U sieradu ŭ čakańni rašeńnia ŭrada Litvy nakont adkryćcia dvuch pamiežnych kantrolnych punktaŭ ź Biełaruśsiu prezident Hitanas Naŭsieda skazaŭ, što nie mietearałahičnyja ŭmovy paŭpłyvali na toje, što fiksujecca mienš kantrabandnych šaroŭ ź Biełarusi.
Pavodle słoŭ kiraŭnika krainy, režym Alaksandra Łukašenki pryniaŭ dziejańni praź Litvu i jaje sajuźnikaŭ, piša Delfi.lt.
«Nam dachodzić infarmacyja, jakaja dazvalaje mierkavać, što inšy bok, usio ž taki, zrabiŭ peŭnyja kroki, kab heta dziejnaść, kali i nie była całkam spynienaja, to chacia b byŭ pasłany vielmi jasny sihnał», — skazaŭ Naŭsieda.
Kiraŭnik Litvy nie nadavaŭ vialikaj važnaści krytycy, jakaja hučała ŭ publičnaj prastory, što zakryćcio miažy nie było naležnym čynam padrychtavanaje i praz heta ŭ Biełarusi zatrymałasia bolš za tysiaču hruzavikoŭ z hruzami.
«Zaŭsiody znojducca ludzi, jakija buduć krytykavać luby krok abo rašeńnie ŭłady», — adznačyŭ Hitanas Naŭsieda.
Pavodle jaho słoŭ, vielmi važna, što Litva dziejničała z sajuźnikami, u pieršuju čarhu — Polščaj i ZŠA. Na dumku Hitanasa Naŭsiedy, asabliva važny vašynhtonski ŭpłyŭ, jaki, pavodle jaho słoŭ, pavinien byŭ zrabić uražańnie na Minsk.
I choć apazicyja Siejma prytrymlivajecca inšaj dumki, aceńvajučy ŭkład Litvy ŭ mabilizacyju padtrymki partnioraŭ pa hetym pytańni, pa mierkavańni prezidenta, mižnarodnaja dumka była aktyvavanaja.
«My zrabili heta svoječasova, i heta mieła ŭpłyŭ», — skazaŭ kiraŭnik krainy, dajučy zrazumieć, što sam z prezidentam Polščy, jaki adkryŭ pamiežnyja kantrolnyja punkty ŭ paniadziełak, nie razmaŭlaŭ.
«Heta nie pytańnie prezidenckaha ŭzroŭniu, heta pytańnie ŭradaŭ. I sapraŭdy takija kantakty byli, ja ich vitaju, bo polski bok va ŭsich vypadkach hatovy ščylna supracoŭničać ź Litvoj», — adznačyŭ jon.
Urad Litvy ŭ kancy kastryčnika zakryŭ da 30 listapada dva apošnija pierachody na miažy ź Biełaruśsiu: «Miedniki» i «Salečniki». Paśla taho, jak Polšča ŭ paniadziełak adkryła pamiežnyja pierachody «Kuźnica» i «Babroŭniki», Litva zadumałasia nad tym, kab miažu adkryć raniej. Učora Kamisija pa nacyjanalnaj biaśpiecy rekamiendavała ŭradu Litvy zrabić heta.
Ciapier čytajuć
Kaśmičnaja turystka Maryna Vasileŭskaja vyjšła zamuž za kasmanaŭta Navickaha? Jany nosiać piarścionki15
Kamientary