Biełarus sprabavaŭ ujechać u Litvu na mašynie z roznymi numarnymi znakami i roznymi techpašpartami
U noč na niadzielu litoŭskija pamiežniki, što pracujuć u punkcie propusku «Miedniki» (sumiežny biełaruski — «Kamienny Łoh»), nie ŭpuścili ŭ ES 45‑hadovaha biełarusa, jaki jechaŭ na Renault Master z kirhizskimi numarami.
Mužčyna siarod inšych dakumientaŭ pakazaŭ techpašpart na aŭtamabil, nibyta vydadzieny ŭ Kyrhyzstanie, i jon akazaŭsia padroblenym, piša av.by.
Bolš za toje, pry ahladzie mašyny było znojdziena jašče adno paśviedčańnie ab rehistracyi transpartnaha srodku. Jaho rascanili jak častkova falšyvaje: u raździele «Katehoryja transpartnaha srodku» słova «hruzavoje» akazałasia zamieniena na «mikraven».
Ale i heta jašče nie ŭsio. Pamiežniki vyjavili treci techpašpart, i ŭ im zapis pra katehoryju transpartu ŭvohule byŭ vydaleny.
Taksama vyśvietliłasia, što aryhinalny kirhizski rehistracyjny znak byŭ prymacavany tolki zzadu aŭtamabila. Unutry mašyny lažaŭ jašče adzin, taksama sapraŭdny. A śpieradu aŭto visieŭ numar, jaki nie adpaviadaŭ ustanoŭlenamu ŭzoru.
U suviazi z hetym byŭ składzieny pratakoł ab administracyjnym pravaparušeńni, i biełarusu vypisali štraf u pamiery 120 jeŭra. Mužčyna pryznaŭsia ŭ pakupcy padroblenych numarnych znakaŭ, a taksama pradjaviŭ supracoŭnikam litoŭskaj słužby VSAT try pašparty, vydadzienyja na jaho imia i sapraŭdnyja da 2034—2035 hadoŭ. Adzin ź ich akazaŭsia anulavanym, choć u im stajała sapraŭdnaja viza.
Pamiežnikam kiroŭca paviedamiŭ: u Litvu jon jechaŭ, kab naviedacca da siabra.
U ŭjeździe ŭ krainu mužčynu, viadoma, admovili. U jaho kanfiskavali dva padroblenyja techpašparty i falšyvyja numary, a sam jon na Renault viarnuŭsia ŭ Biełaruś.
Ciapier čytajuć
Jak u halečy śpivałasia radnia Łukašenki? Małaviadomyja fakty46
Kamientary