Vyjšaŭ na svabodu palitviazień, jaki pryjechaŭ z Rasii i pry absurdnych abstavinach zatrymaŭsia ŭ Biełarusi na try hady
Alaksandr Śmirnoŭ vyzvaliŭsia paśla trochmiesiačnaha aryštu, napiŭsia i staŭ zryvać čyrvona-zialonyja ściahi — kab pakinuć sabie ich na pamiać pra znachodžańnie ŭ Biełarusi. Atrymaŭ novy termin.
Stała viadoma pra vyzvaleńnie 28‑hadovaha biełaruskaha palitźniavolenaha, hramadzianina Rasii Alaksandra Śmirnova. Chłopiec nie źbiraŭsia vykazvać nijakuju palityčnuju pazicyju, ale los skłaŭsia tak, što jon trapiŭ u biełaruskuju kałoniju.
Alaksandr Śmirnoŭ — maskvič. Miarkujučy pa sacsietkach, adsłužyŭ u vojsku, pracavaŭ na radzimie ŭ praduktovaj kramie.
Niajasna, kali i ź jakoj nahody Śmirnoŭ apynuŭsia ŭ Biełarusi, ale ŭ krasaviku 2023 hoda jaho zatrymali za kradziež i chulihanstva. Pa dźviuch kryminalnych spravach jon atrymaŭ try miesiacy aryštu.
U červieni 2023 hoda Śmirnoŭ vyzvaliŭsia i adrazu ž znajšoŭ novyja pryhody. Rasijanin pa čarzie sarvaŭ čatyry čyrvona-zialonyja ściahi. Spačatku na adnoj z kram — schapiŭsia za jaho rukami, sarvaŭ ź mietaličnym kranštejnam, złamaŭ dreŭka i kinuŭ ściah na ziemlu. Paśla źniaŭ ściah z doma kala stancyi mietro i addaŭ jaho supracoŭniku mietrapalitenu. Dalej źniaŭ ściah z fasadu budynka «Biełpošty» i pakinuŭ jaho kala ŭvachodu. A ŭrešcie sarvaŭ jašče adno pałotnišča, kinuŭ jaho na prypynku hramadskaha transpartu i padpaliŭ. U tuju ž noč Alaksandr padpaliŭ płastykavy kantejnier dla adchodaŭ.
U sudzie Śmirnoŭ raskazaŭ, što zryvaŭ ściahi, bo byŭ pjany i zachacieŭ pakinuć sabie ich na pamiać pra znachodžańnie ŭ Biełarusi i paviesić ich u siabie doma. A śmietnicu padpaliŭ vypadkova, kali kinuŭ tudy niepatušany niedakurak cyharety. Paśla hetaha jon vyklikaŭ pažarnych.
Tym nie mienš hramadzianin Rasii trapiŭ pad razdaču — jamu pryznačyli ažno try hady kałonii. Jon całkam adbyŭ pakarańnie ŭ kałonii ŭ Voŭčych Norach.
«Ostupiłsia, upał —
Eto strašnaja muka —
I v stakanie iskał
Ja sud́bu svoju, suka!», — publikuje ciapier vieršy Alaksandr Śmirnoŭ.
Kamientary