«My abrali šlach demakratyzacyi, jany — krychu inšy». U Armienii adreahavali na notu biełaruskaha MZS
U adkaz na notu biełaruskaha MZS u Armienii paŭtaryli: «Armienija nie budzie pravincyjaj». Adnosiny ž pamiž Armienijaj i Biełaruśsiu paharšajuć nie zajavy aficyjnych asob, a kankretnyja niadobrazyčlivyja kroki. Heta vynikaje ź siońniašniaj zajavy staršyni Nacyjanalnaha schodu Armienii Alena Simaniana, piša «Radyjo Svaboda».
6 maja Alen Simanian znoŭ padkreśliŭ svaju raniejšuju pazicyju. Jon zajaviŭ, što Armienija nie stanie pravincyjaj i nie budzie zaležać palityčna ad inšych krain. Pavodle jaho słoŭ, kraina budzie ŭmacoŭvać svoj suvierenitet, a biełaruskaja madel kiravańnia dla jaje nieprymalnaja. Jon taksama adznačyŭ, što Armienija ličyć siabie svabodnaj dziaržavaj ź niezaležnymi ŚMI, pravami čałavieka i viaršenstvam zakona.
«Niepavažlivaje staŭleńnie da Armienii, partniora pa ADKB, da armianskaj dziaržaŭnaści paharšaje adnosiny. Padrychtoŭka da 44‑dzionnaj vajny razam z Azierbajdžanam paharšaje adnosiny», — cytuje adkaz Alena Simaniana na pytańnie pra armiana-biełaruskija stasunki Armianskaja słužba «Radyjo Svaboda».
«Palityčny kurs — heta pytańnie vybaru kožnaj dziaržavy. Dla Respubliki Armienija pravy čałavieka i svabody jość najvažniejšymi kaštoŭnaściami. I ja liču, što kožnaja dziaržava vybiraje svoj šlach. My abrali šlach demakratyzacyi Armienii, jany — krychu inšy», — skazaŭ Simanian pra Biełaruś.
Pierad hetym 5 maja ŭ Ministerstva zamiežnych spraŭ Biełarusi vyklikali armianskaha dypłamata Artura Sarhsiana i pieradali jamu notu pratestu. Biełaruski bok zajaviŭ, što heta zroblena z-za apošnich niedružalubnych vykazvańniaŭ i dziejańniaŭ Armienii.
Padstavaj stali słovy taho ž śpikiera parłamienta Armienii Alena Simaniana, jaki 1 maja zajaviŭ, što jahonaja kraina nie dazvolić sabie pieratvarycca ŭ «druhuju Biełaruś» i nie budzie kiravacca tak, jak Biełaruś.
U adkaz pradstaŭnik biełaruskaha MZS Rusłan Varankoŭ nazvaŭ hetyja vykazvańni pieradvybarčym papulizmam i sprobaj adciahnuć uvahu hramadzian Armienii ad unutranych prablem.
Śpikier armianskaha parłamienta: My nie dazvolim pieratvaryć Armieniju ŭ hubierniu, jak Biełaruś
«Pieradvybarčy papulizm». U MZS adreahavali na vykazvańnie śpikiera armianskaha parłamienta pra Biełaruś jak hubierniu Rasii
Śpikier armianskaha parłamienta: Armienija moža vyjści z ADKB i JEAES, kali Maskva budzie iści na abvastreńnie
Łukašenka paprasiŭ ADKB być «vielmi akuratnaj i karektnaj» u pracy z Armienijaj
Kamientary