Novy hrafik BČ skasoŭvaje dva ciahniki ŭ Viciebskaj vobłaści. Biez čyhunki zastanucca i niekatoryja rajcentry
U kancy hoda Biełaruskaja čyhunka tradycyjna ŭvodzić novy hrafik ruchu ciahnikoŭ. I ŭ ciapierašnim «abnaŭleńni» pasažyraŭ čakajuć siurpryzy. Pra admienu ciahnika ź Lidy na Bieniakoni, jakaja pakidaje biez čyhunačnaha transpartu siarod inšaha rajcentr Voranava, užo pisałasia. Ale vyhladaje, što pad skaračeńnie trapili i inšyja rehijanalnyja rejsy, i jašče niekalki rajcentraŭ ciapier zastanucca biez čyhunačnaha ruchu. Blizko.by vyvučyŭ, dzie i što «parezali».
Hrodna i Lida
Vydańnie «Priniemanskije viesti» publikuje paviedamleńnie sa stancyi Lida Baranavickaha adździaleńnia BČ:
«Źmianiajecca maršrut ruchu ciahnika №610/609 Hrodna — Homiel — Hrodna».
Ciapier hety ciahnik jedzie z Hrodna ŭ Lidu, dalej u Baranavičy, Łuniniec i praz Paleśsie ŭ Homiel. Voś jaho maršrut.
Žurnalisty pravieryli raskład: pačynajučy z 14 śniežnia maršrut źmianiajecca, i paśla Mastoŭ ciahnik jedzie nie na paŭnočny ŭschod, u Lidu, a na paŭdniovy ŭschod, u Vaŭkavysk i dalej u Baranavičy. Ad Hrodna da Mastoŭ i ad Baranavičaŭ da Homiela dalejšy raskład supadaje ź ciapierašnim.
Taksama paviedamlajecca, što źjaviacca bieśpierasadačnyja vahony Hrodna — Minsk — Homiel, jakija iduć praź Lidu i Maładziečna. Miarkujučy pa ŭsim, jany buduć čaplacca da ciahnika №634 Hrodna — Kamunary. Takim čynam, z Homiela ŭ Hrodna možna budzie vyjechać z roźnicaj u paŭhadziny i pa roznych maršrutach: praz Baranavičy i Łuniniec albo praź Lidu i Minsk (i pryjazdžać z roźnicaj u 40 chvilin).
Miory i Druja
Na čyhunačnych forumach zaŭvažyli, što admianiajecca pryčapny vahon da Drui (litaralna na miažy z Łatvijaj). Ciapier heta taki vahon, jaki pierapryčaplajuć niekalki razoŭ, pakul jon nie dabiarecca da kančatkovaha punkta.
Spačatku vahon Minsk — Druja jedzie ŭ składzie ciahnika №625 Minsk — Viciebsk. U Kruleŭščynie jaho pieračeplivajuć da ciahnika № 619 Kruleŭščyna — Łyntupy, a ŭ Varapajevie farmujuć u samastojny ciahnik №617 Varapajeva — Druja.
Hladzim na kartu (nazvy niekatorych prypynkaŭ tut sastarełyja, ale vuzłavyja stancyi zastalisia tymi ž).
Hety ciahnik niaprosta znajści ŭ raskładzie na sajcie BČ: kali pa zvyčcy zadać dni kursiravańnia «ŭsie dni», to sistema moža pakazać, što takich ciahnikoŭ niama zusim: tak, ad Minska da Drui i ad Kruleŭščyny da Drui jany pakazvajucca, a ad Varapajeva — nie. Zahadka čyhunačnaj dzirki!
Ale varta paznačyć kankretnuju datu (a chodzić ciahnik hłybokaj nočču pa subotach i niadzielach) — to ciahnik mahičnym čynam źjaŭlajecca.
Dyk voś, paśla 13 śniežnia hety ciahnik całkam źnikaje z raskładu: apošniaje adpraŭleńnie ź Minska ŭ piatnicu 12-ha, z Kruleŭščyny i Varapajeva — u subotu 13-ha. I potym — usio: nie znajści miescaŭ ni ad Minska, ni ad Kruleŭščyny, ni ad Varapajeva.
Vierahodna, usialaki čyhunačny ruch źniknie na 89‑kiłamietrovym učastku ad Varapajeva na poŭnač sa stancyjami i prypynkami Huta, Šarkaŭščyna, Miory, Idołta i Druja.
Takim čynam biez čyhunki zastajucca adrazu dva rajcentry — Miory i Šarkaŭščyna.
Łyntupy i Pastavy
Narešcie, jašče adna «aptymizacyja». Na čyhunačnym forumie paviedamlajuć, što pryčapnoha vahona ad Łyntup da Viciebska taksama bolš nie budzie.
Ciapier hety maršrut pracuje tak: tut chodzić pasažyrski ciahnik №620 Łyntupy — Kruleŭščyna pa piatnicach, subotach, niadzielach i paniadziełkach — toj samy, da jakoha ŭ Varapajevie pryčaplajuć i vahony z Drui na Minsk. I voś u składzie ciahnika jość vahon, jaki ŭ Kruleŭščynie pieračaplajuć da ciahnika Minsk — Viciebsk, tak što možna bieź pierasadak źjechać z Łyntup i Pastaŭ prosta ŭ abłasny centr.
Ale paśla 13 śniežnia i hety pramy bieśpierasadačny vahon admianiajecca.
Bolš za toje, sajt BČ pakazvaje, što i ciahniki Łyntupy — Kruleŭščyna taksama całkam źnikajuć z raskładu paśla 13 śniežnia.
Ciapier, miarkujučy pa ŭsim, da zakrytych učastkaŭ dadaducca jašče dva.
U viosku na Hrodzienščynie bolš nie chodzić dyziel. Reakcyja čynoŭnikaŭ dabiła žycharoŭ
«U liście čyhunki ni słova praŭdy». Chłopca ź invalidnaściu pa zroku vysadzili ź ciahnika, choć u jaho biaspłatny prajezd
U Viciebsku chočuć pradać praz aŭkcyjon častku čyhunačnaha vakzała
Ciahniki na Maładziečna znoŭ pačnuć chadzić ź Minska-Pasažyrskaha
Kamientary