«Režym Biełarusi nie pieršy raz prydumlaje historyi». U Litvie prakamientavali historyju z dronam u Hrodnie
Biełaruś abvinavačvaje Litvu ŭ parušeńni pavietranaj prastory praz dron, jaki 30 listapada ŭpaŭ ŭ Hrodnie, a pierad tym nibyta raskidaŭ bieł-čyrvona-biełyja ściažki. U Litvie heta nazyvajuć prydumanaj historyjaj, piša LRT.
MZS Biełarusi nazvała hety vypadak «naŭmysnaj pravakacyjaj» i vyklikała časovaha pavieranaha ŭ spravach Litvy Erykasa Viłkaniecasa. Minsk patrabuje ad Litvy padać padrabiaznuju infarmacyju, pravieści rasśledavańnie i pryniać miery, kab padobnaje nie paŭtaryłasia.
U Litvie ž pradstaŭnik Nacyjanalnaha centra kiravańnia kryzisami Daryjus Buta nie kamientavaŭ, ci sapraŭdy było parušeńnie pavietranaj prastory, ale adznačyŭ, što
«režym Biełarusi nie pieršy raz prydumlaje historyi i abvinavačvaje zachodnija krainy i Litvu».
Pavodle jaho, sapraŭdnaja prablema — heta pahroza dla avijacyi i hramadstva z boku kantrabandnych pavietranych šaraŭ, jakija laciać z terytoryi Biełarusi.
U toj ža čas pradstaŭnica MZS Litvy Kryścina Bielikava zajaviła, što pra vyklik litoŭskaha dypłamata jany daviedalisia tolki sa ŚMI. Pa jaje słovach, dypłamat atrymaŭ aficyjnaje zaprašeńnie tolki praz hadzinu paśla taho, jak źjavilisia paviedamleńni ŭ publičnaj prastory.
Litva rasceńvaje dziejańni biełaruskaha režymu jak sprobu schavać svaju škodnickuju dziejnaść i zaklikaje Minsk spynić hibrydnyja ataki suprać krain ES, naležnym čynam kantralavać svaju terytoryju i pavietranuju prastoru, a taksama viarnuć niezakonna zachoplenuju majomaść litoŭskim hramadzianam i kampanijam.
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1919
Kamientary