164 žančyny za kratami: što viadoma pra palityčny pieraśled žančyn u Biełarusi

Siońnia ŭ Biełarusi zastajucca za kratami 164 palitźniavolenyja žančyny.

Siarod ich — asudžanyja za padtrymku Ukrainy ŭ vajnie — 25; pa «spravie dvarovych čataŭ» — 33; za «salidarnaść z palitviaźniami» — 16; pa «spravie Hajuna» — 10; pa «spravie ČKB» — 6 žančyn.

Da hetaha času za kratami ŭtrymlivajucca piać žančyn ź miedyjaśfiery: Kaciaryna Bachvałava, Cina Pałynskaja, Palina Pitkievič, Volha Radzivonava, Ludmiła Čekina.

Taksama za kratami zastajucca dźvie pravaabaroncy — Nasta Łojka i Marfa Rabkova. Ich asudzili za svaju dziejnaść da siami hadoŭ i 14 hadoŭ i 9 miesiacaŭ niavoli adpaviedna.

Minimum 15 žančyn utrymlivajucca za kratami z surjoznymi prablemami sa zdaroŭjem.

Pavodle źviestak «Viasny», pa kryminalnych spravach z 2020 hoda byli asudžanyja nie mienš za 1917 žančyn. Ź ich:

• minimum 881 žančyna atrymała pakarańnie ŭ vyhladzie «chatniaj chimii»;
• minimum 469 žančyn byli nakiravanyja ŭ kałonii;
• minimum 75 žančyn asudzili da «chimii»;
• 7 žančyn nakiravali na prymusovaje lačeńnie ŭ psichijatryčny stacyjanar.

Akramia taho, nie mienš za 9400 žančyn sutyknulisia z administracyjnym pieraśledam — aryštami i štrafami.

Bolšaść žančyn, asudžanych da pazbaŭleńnia voli, adbyvajuć pakarańnie ŭ žanočaj kałonii № 4 u Homieli. Pavodle danych pravaabaroncaŭ, tam utrymlivajucca 125 palitźniavolenych žančyn. Jašče dźvie žančyny — Alena Łazarčyk i Volha Majorava — znachodziacca ŭ kałonii № 24 u Zareččy, pryznačanaj dla asudžanych z recydyvam.

Možna vyłučyć niekalki raspaŭsiudžanych artykułaŭ, pavodle jakich pieraśledujuć žančyn. Za ŭdzieł u akcyjach pratestu (art. 342 KK) asudzili najmieniej 1167 žančyn, za «abrazu pradstaŭnika ŭłady» (art. 369 KK) — 231, za «abrazu» Łukašenki (art. 368 KK) — 198, za «sadziejničańnie ekstremisckaj dziejnaści» (art. 361‑4 KK) — 170, za «raspalvańnie inšaj sacyjalnaj varožaści» (art. 130 KK) — 148 i ŭdziele ŭ «ekstremisckim farmavańni» — 96 žančyn.

Pavodle danych «Viasny», žančyny fihuravali i ŭ šerahu hučnych palityčnych spraŭ. Siarod ich — spravy za padtrymku Ukrainy ŭ vajnie (71), «Rejd salidarnaści» (36), «sprava dvarovych čataŭ» (35), spravy za danaty (33), «sprava Hajuna» (22), «sprava Zielcera» (16) i «sprava Čornaj knihi Biełarusi» (12).

Asobna pravaabaroncy adznačajuć uraźlivyja hrupy žančyn, jakija trapili pad kryminalny pieraśled. Siarod ich:

• 40 šmatdzietnych maci;
• 62 žančyny z surjoznymi prablemami sa zdaroŭjem;
• 82 žančyny piensijnaha ŭzrostu.

Minimum 29 pieraśledavanych žančyn pavodle kryminalnych spravaŭ majuć zamiežnaje hramadzianstva.

Akramia taho, 38 žančyn byli prymusova vydvaranyja ź Biełarusi, a 58 asudzili zavočna.

Taksama viadoma, što 113 žančyn uklučanyja ŭ tak zvany «śpis terarystaŭ».

Statystyka padrychtavana na padstavie źviestak Pravaabarončaha centra «Viasna» — niekatoryja danyja varta razhladać jak minimalny pakazčyk.

• 0
• 0
• 0
• 0
• 0
• 2
• 1
• 0