U baročnym kaścioł Uniebaŭziaćcia Najśviaciejšaj Dzievy Maryi paśla dziesiacihodździa maŭčańnia arhana, stvoranaha bolš za stahodździe tamu vilenskim majstram, iznoŭ raźlilisia ŭ prastory jaho hłybokija, vieličnyja akordy.
Pra viartańnie da žyćcia arhana ŭ miascovym kaściole paśla praciahłaj restaŭracyi piša fejsbuk-supołka «Kataliki Biełarusi».
Arhan u kaściole, pabudavanym jašče ŭ 1646 hodzie pa fundacyi padkanclera litoŭskaha Kazimira Lva Sapiehi, byŭ stvorany ŭ 1911 hodzie vilenskim majstram Vacłavam Biarnackim.
Muzyčny instrumient, jakomu ŭžo bolš za stahodździe, vyłučajecca ŭnikalnaj dla Biełarusi kanstrukcyjaj rehistravaj traktury — pnieŭmatyčnaj šlajfładaj z uzmacnialnikami Barkiera.
Heta redkaja histaryčnaja sistema, kali vialikija miembrany pry dapamozie pavietra ŭklučajuć i vyklučajuć rehistry (tembry), — heta zusim nie charakterna dla arhanaŭ Biarnackaha i nie maje anałahaŭ u krainie.
Truby hałoŭnych rehistraŭ raźmieščany na praśpiekcie — fasadnaj častcy instrumienta, jakuju bačać ludzi ź nižniaha ŭzroŭniu chrama. Sam praśpiekt byŭ stvorany razam ź instrumientam i źjaŭlajecca standartnaj madellu №28 firmy August Laukhuff u styli rakako, jakaja idealna ŭpisałasia ŭ interjer kaścioła — nastolki ŭdała, što arhan kaliści pamyłkova datavali XVIII stahodździem.
Pieršym za kłavišy abnoŭlenaha arhana sieŭ majstar-arhanist Juryj Habruś. Zapis hučańnia apublikavała parafija razam z rajonnaj hazietaj.
Niadaŭna novy arhan źjaviŭsia jašče ŭ adnym katalickim chramie — kaściole Śviatoha Valancina ŭ Smalavičach.
Kamientary