Adkryćcio muzieja z kalekcyjaj zubroŭ prymierkavali da 86‑j hadaviny zasnavańnia Bresckaj vobłaści. Raźmiaściŭsia jon u Bresckim abłvykankamie.
Bresckaja vobłaść była ŭtvorana 4 śniežnia 1939 hoda. Na jaje ściahu namalavany zubr, jaki źjaŭlajecca adnym ź simvałaŭ Biełarusi. Piać hadoŭ tamu ŭ abłvykankamie ŭźnikła ideja stvaryć muziej u honar vołata. Pieršaj u kalekcyi stała fihurka zubra z celnaha kavałka lipy. Jaje pieradali rabotniki bresckaj fabryki suvieniraŭ. Inicyjatyvu padchapili, piša BIEŁTA.
Na dadzieny momant sabrana kala 250 ekspanataŭ. Bolšaja častka ź ich padorana kiraŭnictvu i žycharam Brestčyny pradstaŭnikami inšych rehijonaŭ našaj krainy, zamiežnych delehacyj, pradpryjemstvami, navučalnymi ŭstanovami. Niekatoryja statuetki šukali metanakiravana.
Fihurki zubroŭ vykanany z samych roznych materyjałaŭ. Pieravažnaja bolšaść ź ich zroblena z dreva — duba, lipy, biarozy, listoŭnicy, sasny i inšych parod. U ekspazicyi možna ŭbačyć zubroŭ sa stali, bronzy, farforu i fajansu, škła, lonu i voŭny, tkaniny, sałomy, kieramiki, burštynu, šakaładu i płastylinu.
Samy minijaciurny ekspanat vyšynioj kala 1 sm.
Kalekcyja papoŭniłasia ekskluziŭnymi statuetkami, zroblenymi rukami talenavitych žycharoŭ usich haradoŭ i rajonaŭ Bresckaj vobłaści. Techniki vykarystany samyja roznyja. Naprykład, zubr łuninieckich umielcaŭ vykanany z moranaha duba, jaki vyniaty z paleskich bałot, dzie pralažaŭ nie adzin dziasiatak stahodździaŭ.
Virtuozy z Łuninieckaha rajona ŭzialisia za jašče adzin ciažki ŭ apracoŭcy materyjał. Jany pieratvaryli kap (narast na biarozie) u fihurku čyrvanaknižnaj žyvioły. Majstar sa Stolinskaha rajona skulpturu zubra vysiek siakieraj z draŭlanaj čurki.
Svaju minijaciurnuju viersiju lasnoha vołata zrabili ŭ ivanaŭskaj škole bondarstva.
Małaryckija majstrychi sałamianaha zubra apranuli ŭ kaścium tradycyjnaha stroju svajho rajona.
Najmilejšym atrymaŭsia zubryk z płastylinu, jakoha źlapiła dzicia ź Biełaaziorska da abłasnych «Dažynak-2025».
Muziej raźmiaściŭsia na pieršym paviersie Bresckaha abłvykankama.
Ciapier čytajuć
Sakreta z kryŭdaj raskazaŭ, jak namieśnica kiraŭnika MZS Litvy addała pieravahu Cichanoŭskaj, a nie jamu3
Kamientary
Red., jak miła)