Sustreča dziaržsakratara ZŠA Marka Rubia i ministra zamiežnych spraŭ Rasii Siarhieja Łaŭrova adkładzienaja, prynamsi pakul što, paviedamlaje CNN sa spasyłkaj na pradstaŭnika Biełaha doma.
Adna z krynic taksama paviedamiŭ, što paśla telefonnaj razmovy Rubia z Łaŭrovym aficyjnyja asoby ličać, što pazicyja RF niedastatkova prasunułasia dalej svajho maksimalisckaha kursu (što datyčycca pytańnia Ukrainy).
Taksama krynicy paviedamili, što Rubia naŭrad ci budzie rekamiendavać praviadzieńnie sustrečy Pucina i Trampa na nastupnym tydni.
U toj ža čas, pavodle słoŭ krynicy, dziaržsakratar ZŠA i kiraŭnik MZS RF mohuć iznoŭ pahavaryć na hetym tydni.
Tym časam Siarhiej Łaŭroŭ zajaviŭ, što Rasija hatovaja da supracoŭnictva z krainami Zachadu i Jeŭropy tolki pry ŭzajemnym žadańni, paviedamlaje kramloŭski telehram-kanał «Puł №3».
«Nam kažuć, što my adharodžvajemsia. Heta nie tak. Kali b usio było sumlenna, to i sport, i mastactva byli b pa-za palitykaj. Ale ž tam zabaraniajuć hastroli našych vialikich muzykantaŭ, opiernych vykanaŭcaŭ tolki tamu, što jany z Rasijskaj Fiederacyi. Nie było b ščaścia, dy niaščaście dapamahło», — skazaŭ ministr.
Łaŭroŭ zajaviŭ taksama, što Rasija nie pakinuła svaich suajčyńnikaŭ va Ukrainie «na volu losaŭ, što vyznačajucca Zachadam, my jašče i zrazumieli canu ŭsiaho taho, što Zachad nam «prapanoŭvaŭ», i nakolki «nadziejnym» partnioram jon źjaŭlajecca».
«My z adkrytymi abdymkami hatovy supracoŭničać z usimi, chto budzie rabić heta na asnovie raŭnapraŭja, uzajemnaj pavahi, a nie šlacham dyktatu. A kali nam kažuć, maŭlaŭ, «tak i być, siudy my vas zaprašajem», «tut možacie ściah padniać, a tut nijakaha himna nie budzie», to heta źnievažalna. Ale ja ŭsio roŭna razumieju spartoŭcaŭ, jakija jeduć i pieramahajuć. Jany hodna siabie pavodziać. Heta nie ich vina», — dadaŭ jon.
Kamientary