Uładzimir Haściuchin, Mikałaj Burlajeŭ — nivodzin rasijski šavinist nie pajechaŭ ź fiestyvalu biez uznaharody.
Usie ŭžo zabyli, kali apošni raz zdymaŭsia mastacki film pa-biełarusku. Navat «Kupału», stužku pra biełaruskaha kłasika, z 2020 hoda tak i nie pakazali. Na fiestyvali «Listapad» u takich umovach daminavali filmy z krain z tatalitarnymi i aŭtarytarnymi režymami.
Hran-pry «Zołata Listapada» atrymaŭ rasijski film «Palaŭničy». Jaho źniaŭ režysior z Paŭnočnaj Asiecii Zaur Cahojeŭ.
Śpiecyjalny pryz Alaksandra Łukašenki prysudžany kitajskamu režysioru Čžan Čžunu, paviedamlaje BiełTA.
Cahojeŭ padziakavaŭ: «Heta dla nas nasamreč vielmi niečakana, ale i pryjemna. Pieramoha važnaja dla nas nie tolki jak dla maładych kiniematahrafistaŭ, ale i jak dla pradstaŭnikoŭ Paŭnočnaj Asiecii. Dla našaj respubliki heta budzie dobry matyvatar, kab raźvivacca ŭ mastactvie», — skazaŭ jon.
Śpiecyjalny pryz žury konkursu hulniavych filmaŭ atrymała kitajskaja kinakarcina «Viesiałość na bazary» (režysior Kielimu Abulizi), a pryz hladackich simpatyj — rasijski film «Moj dzied» (režysior Śviatasłaŭ Ułasaŭ). Adnak va ŭmovach tatalnych falsifikacyj, u jakich isnuje ciapier Biełaruś, ciažka skazać, ci vyniki hladackaha hałasavańnia na fiestyvali padličvali sumlenna.
Pryz «Za najlepšaje hukavoje (muzyčnaje) rašeńnie hulniavoha filma» prysudžany Manuelu Baryjosu i Eduarda Hansalesu za film «Ali Prymiera» (Vieniesueła).
Pryz za najlepšuju mužčynskuju rolu atrymaŭ vierny łukašenkaviec, narodny artyst Biełarusi Uładzimir Haściuchin za film «Moj dzied» (Rasija), a za najlepšuju žanočuju rolu — Śviatłana Kručkova za film «Dvoje ŭ adnym žyćci, nie ličačy sabaki» (Rasija).
Uładalnikam pryza za najlepšuju apieratarskuju rabotu imia Juryja Maruchina staŭ Marteza Kafury za film «Łaviec u žycie» (Iran), a za najlepšuju režysuru imia Michaiła Ptašuka — Krystyjan Pietcald za film «Adlustravańni №3» (Hiermanija).
U konkursie niehulniavych filmaŭ pieramožcam stała karcina «Mikita» (Rasija, režysiory Mikałaj Burlajeŭ, Dźmitryj Čarniacoŭ).
Śpiecyjalny pryz žury konkursu niehulniavych filmaŭ atrymała kinastužka «Ciotuchna Chu i jaje rajski sad» (Kitaj, režysior Pań Čžyci).
Najlepšym filmam konkursu animacyjnych stužak stała karcina «Kazka Iskrynki» (Rasija, režysior Anastasija Lis).
U naminacyi nacyjanalnych kinaškoł pieramahła kinastužka «Ale luboŭ ź ich bolšaja» (Rasija, režysior Kira Niemirovič-Dančanka).
Pryz za najlepšy film imia Viktara Turava ŭ konkursie «Kino maładych» atrymaŭ film «Bananavy sad» (Iran, režysior Reza Kiešavarz Chadad).
Lepšym niehulniavym filmam nacyjanalnaha konkursu stała kinakarcina «Žyćcio majo — «Charoški». Valancina Hajavaja» (Biełaruś, režysior Anžalika Novikava).
Pryz za najlepšy film konkursu karotkamietražnych filmaŭ atrymała kitajskaja kinakarcina «Sapsavanaja viasna» (režysior Ciu Juj), a dypłom «Pa vynikach hladackaha hałasavańnia» — film «I ciapier ja sastupaju» (ZŠA, režysior Rani DeMut).
Kamientary