«Paŭhoda čakańnia, minus $1200 — i nijakaj vizy». Jak biełarusy zaraz adkryvajuć «šenhien»

Na hałoŭnaje pytańnie (a zaadno i na dziasiatak inšych) adkazvaje Kryścina Varapajeva — kiraŭnica turystyčnaj kampanii Lime Travel, jakaja śpiecyjalizujecca na adkryćci viz. Dyk usio ž taki: kudy biehčy? Pa słovach surazmoŭcy, dva samyja dziejsnyja varyjanty prosta ciapier — heta Hrecyja i Ispanija.

Pavialičyć

Varyjant 1: Hrecyja

— Pieršy, samy chutki varyjant — heta Hrecyja. Na vizu možna padacca jak u Minsku, tak i ŭ rehijonach navat u najbližejšyja paru dzion, ale ŭ siarednim — na praciahu tydnia. Razhlad dakumientaŭ zajmaje da troch tydniaŭ. Tak što jość šaniec atrymać vizu navat da Novaha hoda.

Ale kali adkłaści padaču da siaredziny śniežnia i dalej, to terminy čakańnia pavialičacca. Konsulstva Hrecyi znachodzicca ŭ Rasii, dzie buduć vialikija navahodnija kanikuły. Tamu pašpart udasca zabrać tolki paśla Novaha hoda.

Pavialičyć

Praŭda, u hrečaskaj vizy jość tolki adzin bonus — chutkaść. Što tyčycca praciahłaści, jaje adkryvajuć vyklučna pad daty pajezdki. Ni papiaredniaja vizavaja historyja, ni kolkaść pajezdak u Hrecyju, ni sumy na rachunku na vynik nie ŭpłyvajuć.

Varyjant 2: Ispanija

— Što tyčycca Ispanii, to jość roznyja varyjanty padačy, u tym liku ŭ najbližejšyja niekalki dzion. Praz zvyčajnuju zału miescy raźbirajuć dastatkova chutka, tamu na zapis treba zakładać adzin-dva miesiacy. Ale jość zapis praz premium-zału — tam daty mohuć być u volnym dostupie, choć i nie zaŭsiody. Jany mohuć źniknuć za niekalki hadzin, a mohuć pravisieć i paru dzion. U cełym na praciahu dvuch tydniaŭ zapisacca, chutčej za ŭsio, atrymajecca.

Termin razhladu dakumientaŭ u ispancaŭ prosta ciapier — dva-try tydni. Ale zapytvać vizu treba na šeść tydniaŭ upierad ad daty padačy. To-bok navat kali pašpart viernuć chutka, to terminova pajechać takim čynam nie atrymajecca. I nie zabyvajem pra navahodnija śviaty: ispanskaje konsulstva taksama znachodzicca ŭ Rasii, a značyć, terminy razhladu i vydačy pašpartoŭ buduć ssoŭvacca.

Pavialičyć

Čaściej za ŭsio ispanski «šenhien» vydajuć na termin ad 1 da 3 miesiacaŭ: moža być dvuchrazovaja viza na 1 miesiac ci «mulcik» na 3 miesiacy z abmiežavanym terminam znachodžańnia. Zaraz, pa-za siezonam, zaŭvažnaja tendencyja da adnarazovych viz.

Varyjant 3: Italija

Mabyć, samy abmiarkoŭvajemy ŭ tematyčnych čatach i na forumach «šenhien» — italjanski. Jak iduć spravy ź im u śniežni 2025 hoda?

— Jość niekalki sposabaŭ dziejničać. Možna ŭziać numarok žyvoj čarhi. Dla hetaha treba padać anłajn-zajaŭku na sajcie vizavaha centra, a potym kala troch miesiacaŭ pačakać zaprašeńnia na vieryfikacyju. Vieryfikacyju možna prajści tolki asabista, z pašpartam, u ofisie vizavaha centra ŭ Minsku. I ŭžo paśla hetaha vam prysvojać numar žyvoj čarhi. Dalej jaho nieabchodna budzie adsočvać na sajcie. Kali čarha padydzie, treba adpravić zajaŭku, kab vydali słot dla padačy. Usia pracedura, dumaju, moža zaniać nie mienš za hod.

Pieršapačatkova zajaŭki płanavali apracoŭvać za miesiac. Ale ich pryjšła prosta nievierahodnaja kolkaść. Tamu termin užo padoŭžyli da troch miesiacaŭ i, advažusia vykazać zdahadku, mohuć jašče pavialičyć da piaci-šaści miesiacaŭ. Tak što hety varyjant padobny da čakańnia niamieckaj vizy: tam z momantu zapisu da padačy prachodzić kala paŭtara hoda.

Pavialičyć

Druhi sposab — heta atrymać vizu pad tur ad akredytavanaha ahienctva. Možna padacca na praciahu adnaho-dvuch miesiacaŭ, terminy razhladu — dva tydni. Da leta zapisacca budzie ŭžo składaniej.

Ale ŭ cełym italjancy vielmi łajalnyja: navat u čysty pašpart mohuć dać vizu na 3 ci 6 miesiacaŭ. Kali vizavaja historyja była, termin moža pavialičycca i da 3 hadoŭ, asabliva kali ŭžo byli italjanskija vizy i paćvierdžańnie pajezdak u Italiju (čeki, fota). Ale byvajuć i redkija, niepradkazalnyja situacyi, kali paśla dvuchhadovaj vizy dajuć na hod, a paśla hadavoj — «adnarazoŭku».

Asobnaja tema, dastupnaja, nažal, nie ŭsim — haściavyja i dziełavyja vizy.

— Tut usio cudoŭna. Kali ŭ klijenta ŭ Italii žyvie blizki svajak, siabar, siamja, u jakuju jon jeździŭ pa čarnobylskaj prahramie, padacca možna ŭ sproščanym režymie na praciahu adnaho-troch miesiacaŭ. Blizkamu svajactvu addajuć pryjarytet. A voś kali svajactva niablizkaje, datu mohuć i nie pryznačyć.

Ale kali padacca ŭsio ž taki ŭdałosia, to terminy viz vychodziać vydatnyja: i na hod, i na dva, i na try. Italjancy ŭ hetym płanie ščodryja. Prykładna takaja ž historyja i z Francyjaj, ale tam čaściej vyznačajuć daty padačy mienavita blizkim svajakam.

Ź dziełavymi vizami ŭ Italiju i Francyju taksama ŭsio dobra: chutka reahujuć, chutka pryznačajuć daty. Terminy viz roznyja: kali pajezdka pieršaja, mohuć dać «adnarazoŭku», kali nie pieršaja, to paŭhoda, hod.

I ŭsio ž žurnalisty viartajucca da zvyčajnych turystaŭ i ŭdakładniajuć u Kryściny: a adnaŭleńnie zapisu ŭ žyvuju čarhu choć trochi dapamahło vyrašyć situacyju ź vizami?

— My nazirajem, što heta stanoŭča adbiłasia na ažyŭlenaści ludziej. Mnohim nadakučyli składanaści z Hrecyjaj i Ispanijaj, nichto nie choča płacić vialikija hrošy za «adnarazoŭku» ci vizu na 3 miesiacy. Tak što adnaŭleńnie žyvoj čarhi ŭ italjanskim pasolstvie mocna skałanuła rynak u dobrym sensie.

Ale vielmi važna razumieć: padacca vy zmožacie nie praz try miesiacy i navat nie praz paŭhoda. Heta ŭ najlepšym vypadku hod, a moža być, i paŭtara. Jak by ni staralisia supracoŭniki pasolstva, ich resursy abmiežavanyja. Pakul prapuskajuć ludziej, kamu prysvoili numary raniej, jašče da adnaŭleńnia zapisu, a tam ličba ŭžo dachodziła da 40 000. Zaraz prachodziać tolki tyja, u kaho numar 26 000—27 000, što ŭžo kazać pra novyja zapisy paśla adnaŭleńnia žyvoj čarhi. Ale Italija — heta kłasny varyjant, prosta doŭhaterminovaja pierśpiektyva, jak i Hiermanija.

Varyjant 4: Hiermanija

Darečy, pra Hiermaniju.

— Užo bolš za try miesiacy ŭ konsulstvie nie prysvojvajuć słoty na padaču na turystyčny «šenhien». Zajaŭniki značacca ŭ čarzie, ale nie viedajuć, kali zmohuć padać dakumienty. Apošnija try z pałovaj miesiacy pryznačajuć daty tolki tym, u kaho haściavyja ci dziełavyja vizy, a nie standartny turyzm. Čas čakańnia padačy na turystyčnuju vizu ŭžo dachodzić da paŭtara hoda.

Ale ź plusaŭ hetaha varyjantu — kali adkryvać niamiecki «šenhien» z razu ŭ raz, viza moža być «narastajučaj». Niemcy źviartajuć uvahu na vizavuju historyju. Kali była hadavaja viza inšaj krainy, mohuć adkryć na 3 miesiacy. Kali była mienavita niamieckaja viza i sapraŭdy adbyłasia pajezdka ŭ Hiermaniju, tady vysokija šancy na vizu ad hoda.

Pavialičyć

Z haściavymi vizami situacyja jašče lepšaja: pry blizkim svajactvie mohuć dać 1 hod navat u čysty pašpart, a kali ŭžo byli niamieckija haściavyja vizy, to možna raźličvać na 2—3 hady. Z zaprašeńniem ad siabroŭ ci dalokich svajakoŭ čaściej vychodziać «adnarazoŭki» ci vizy na 3 miesiacy. Na žal, u hetym płanie Hiermanija stała nie takoj ščodraj, jak dva hady tamu.

Varyjant 5: vizy pad tury

Italija nie adzinaja kraina, jakaja adkryvaje «šenhien» pad vykupleny tur. Taki varyjant jość i z Francyjaj, choć jon i krychu składaniejšy. Zaraz možna raźličvać na padaču na praciahu čatyroch-piaci miesiacaŭ. Terminy razhladu dakumientaŭ pry hetym składajuć dva tydni. Vynik budzie zaležać ad šancavańnia: sustrakajucca jak adnarazovyja vizy, tak i hadavyja. Papiaredniaje naviedvańnie Francyi zvyčajna zaličvajecca jak bonus.

Pavialičyć

Taksama možna padumać i pra tur u Vienhryju. Ale da hetaha varyjantu ŭ vizavaha ekśpierta jość pytańni.

— Mahčyma, heta naša subjektyŭnaje mierkavańnie, ale ŭsio zanadta niepradkazalna. Moža być i niečakanaja admova, i «adnarazoŭka», pry hetym sustrakajucca kiejsy i na hod, i na dva. Ale łohiku prasačyć składana. Paśla hadavoha vienhierskaha «šenhienu» spakojna moža vyjści «adnarazoŭka» pad tur. Tamu ja b vialikich stavak na Vienhryju nie rabiła.

Varyjant 6: Polšča

Polski turystyčny «šenhien» taksama akazaŭsia ŭ śpisie ź nie samymi pierśpiektyŭnymi varyjantami.

— Mnohija pryvykli, što raniej u polskim pasolstvie stavili vizy pa narastajučaj: «adnarazoŭka», potym hod, try, piać. Zaraz, na žal, hetaja historyja skončyłasia. Jak i ŭ vypadku ź Vienhryjaj, usio maksimalna niepradkazalna: navat paśla trochhadovaj vizy mohuć dać adnarazovuju.

Tamu Polšča dla nas siońnia — heta absalutna nieapraŭdanaja historyja: doŭhi zapis, składanaja rehistracyja, doraha i ź niepraduhledžanym vynikam. My zaklikajem pierachodzić na inšyja krainy i pakidajem Polšču tolki dla tych, kamu sapraŭdy treba mienavita tudy — pa pracoŭnaj ci vučebnaj vizie. Dla dziełavych pajezdak i turyzmu lepš vybrać niešta inšaje.

Naprykancy samaje balučaje pytańnie: nakolki raspaŭsiudžanyja admovy?

— Kožny hod my nazirajem adnu tendencyju: čym bližej da zimy, tym bolš admovaŭ. Pa-pieršaje, u konsulstvaŭ da kanca hoda zakančvajucca ŭmoŭnyja kvoty na vydaču. Utryravana, kali treba vydać 10 tys. viz za hod, a da śniežnia ŭžo vydadziena 9,5 tys., kamuści prosta nie pašancuje.

Pa-druhoje, konsulstvy nie zaŭsiody vierać, što ŭ mižsiezońnie ludzi chočuć adkryć vizy dla pajezdki mienavita ŭ ich krainu i mienavita dziela turyzmu. Asabliva heta tyčycca hrekaŭ. Choć tam jość nie tolki plažy, ale i ekskursijka ŭ Afinach, i harnałyžnyja kurorty. Ispanija ŭ hetym płanie bolš łajalnaja: tam zaŭsiody možna pradumać adekvatny maršrut navat zimoj. Ryzyka admovaŭ zimoj pavialičvajecca va ŭsich pasolstvach, uklučajučy italjanskaje, — nie da vielizarnych ličbaŭ, ale takaja tendencyja jość.

Ale kali paraŭnoŭvać ź minułym hodam, to statystyka pa admovach u Ispanii i Hrecyi stała značna pryjemniejšaj — nie na kryšačku, a značna. My ŭ kampanii adznačajem adzinkavyja vypadki. Kali dva hady tamu ŭ Hrecyi pracent admovaŭ byŭ kala 30%, to ŭ hetym siezonie ich nievierahodna mała. Pa Ispanii ja, ščyra, navat nie pryhadaju admovaŭ.

Karotki vynik: kali treba atrymać vizu jak maha chutčej, aptymalnym varyjantam budzie Hrecyja. A kali na jak maha bolš doŭhi termin — Italija. Ale šmat što budzie zaležać ad vizavaj historyi.

Historyi ad čytačoŭ

Žurnalisty vyrašyli pahutaryć nie tolki ź vizavym ekśpiertam, ale i z turystami, jakija adkryvali vizu ŭ hetym hodzie. Historyi jość jak z natchnialnym finałam, tak i z davoli sumnym kancom.

Italija: «Novaja viza pačała dziejničać na nastupny dzień paśla zakančeńnia papiaredniaj»

Maryja da rašeńnia pytańnia ź vizaj padyšła hruntoŭna. Uvieś praces padačy na italjanski «šenhien» zaniaŭ u jaje amal hod.

— U nas da hetaha było niekalki italjanskich viz. Spačatku hadavaja — zapisvalisia na jaje jašče praz sajt, biez usialakich «žyvych čerhaŭ», i padavalisia prosta ŭ pasolstva. Tady vielmi ščodra davali hadavyja vizy, navat kali heta pieršaja italjanskaja i nie było paćvierdžanych pajezdak. Pa joj źlotali ŭ Italiju.

Nastupnuju vizu atrymali ŭžo na 2 hady. Zapisvalisia ŭ vizavy centr praz formu zvarotnaj suviazi z prośbaj vydzielić słot dla siamji z čatyroch čałaviek, pakolki trapić z hanka ŭ takim składzie było składana. Nam jaho vydzielili.

Tady ž zapisalisia ŭ «žyvuju čarhu» ŭ sšytak pad numaram 8000+. Vizavy centr uvioŭ sistemu, pry jakoj maleńkija numary pastupova pazbaŭlalisia mahčymaści padać dakumienty. Vosieńniu minułaha hoda našy 8000 paśpieli prajści. My skarystacca numarkom nie zmahli, pakolki viza dziejničała da žniŭnia 2025-ha, samym rańnim časam padačy była viasna.

Zastavałasia dva varyjanty: abo iści dziažuryć na hanak, abo premium-padača. Da kanca śniežnia ja vybrała druhi varyjant. Było tryvožna, bo treba było nie zapisacca zanadta chutka (inakš dali b daty na studzień-luty, a heta rana), ale i nie zanadta pozna, kab užo viasnoj być ź vizaj. U vyniku nam vydzielili datu dla padačy ŭ siaredzinie maja.

Tak, heta kaštavała lišnich 800 rubloŭ. Ale ŭ žyvoj čarzie my byli zapisanyja jak darosły + dzicia i darosły + dzicia, a heta nie harantyja taho, što z hanka prymuć usich u adnu padaču. A značyć, patrebnyja lišnija dakumienty i davieranaści adzin adnamu na dziaciej. Uvohule, ja vybrała pierapłacić i padacca siamjoj u premium-zale z cukierkami i napojami (uśmichajecca).

My prykładali paćviardžeńni pajezdki pa pieršaj hadavoj vizie i dźviuch pajezdak pa druhoj (kopii pasadačnych, imiannych čekaŭ, vypisak z kartaŭ z vydatkami i fota). Jak vynik — 3 hady ŭsim. Dzieciam papiarednie mianiała pašparty, kab im taksama dali vizu na 3 hady.

Naohuł, uvieś hety praces manitorynhu sposabaŭ zapisu dastatkova praciahły. Ja pačała pahłyblacca, vyvučać varyjanty, kali napieradzie byŭ jašče amal hod dziejańnia biahučaj vizy. Ale zatoje va ŭsioj siamji źjaviłasia viza, jakaja dziejničaje z nastupnaha dnia paśla zakančeńnia papiaredniaj. I my mahli płanavać pajezdki tak, jak nam zručna, a nie tak, jak dyktujuć umovy.

Ispanija: «Adpačynak zhareŭ, jak i žadańnie znoŭ padavacca na vizu»

U nastupnaj hieraini čas, naadvarot, byŭ mocna abmiežavany. Kab palacieć u adpačynak u mai, na ispanskuju vizu razam z maładym čałaviekam jana vyrašyła padacca ŭ siaredzinie lutaha.

— U majho maładoha čałavieka raniej byŭ italjanski «šenhien» na 3 tydni, ale jon pa im nie vyjazdžaŭ. U mianie — čysty pašpart, plus była admova pa vizie ŭ Hrecyju ŭ žniŭni 2024 hoda. Pakolki my nie ŭ šlubie, ahienctva papiaredziła, što nas mohuć zapisać na padaču dakumientaŭ u roznyja daty. Moj chłopiec padaŭsia ŭ pačatku sakavika i ŭžo ŭ siaredzinie krasavika atrymaŭ vizu terminam na 1 miesiac. Ja ž padavałasia paźniej — 24 sakavika, u minskim vizavym centry. Čas išoŭ, adpačynak nabližaŭsia, a moj pašpart usio nie viartaŭsia. My navat pieranieśli daty adpačynku, pačałasia lohkaja panika.

U pieršych čysłach maja my ŭžo razumieli, što treba niešta rabić: pisać, udakładniać, šukać pašpart. Ale ŭ Rasii jakraz byŭ razhar śviatočnych dzion. Na ŭsich aficyjnych resursach termin razhladu dakumientaŭ — da 45 dzion, i jon daŭno prajšoŭ. Suviazi ź miescam, dzie razhladajuć dakumienty, nijakaj. Minski vizavy centr pa telefonie adkazaŭ: «My prosta pieradajom dakumienty, na terminy razhladu paŭpłyvać nie možam. Čakajcie».

19 maja mnie patelefanavali ź minskaha vizavaha centra. Paviedamili, što z Maskvy zapytali novyja dakumienty: aktualnyja broni hatela i biletaŭ. Łahična, bo ŭsie terminy ŭžo prajšli: vizu my zapytvali z 10 maja. Na toj momant nam užo nie chaciełasia nijakich viz — tolki pajechać udvuch, niachaj navat u biaźvizavuju krainu. U vyniku svoj majski adpačynak my praviali ŭ Biełarusi ŭ čakańni pašparta. Ja atrymała jaho tolki 5 červienia — 74 dni biez pašparta! Viza była vydadziena mnie na 3 miesiacy z dazvolenym znachodžańniem u Šenhienskaj zonie 30 dzion.

Moj chłopiec tak nikudy i nie źjeździŭ pa svajoj vizie, jakaja skončyłasia ŭ jaho 10 červienia. Skazaŭ, što jon bolš pryncypova nie budzie padavacca na šenhienskuju vizu, budzie płanavać adpačynak u biaźvizavych krainach. A ja ŭsio ž taki źjeździła ŭ Jeŭropu! Ale stres, jaki my pieražyli ŭ mai, słovami nie pieradać. Kolki forumaŭ było pračytana, kolki listoŭ adpraŭlena, kolki zvankoŭ zroblena — i ŭ Minsk, i ŭ Maskvu. Viadoma, bolš vopytnyja padarožniki afarmlajuć dva pašparty: adzin padajuć na vizu, druhi pakidajuć sabie. Ale chto ž viedaŭ, što ŭsio moža tak zdarycca.

Jašče adna historyja pra ispanski «šenhien» — na hety raz sa ščaślivym finałam.

— U kancy maja ja źviarnułasia ŭ vizavaje ahienctva. Mnie dapamahli aformić dakumienty, zrabić broni. Było adčuvańnie, što infarmacyju časam treba vydzirać abcuhami. A jašče ŭźnikali prablemy ź videavieryfikacyjaj, pakolki na Android jana pracavała vielmi drenna, pastajanna zavisała i vylatała.

Vizu ja atrymała na 3 miesiacy — svoječasova, choć padavałasia ŭprytyk. Dla padačy jeździła ŭ Maskvu, pajezdku arhanizoŭvała ahienctva. Sami vizavyja zbory kaštavali kala 9 tysiač rasijskich rubloŭ (340 biełaruskich), ahienctvu ja zapłaciła 600 rubloŭ za asabistuju padaču, pry hetym na rachunak daviałosia pakłaści 12 000 biełaruskich rubloŭ (€3500).

Niekalki čałaviek napisali, što atrymali admovu ŭ ispanskaj vizie.

«Zaniaŭsia pytańniem u listapadzie. Źviarnuŭsia ŭ ispanski vizavy centr. Da hetaha vyjazdžaŭ u Francyju ŭ 2020 hodzie, ale zaraz pašpart novy. Płanavaŭ sapraŭdy pajechać u Ispaniju, a potym pa inšych krainach Jeŭropy. Dakumienty padaŭ 20 listapada, a 1 śniežnia pryjšoŭ pašpart z admovaj. U tłumačeńniach dva punkty: «Adsutnaść abhruntavańniaŭ mety i ŭmoŭ mierkavanaha znachodžańnia» i «Niedakładnaść padadzienaj infarmacyi, jakaja paćviardžaje metu i ŭmovy mierkavanaha znachodžańnia». Kažuć, što heta tamu, što niesiezon. Ale sumna 740 rubloŭ prosta na viecier adpraŭlać. Pasprabuju padać apielacyju, ale sumniavajusia, što heta štości vyrašyć. Kali znoŭ admova, budu aryjentavacca na inšyja krainy dla adpačynku. Bolš praz heta prachodzić nie chaču».

Hiermanija: «Rekordnaja vypiska pa rachunku była ŭ 100 listoŭ»

Nastupny hieroj vyrašyŭ pasprabavać udaču ŭ niamieckaj ambasadzie — i voś što z hetaha atrymałasia.

— Atrymlivaŭ vizu ŭ Niderłandy, u akiency niamieckaj ambasady adrazu papiaredzili, što ŭ apošnija dni terminy viz značna skaracili. Da hetaha ŭ mianie było dźvie italjanskija hadavyja vizy. Hetym razam dali na 3 miesiacy. Maje siabry z «sakavitymi» vypiskami pa rachunku (siamja z troch čałaviek) padavalisia na dzień paźniej — im vydali niamieckija vizy na miesiac.

Niemahčyma było nie aburycca tym, što ambasada patrabuje vypisku z banka z poŭnym rucham srodkaŭ za apošnija paŭhoda. Ja paškadavaŭ ajčynnyja drevy i prynios tolki bałans na adnoj staroncy — mianie raźviarnuli i prymusili pierarablać. U vyniku 20 listoŭ prosta ŭ śmietnicu, bo ambasadzie patrebien tolki pieršy list. Darečy, u banku raskazali, što rekordnaja vypiska była krychu bolš za 1000 listoŭ.

A jaho «kaleha» pa ambasadzie paśla doŭhaha čakańnia ŭvohule admoviŭsia ad idei atrymać vizu.

— Z žniŭnia 2024‑ha stajaŭ u čarzie na niamiecki «šenhien» pa zaprašeńni. Potym u žniŭni 2025‑ha pryjšła admova ŭ zapisie, ale praź niekatory čas usio ž dali paćviardžeńnie i pryznačyli padaču na druhuju pałovu listapada. Za dzień ja sam admoviŭsia, bo prachodzić praz usio heta i płanavać pajezdku ŭžo pierachaciełasia, tym bolš ź vialikaj vierahodnaściu atrymać vizu na mały termin. Chacia ŭ 2022 hodzie mnie vydali vizu na 2 hady.

Polšča: «Paŭhoda čakańniaŭ kaštavali nam $1200»

Niekatoryja sutyknulisia ź niesumlennaj «dapamohaj», jakaja tak ni da čaho i nie pryviała.

— Nam z žonkaj «pamahatarka» pradała i prysłała falšyvyja polskija zaprašeńni. Pry hetym jana nijak nie mahła zapisać nas na padaču. U vyniku ŭ žonki — admova ŭ čysty pašpart (pa pryčynie niesapraŭdnaści dakumientaŭ), a ja nie padavaŭsia. Paŭhoda čakańniaŭ kaštavali nam $1200. Viedaju, što takaja ž situacyja i ŭ inšych našych znajomych.

Bałharyja i Vienhryja: «Kab adkryć vizu na hod, daviałosia jechać u čaćviorty tur zapar»

A inšyja čytačy vyrašyli pasprabavać udaču z redkimi vizami: bałharskaj i vienhierskaj.

— Padavalisia na bałharskuju vizu z žonkaj pa adnym pakiecie dakumientaŭ 6 listapada. Paznačali vyjezd na svajoj mašynie, broni hatelaŭ byli ŭ paradku, jak i inšyja dakumienty. Pašparty atrymali 27 listapada: mnie vizu dali, žoncy — nie. U abhruntavańni byŭ paznačany punkt 12: niedastatkova padstaŭ daviarać asabistym dakumientam. My vykazali zdahadku, što sprava albo ŭ daviedcy z pracy, choć jana była zaśviedčanaja buchhałteryjaj, albo ŭ vypiscy z banka, choć hrošaj na rachunku było dastatkova.

U toj ža dzień my padali apielacyju. Praz sutki nas zapeŭnili, što možam pierapadacca ŭ paniadziełak, 1 śniežnia, i jakraz pad pajezdku z 3‑ha čysta razhledziać pašpart i mohuć pastavić vizu. U piatnicu, 28 listapada, my znoŭ atrymali ŭsie daviedki i vypiski, ale 29 listapada ŭviečary nam patelefanavała konsuł i skazała, što padavacca ŭ paniadziełak niama sensu, bo paskorana našy dakumienty nichto razhladać nie budzie. Kamientavać fakt admovy ŭ vizie žoncy i vydaču mnie jana nie stała.

U kancy — samaja matyvujučaja historyja z usich.

— Atrymali hadavy vienhierski «šenhien» u mai hetaha hoda. Praŭda, z čaćviortaj sproby. Da hetaha vienhry try razy adkryvali «adnarazovuju» pad daty pajezdki. Uvieś hety čas zakazvaŭ tury ŭ adnoj i toj ža kampanii.

• 0
• 0
• 0
• 0
• 1
• 2
• 0
• 0