Na froncie zabili syna adnaho z samych niaŭdałych kamandziraŭ rasijskaj armii
Kali ŭ lutym 2022 hoda Arkadź Marzojeŭ adpraŭlaŭ svaich desantnikaŭ nastupać na Chierson i šturmavać aeraport Mikałajeva, za paru dzion zahinuła 76 ź ich. A kali Pucin daŭ Marzojevu orden, adzin ź jaho padnačalenych, «hieroj Rasii», zastreliŭsia.
Na akupavanaj terytoryi Zaparožskaj vobłaści zahinuŭ rasijski lejtenant Vasil Marzojeŭ — syn kamandujučaha 18‑j ahulnavajskovaj armijaj Paŭdniovaj vajskovaj akruhi hienierał-lejtenanta Arkadzia Marzojeva.
Jak zajaviŭ kiraŭnik Paŭnočnaj Asiecii Siarhiej Mianiajła, Vasil Marzojeŭ byŭ kamandziram raźviedvalnaha ŭzvoda 108‑ha parašutna-desantnaha pałka siomaj desantna-šturmavoj dyvizii.
Pry jakich abstavinach zahinuŭ Marzojeŭ — nieviadoma. Chutčej za ŭsio, jon trapiŭ pad abstreł.
Za «bajavyja zasłuhi» Vasil Marzojeŭ paśmiarotna pradstaŭleny da zvańnia hieroja Rasii.
Baćka Vasila — Arkadź Marzojeŭ — z 1992 hoda słužyŭ u śpiecnazie HRU ŭ Zakaŭkaźzi, byŭ udzielnikam dźviuch čačenskich vojnaŭ. Dasłužyŭsia da pasady kamandzira motastrałkovaha pałka 58‑j armii, jaki ŭ žniŭni 2008‑ha ŭdzielničaŭ u akupacyi Paŭdniovaj Asiecii.
Z 2014 hoda Marzojeŭ-starejšy — kamandzir 138‑j asobnaj hvardziejskaj motastrałkovaj bryhady Zachodniaj vajskovaj akruhi, jakaja ŭ 2014 hodzie brała ŭdzieł u vajnie z Ukrainaj na Danbasie.
U studzieni — lutym 2015 hoda bryhada pad kamandavańniem Marzojeva paniesła ciažkija straty ŭ bajach za Debalcava.
Paśla, pabyŭšy niekalki miesiacaŭ u kamandziroŭcy ŭ Siryi, pałkoŭnik Marzojeŭ u śniežni 2016 hoda staŭ hienierał-majoram.
Sa studzienia 2021 hoda hienierał-major Arkadź Marzojeŭ kamandavaŭ 22‑m armiejskim korpusam u Krymie — asnovaj suchaputnych sił na paŭvostravie.
Padčas uvarvańnia Rasii va Ukrainu ŭ 2022 hodzie jon byŭ adnym z kamandujučych paŭdniovaj hrupoŭkaj rasijskich vojskaŭ. Pavodle apoviedaŭ padnačalenych, apublikavanych Bi-bi-si ŭ červieni 2023 hoda, 24 lutaha 2022 hoda Marzojeŭ adpraviŭ desantnikaŭ 247‑ha pałka nastupać na Chierson, zapeŭniŭšy aficeraŭ, što raźviedka praviedzienaja i trasa na horad volnaja. Adnak u vyniku vajskoŭcy trapili ŭ zasadu USU i panieśli krytyčnyja straty.
Praz dva dni situacyja paŭtaryłasia: hetym razam desantniki sprabavali šturmavać aeraport Mikałajeva, padčas čaho ŭsiaho za dva dni 247‑y desantna-šturmavy połk straciŭ 76 čałaviek zabitymi i kala 140 paranienymi.
Marzojeŭ-starejšy ŭ lutym — sakaviku 2022 hoda ŭznačalvaŭ nastup na Mikałajeŭ. Na podstupach da horada połk pad kamandavańniem Marzojeva trapiŭ u akružeńnie i byŭ razhromleny.
U lutym 2023 hoda rasijski Z-błohier «Trynaccaty» abvinavačvaŭ Marzojeva taksama ŭ tym, što toj, choć i viedaŭ pra adychod rasijskich vajskoŭcaŭ z Chiersona, nie arhanizavaŭ padrychtoŭku abarony astravoŭ na Dniapry: «Adzin tolki Paciomkin vostraŭ čaho kaštuje, kolki tam chłopcaŭ zahinuła».
U śniežni 2022 hoda Arkadziu Marzojevu było prysvojena zvańnie hienierał-lejtenanta.
U červieni 2023 hoda Marzojeŭ atrymaŭ ad Pucina orden Alaksandra Nieŭskaha. U hety ž dzień zastreliŭsia jaho były padnačaleny, hieroj Rasii pałkoŭnik Dźmitryj Lisicki. Heta jaho połk byŭ raźbity pad Chiersonam, kali vykonvaŭ zadańnie Marzojeva.
U žniŭni 2023 hoda Marzojeŭ byŭ pryznačany kamandujučym 18‑j ahulnavajskovaj armijaj.
Darečy, u siamji Marzojevych heta nie pieršaje zvańnie hieroja Rasii paśmiarotna. Namieśnik kamandujučaha 58‑j armii Stanisłaŭ Marzojeŭ — brat Arkadzia i, adpaviedna, dziadźka Vasila, — atrymaŭ heta zvańnie ŭ 2002-m, kali jaho viertalot źbili čačency.
Ciapier čytajuć
Biaspałaŭ namalavaŭ ludziej sa ściahami ŭ centry Minska i adpraviŭ fota ŭ milicyju. Źjechalisia try mašyny ź mihałkami39
Kamientary
davoli trapnaje supadzieńnie