Kamientary