Ryžankoŭ: Jeŭrasajuz, dzie vaša reakcyja na hetyja humanitarnyja kroki našaha prezidenta?
Ministr zamiežnych spraŭ ličyć, što Jeŭrapiejski sajuz pakul nie adreahavaŭ na vyzvaleńnie častki palitviaźniaŭ u krainie. Pra heta Maksim Ryžankoŭ zajaviŭ u efiry telekanała «Biełaruś 1» 9 sakavika.
Na dumku kiraŭnika MZS, sankcyi ŭ dačynieńni da Biełarusi nie prynieśli vynikaŭ, i ES heta razumieje, ale nie moža pryznać pamyłku.
«Palityčny ład u Biełarusi i Rasii nie źmianiŭsia. Ułada tolki jašče bolš kansalidavałasia vakoł svaich lidaraŭ i vakoł tych hramadskich abjadnańniaŭ, jakija sfarmiravali bazis hramadskaha raźvićcia dziaržaŭ.
I na siońniašni momant bumieranham hetyja sankcyi bolš bjuć pa samoj Jeŭropie. Ale ŭstać siońnia i skazać: «My byli niapravyja. Davajcie pracavać ź Biełaruśsiu» — daloka nie kožny palityk u Jeŭrapiejskim sajuzie moža sabie heta dazvolić. Bo jamu adrazu skažuć: «Dyk skažycie, a hetyja piać hadoŭ, voś užo šosty idzie, byli vykinutymi? Hady, jakija pryviali da ekanamičnych prablem dla Jeŭrapiejskaha sajuza, jakija stali vielmi surjoznaj prablemaj dla hramadzian pa abodva baki miažy, razarvali mnohija multykulturnyja, humanitarnyja suviazi». Usia hetaja palityka pierš za ŭsio škodnaja dla krain Jeŭrapiejskaha sajuza. Kamuści treba adkazvać», — ličyć Ryžankoŭ.
Biełaruś vyzvaliła niekatorych palitviaźniaŭ i ciapier čakaje reakcyi ad ES, zajaviŭ jon.
«I tamu i hučać takija zakliki: «Viedajecie, vy ŭ Biełarusi zrabicie jašče niešta bolšaje, čym vy robicie, nibyta ŭ humanitarnych niejkich kaardynatach, kab nam zachavać tvar pierad našymi vybarščykami i skazać: «Voś, Biełaruś niešta zrabiła».
Dyk niešta ž robicca. Vy chacieli, kab niejkija ludzi vyjšli na volu — ludzi, jakija ledź nie pryviali da kałapsu situacyju ŭ našaj krainie. Ich vypuścili. Dyk dzie vaša reakcyja na hetyja humanitarnyja kroki našaha prezidenta? Jaje niama. Vy kažacie: zrabicie jašče niešta.
Nu, rabiaty, tak nie byvaje. I akramia taho, kali heta supracoŭnictva budzie ci pavinna nasić uzajemavyhadny charaktar, dyk davajcie razam rabić niejkija kroki. Nie byvaje takoj mantry: «Vy pavinny, vy pavinny, vy pavinny», — skazaŭ ministr.
Ryžankoŭ padkreśliŭ, što Biełaruś nikomu ničoha nie pavinna i dobra siabie adčuvaje, naroščvajučy supracoŭnictva z Rasijaj, Kitajem, Iranam, krainami Blizkaha Uschodu i Afryki.
«Skažu, što za hetyja šeść hadoŭ my pieraaryjentavali praktyčna ŭvieś asnoŭny naš handal. My ničoha nie stracili ŭ eksparcie. Kožny hod — rost, za piacihodku, zdajecca, kala 40%, i dalej jon praciahvajecca. My zabiaśpiečyli svaju technałahičnuju biaśpieku. My pierastali zaležać ad Jeŭrapiejskaha sajuza», — adznačyŭ Ryžankoŭ.
Admoviŭšysia ad rasijskich enierhanośbitaŭ i biełaruskich praduktaŭ, Jeŭrasajuz trapiŭ u zaležnaść ad Złučanych Štataŭ Amieryki, ličyć kiraŭnik MZS Biełarusi.
«Tamu my pakul čakajem, ličačy ŭsiu hetuju palityku Jeŭrapiejskaha sajuza faktyčna samaizalacyjaj. Kali pahladzieć na miežy Jeŭrapiejskaha sajuza, to mała dzie jość učastak hetaj miažy, dzie niama bajavych dziejańniaŭ abo dzie jość stabilnyja krainy, praź jakija krainy Jeŭrapiejskaha sajuza mohuć mieć znosiny z astatnim śvietam», — zajaviŭ Ryžankoŭ.
Ministr adznačyŭ, što kanflikt na Blizkim Uschodzie niasie katastrafičnyja nastupstvy dla ES, i zaklikaŭ uspomnić pra «stabilnuju dziaržavu Biełaruś».
«Samy čas im apamiatacca i ŭspomnić, što tut jość stabilnaja dziaržava Biełaruś, jość hety ŭčastak miažy, praź jaki dalej — na Rasiju i da Kitaja, da Paŭdniova-Uschodniaj Azii. Ale pakul takija palityki — narody Jeŭrapiejskaha sajuza źjaŭlajucca ich zakładnikami, za vyklučeńniem, viadoma, niekalkich krain, ź jakimi my vielmi stabilna i dynamična raźvivajem adnosiny, jak, naprykład, Vienhryja i Słavakija», — dadaŭ Ryžankoŭ.
Kamientary
[Zredahavana]