Majstar, jaki ŭznaviŭ kryž Jeŭfrasińni Połackaj, stvaraje ŭnikalnuju sieryju abrazoŭ dla kaściołaŭ Biełarusi
U siecivie źjaviŭsia novy pablik — pra sieryju z 12 «abrazoŭ-siaścior». Heta niezvyčajnyja dla Biełarusi ikony, jakija pakul jašče nie ŭsie vyrablenyja, bo praces stvareńnia kožnaj — u siarednim 6‑8 miesiacaŭ. Na hety momant hatovyja 7 likaŭ śviatych, piša Katolik.life.
Abrazy vyrablajucca z vykarystańniem techniki pieraharodkavaj emali, uklučajučy techniku staražytnavizantyjskaj emali. Asnoŭnymi materyjałami dla abrazoŭ źjaŭlajucca zołata, srebra, kaštoŭnyja i napaŭkaštoŭnyja kamiani.
Aŭtar unikalnych abrazoŭ — zasłužany mastak Biełarusi Mikałaj Kuźmič, jaki ŭ 1997 hodzie ŭznaviŭ znakamity kryž Jeŭfrasińni Połackaj.
Novyja abrazy z hetaj sieryi, pryznačanyja dla kaściołaŭ Biełarusi, niadaŭna błasłaviŭ kardynał Kłaŭdyjo Hudžeroci. A praz adzin abraz, jak śćviardžajecca, užo zdarylisia cudy.
Pieršy abraz ź sieryi — śviatoj Barbary, jakaja znachodzicca ŭ katalickim chramie ŭ Ružanach. Druhi — Maci Božaja Vaładarka Lasoŭ. Jon nie maje anałahaŭ i vyrableny śpiecyjalna dla kaścioła ŭ Pružanach.
Infarmacyi pra nastupnyja abrazy pakul niama, ale niekatoryja źviestki možna znajści na staroncy juvielirnaj halerei Mikałaja Kuźmiča i jahonaha syna Piatra.
Tam paviedamlajecca, što 25 kastryčnika padčas uračystaściaŭ u Pinsku prefiekt Dykasteryi pa spravach uschodnich cerkvaŭ u Vatykanie kardynał Kłaŭdyjo Hudžeroci błasłaviŭ novyja abrazy Kuźmičoŭ — śviatoha Mikałaja, śviatoj Vieraniki i Vastrabramskuju ikonu Božaj Maci (apošniaja — vierahodna, pa-za miežami hetaj sieryi). Hetyja ikony pryznačanyja dla novych chramaŭ Pinskaj dyjacezii.
Raniej byli stvoranyja abrazy śviatoha Kazimira, śviatoha Hubierta i Archanioła Michała.
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki15
Kamientary