Chutka sinoptyki zmohuć składać prahnozy nadvorja na 15 dzion napierad pry dapamozie ŠI
Sinoptyki ŭ Biełarusi zmohuć składać prahnoz nadvorja na 10—15 dzion napierad dziakujučy novaj «razumnaj» sistemie siarednieterminovaha prahnazavańnia, jakaja budzie pieradadziena Biełhidramietu ŭ 2027 hodzie. Pra heta paviedamiŭ dyrektar Instytuta pryrodakarystańnia NAN Biełarusi Sierhiej Łysienka, piša BiełTA.
Instytut užo ŭkaraniaje hieainfarmacyjnyja sistemy dla prahnazavańnia nadvorja i vyvučeńnia źmianieńniaŭ klimatu. U 2026 hodzie tut uviali novuju sistemu dla palapšeńnia dakładnaści karotkaterminovych prahnozaŭ nadvorja. Ciapier ža raspracoŭvajecca pieršaja ŭ Biełarusi sistema siarednieterminovaha prahnazavańnia, jakaja vykarystoŭvaje štučny intelekt i, jak zapeŭnivajecca, adpaviadaje ŭzroŭniu najlepšych suśvietnych anałahaŭ.
Sistema stvarajecca ŭłasnymi siłami instytuta — fizikami i prahramistami. Jana dazvalaje rabić pahadzinnyja prahnozy nadvorja na 10—15 dzion i ŭličvaje ŭsie łakalnyja faktary, dziakujučy čamu dakładnaść prahnozaŭ budzie vyšejšaj, čym u najaŭnych ciapier madelaŭ. Asablivuju ŭvahu sistema nadaje prahnazavańniu apadkaŭ, bo heta adzin z samych składanych paramietraŭ nadvorja.
Akramia taho, instytut raspracoŭvaje kompleksnuju sistemu prahnazavańnia źmienaŭ klimatu. Jana pakazvaje, jak klimat budzie źmianiacca pry roznych scenaryjach vykidaŭ parnikovych hazaŭ, a taksama dazvalaje vyznačać ahraklimatyčnyja ŭmovy, terminy viehietacyi kultur, daty apošnich viasnovych i pieršych vosieńskich marazoŭ, sumu aktyŭnych tempieratur i inšaje. Takija prahnozy dapamahajuć aptymizavać strukturu pasievaŭ, vybirać kultury, adaptavanyja da novych klimatyčnych umoŭ, i pieradajucca Ministerstvu sielskaj haspadarki, Minpryrody i navukovym instytutam u vyhladzie analityčnych zapisak.
Kamientary