Mužčyna ź Indyi straciŭ u vyniku katastrofy ŭ Saudaŭskaj Aravii 18 členaŭ svajoj siamji
35‑hadovy Sajed Rašyd niekalki dzion tamu raźvitaŭsia sa svajakami, kali jany jechali ŭ pałomnictva ŭ Saudaŭskuju Araviju. Jon i nie padazravaŭ, što bolš nikoli ich nie ŭbačyć. Ale ŭ vyniku jon straciŭ 18 členaŭ svajoj siamji ŭ vyniku aŭtakatastrofy kala horada Miedzina ŭ Saudaŭskaj Aravii, paviedamlaje Hindustan Times.
Siarod achviar katastrofy byli baćki Sajeda, čyhunačnik-piensijanier, 65‑hadovy Šajk Nasirudździn i 60‑hadovaja Achter Biehum. Taksama ŭ aŭtobusie siarod inšych byli jahony 38‑hadovy brat, 35‑hadovaja niaviestka, troje ich dziaciej i jašče bolš za dziasiatak inšych svajakoŭ.
Sajed Rašyd skazaŭ, što asabista pravodziŭ siamju ŭ aeraporcie horada Chajdarabada, kali jany vypravilisia ŭ pałomnictva. Jon uspomniŭ, jak pierakonvaŭ ich nie padarožničać razam, asabliva ź dziećmi.
«Ja i ŭjavić sabie nie moh, što baču ich u apošni raz. Prynamsi, niekatoryja ź ich vyžyli b, kali b pasłuchalisia», — skazaŭ jon.
Raniej stała viadoma, što nie mienš za 45 pałomnikaŭ ź Indyi zahinuli ŭ Saudaŭskaj Aravii ŭ avaryi z aŭtobusam. DTZ adbyłosia 17 listapada ranicaj niedaloka ad Miedziny: aŭtobus, jaki nakiroŭvaŭsia ź Mieki, sutyknuŭsia z dyzielnaj cysternaj, paśla čaho ŭspychnuŭ pažar.
U aŭtobusie było kala 46 pasažyraŭ, u tym liku 20 žančyn i 11 dziaciej. Pavodle papiaredniaj infarmacyi, tolki adzin čałaviek vyžyŭ, astatnija zahinuli na miescy.
Śledčyja orhany Saudaŭskaj Aravii vyśviatlajuć abstaviny avaryi. Pa papiarednich danych, pryčynami trahiedyi mahli stać techničnyja niaspraŭnaści i parušeńnie pravił pieravozki pasažyraŭ.
Ciapier čytajuć
Kaśmičnaja turystka Maryna Vasileŭskaja vyjšła zamuž za kasmanaŭta Navickaha? Jany nosiać piarścionki23
Kamientary