Biełaruska vyrašyła zhaniać na elektrakary ź Minska ŭ Sankt-Pieciarburh. I ŭsio pajšło nie tak

Historyja vizažystki Śviatłany ź Minska ŭ pieršuju čarhu pra toje, što niemahčyma idealna spłanavać vandroŭku za miažu, kali ty nie čytaješ naviny.

Žančyna raskazała ŭ tyktoku, što vyrašyła z mužam pajechać da siabroŭ u Sankt-Pieciarburh. Jechać płanavali na elektrakary. Žančyna spampavała ŭsie dadatki zaradnych kampanij u Rasii i zarehistravałasia tam, skarystaŭšysia numaram rasijskaj siabroŭki (bo ź biełaruskaj simkaj zrabić heta było niemahčyma). Raźličvała jana padčas pajezdki karystacca roŭminham ad A1.

Maršrut byŭ taki: Minsk — Połack — Pskoŭ — Picier. Na terytoryi Biełarusi ŭsio išło cudoŭna. Siamja padzaradziłasia ŭ Połacku i pajechała dalej. A voś na terytoryi Rasii adrazu pačalisia siurpryzy:

«Jak tolki my vyjechali ź Biełarusi, A1 nam prosta adklučyŭ usiu sotavuju suviaź. U nas nie było suviazi zusim, nie havoračy pra internet. Nijaki roŭminh, jaki ŭ nas pavinien byŭ być, u nas nie zdaryŭsia. Dobra, što da hetaha my spampavali afłajn-karty, i da Pskova dajechali ŭžo pa ich».

Nahadajem, što z pačatku kastryčnika ŭ biełarusaŭ u Rasii ŭ pieršyja sutki paśla padklučeńnia da rasijskaj mabilnaj sietki nie pracuje mabilny internet i SMS. Takuju błakiroŭku ŭviali rasijskija apieratary pa rasparadžeńni ŭładaŭ. Pryčyna abmiežavańnia — baraćba z dronami, što mohuć vykarystoŭvać SIM-karty dla suviazi ź internetam i naviadzieńnia na celi.

Śviatłana s mužam spadziavałasia vyrašyć prablemu prosta: nabyć rasijskuju sim-kartu. Ale ž heta taksama ŭžo niemahčyma: sioleta ŭ studzieni ŭ Rasii ŭnieśli źmieny ŭ zakon ab suviazi. Z 1 lipienia biełarusy, jakija nie majuć rehistracyi ŭ Rasii (chacia b časovaj), nie mohuć nabyć simku.

Pavialičyć

«Šmat dzie jość biaspłatny haradski vaj-faj. Ale kab u im zarehistravacca, tabie patrebny rasijski numar telefona, na jaki pryjdzie SMS z kodam. Pačałasia voś hetaja historyja «źviarnisia pa dapamohu da minaka». Adna žančyna dapamahła i praz svoj numar telefonu padklučyła moj telefon da vaj-faja. Pakolki Pskoŭ — heta pamiežny horad, tam lotajuć drony, tam hłušać internet. Dźvie zaradnyja stancyi znachodziacca ŭ centry horada. U centry horada internetu niama ŭvohule», — narakaje Śviatłana.

Tamu padklučycca da zaradki praz mabilny dadatak nie atrymałasia. Ratavać na hety raz uziaŭsia mužčyna, jaki jakraz zaradžaŭ svaju mašynu. Jość opcyja, kab słužba padtrymki padklučyła da zaradki dystancyjna — znoŭ ža, praz mabilny numar telefona. Mužčyna patelefanavaŭ u słužbu padtrymki i pasprabavaŭ dapamahčy biełarusam padklučycca.

«Kłas!» — padumali my i krychu rassłabilisia. Padklučylisia my da zaradnaj stancyi, padtrymka sprabuje jaje zapuścić — i zapusk nie adbyvajecca, jana prosta vyklučajecca. I tak my sprabavali, moža, razoŭ 20. Ničoha ŭ nas nie atrymałasia» — raspovied Śviatłany pra ich pryhody nasamreč padobny da trahikamiedyi.

U Pskovie, adznačaje Śviatłana, usiaho dźvie stancyi, i ŭ adnoj ź ich u pryncypie nie pracuje port, jaki maje jaje aŭtamabil. A voś da druhoj padklučycca nie atrymałasia. Praź niekalki hadzin žančyna z mužam amal zhubili nadzieju.

Jany znajšli adziny ŭ Pskovie hatel, jaki maje pavolnuju zaradku, i zastalisia ŭ im nočyć, pakul mašyna zaradžałasia.

@svetlana.novikk

a vy by risknuli?

♬ orihinalnyj zvuk - Śvieta Novik

— Zaradnych stancyj vielmi mała. My budavali maršrut śpiecyjalna praź ich. I ŭ samim Sankt-Pieciarburhu ich nie tak užo i šmat. My jechali da siabroŭ u pryharad Piciera — tam na vializny rajon adna pavolnaja zaradka. U nas navat kali ŭziać jaki Słuck, marudnych zaradak štuk piać.

Nazad u Biełaruś Śviatłana z mužam pajechała ŭžo nie praz Pskoŭ, a praź inšy rasijski horad z nadziejaj, što budzie lepš. Kaža, tam atrymałasia zaradzicca biez prablem, ale heta kaštavała 60 kiłamietraŭ žvirovaj darohi paśla.

• 1
• 1
• 66
• 25
• 2
• 0
• 1
• 0