Šakujučaje videa zabojstva ŭ rasijskim tyle dvuch mirnych žycharoŭ Ukrainy i ich sabaki pryviało da ŭzajemnych abvinavačvańniaŭ
Spačatku videa vykłali rasijskija Z-vajenkary, jakija dapuścili mahčymaść taho, što ŭkraincy jaho abvierhnuć. Tak i stałasia.
«Žachlivyja kadry: Nacysty zabivajuć mirnych žycharoŭ, jakija sprabujuć vyratavacca z-pad Kupianska» — pad takim zahałoŭkam učora ŭviečary ŭ telehram-kanale «Apieracyja Z: vajenkory Ruskaj Viasny» było raźmieščana videa. Na im bačna, jak pa darozie iduć dva čałavieki z sabakam.
Adzin ź ich idzie trochi napieradzie, jon trymaje ŭ ruce bieły ściah, jaki niemahčyma nie zaŭvažyć. Pobač biažyć bieły sabačka. Nad imi lataje FPV-dron, jaki ŭrešcie padryvaje i čałavieka, i sabaku.
Zatym pačynajucca novyja kadry, na jakich druhi čałaviek staić na kaleniach i chryścicca. U hety momant dron padryvaje i jaho.
Aŭtary kanała śćviardžajuć, što zabojstva adbyłosia ŭ Charkaŭskaj vobłaści na vychadzie z nasielenaha punkta Pietrapaŭłaŭka, jakaja znachodzicca na ŭschod ad Kupianska ŭ bok rasijskich pazicyj.
Paviedamleńnie chutka raźniesłasia pa inšych telehram-kanałach. Bolš videa było apublikavana ŭ kanale «Rybar». Praŭda, jak časta zdarajecca, infarmacyja stała patrochi źmianiacca.
Tak «Rybar» adznačyŭ, što «Pietrapaŭłaŭka — niapravilnaje miesca zdareńnia», a aŭtar telehram-kanała «Pazyŭny Brus» napisaŭ, što trahiedyja adbyłasia pa darozie z Kruhlakoŭki ŭ Bierastavoje ŭ Charkaŭskaj vobłaści. Nasielenyja punkty znachodziacca ŭ tyle rasijskich vojskaŭ.
Adno ź videa z podpisam «banderaŭcy-dranavody zabili babulu» raźmiaściŭ u svaim telehram-kanale Ryhor Azaronak.
Z-telehram-kanały i ŚMI pačali pradkazvać, što «praciŭnik zachoča ŭsio pieraviarnuć dahary nahami» i abvinavacić u hetym złačynstvie rasijan.
Siońnia videa ŭ svaim fejsbuku raźmiaściła adździaleńnie kamunikacyi 77‑j asobnaj aeramabilnaj Naddniapranskaj bryhady 7‑ha korpusa Desantna-šturmavych vojskaŭ USU.
«Na apublikavanych kadrach zafiksavana vajennaje złačynstva armii Rasii: 03.11.2025 hoda ŭ nasielenym punkcie Kruhlakoŭka Charkaŭskaj vobłaści vojski Rasii ździejśnili ŭdar bieśpiłotnikam pa hramadzianskich žycharach, jakija ruchalisia pa darozie pad biełym ściaham», —
napisali aŭtary. Jany taksama adznačyli, što pobač nie było nijakich vajennych abjektaŭ ci pazicyj. Udar byŭ naniesieny naŭmysna pa mirnych ludziach.
«Rasijskija akupanty naŭmysna ŭdaryli pa hramadzianskich, a potym sami źniali ataku, kab vykarystoŭvać kadry ŭ prapahandysckich materyjałach i abvinavacić Uzbrojenyja siły Ukrainy», — napisali aŭtary.
Na heta paviedamleńnie paźniej stali spasyłacca astatnija ŭkrainskija ŚMI.
Centr supraćdziejańnia dezinfarmacyi zajaviŭ, što Rasija ździejśniła cyničnuju apieracyju pad čužym ściaham i nazvała paviedamleńnie rasijan fejkam.
U svaju čarhu telehram-kanał Hienieralnaha prakurora Ukrainy paviedamiŭ, što Charkaŭskaja abłasnaja prakuratura pačała dasudovaje rasśledavańnie pa fakcie ździajśnieńnia vajennaha złačynstva, jakoje pryviało da hibieli ludziej.
Ciapier čytajuć
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ9
Kamientary