Niamieckaja raźviedka padsłuchoŭvała Baraka Abamu, kali toj byŭ prezidentam ZŠA

«Špijonić za siabrami — tak nielha», — skazała kancler Hiermanii Anhieła Mierkiel u 2013 hodzie, daviedaŭšysia, što amierykanskaja raźviedka padsłuchoŭvała jaje telefon. Skandał z padsłuchoŭvańniem tady pieraros u kryzis hiermana-amierykanskich adnosin, piša Bild.

Upieršyniu ŭrad FRH vyklikaŭ pasła ZŠA, a tahačasny prezident ZŠA Barak Abama tłumačyŭ kanclercy, što jon ničoha nie viedaŭ pra padsłuchoŭvańnie.

Ciapier vyśviatlajecca, što Hiermanija, mahčyma, zajmałasia tym ža — niamieckaja raźviedka BND padsłuchoŭvała prezidenta Abamu! Pra heta paviedamiŭ u padkaście hałoŭny redaktar Bild, namieśnik hałoŭnaha redaktara ZEIT Cholhier Štark. U svajoj novaj knizie «Daśviedčanaja kraina» Štark raskryvaje, što BND padsłuchoŭvała prezidenta ZŠA bieź viedama kanclerki.

«BND — heta słužba, jakaja nikoli na sto adsotkaŭ nie była kantralavanaja, i kali mahła, to padsłuchoŭvała i kiraŭnictva amierykanskaj dziaržavy, i asabliva tahačasnaha prezidenta Baraka Abamu», — tłumačyć Štark.

Dla padsłuchoŭvańnia, u pryvatnaści, vykarystoŭvali samalot Abamy, dzie toj časta pravodziŭ telefonnyja razmovy ź inšymi kiraŭnikami dziaržaŭ abo sa svaimi ministrami. Pakolki ŭ pavietry składaniej nadziejna šyfravać razmovy, amierykancy časam viali mienš šyfravanyja abo zusim nie šyfravanyja pieramovy — i tady ŭ ich byli niamieckija słuchačy.

«BND […] raspaznała dobra dziasiatak častot, jakija bort «Air Force One» vykarystoŭvaŭ dla takoha typu kamunikacyj. I jana ich padsłuchoŭvała. Nie zaŭsiody, nie sistematyčna — i nie pa aficyjnym daručeńni», — kaža Štark.

BND pa svajoj inicyjatyvie padsłuchoŭvała taksama tahačasnuju dziaržsakratarku ZŠA Chiłary Klintan i amierykanskich vajskoŭcaŭ: «Ja havaryŭ ź ludźmi, jakija kažuć: vajskovyja detali byli na samaj spravie značna cikaviejšyja, čym palityčnaja bazarnaja razmova Abamy pra apošni samit G7 ci niešta padobnaje».

U adkaz na zapyt Bild hetaj temie BND admoviłasia ad kamientaroŭ: «Fiederalnaja raźviedvalnaja słužba pa pytańniach, jakija datyčacca mahčymych raźviedvalnych źviestak abo dziejnaści, pryncypova nie vykazvajecca publična. Takim čynam nie robicca nijakaj zajavy pra toje, ci adpaviadaje hety fakt rečaisnaści. Fiederalnaja raźviedvalnaja słužba dakładvaje pa adpaviednych temach, u pryvatnaści, fiederalnamu ŭradu i kampietentnym kamitetam Hiermanskaha bundestaha, pasiadžeńni jakich prachodziać u zakrytym režymie».

Amal litaralna toje samaje adkazała redakcyi Bild viedamstva kanclerki. Ofis Anhieły Mierkiel na zapyt Bild uvohule nie adkazaŭ. Pavodle Štarka, jana ničoha nie viedała pra padsłuchoŭvańnie amierykancaŭ BND i daviedajecca pra heta tolki ź jaho knihi.

• 0
• 0
• 4
• 0
• 0
• 0
• 0
• 0