Zakryćcio pavietranaj prastory Litvy na miažy ź Biełaruśsiu padoŭžyli da śniežnia
Pavietranaja prastora Litvy nad častkaj terytoryi, što prymykaje da miažy ź Biełaruśsiu, zastajecca zakrytaj jak minimum da 1 śniežnia. Pra heta paviedamili ŭ litoŭskaj armii, piša BNS.
Abmiežavańnie było ŭviedziena 21 žniŭnia i pieršapačatkova płanavałasia, što jano budzie dziejničać tolki da kastryčnika. Pryčyna — pahroza biaśpiecy, u tym liku ryzyki dla cyvilnaj avijacyi, źviazanyja z parušeńniami pavietranaj prastory bieśpiłotnikami.
Ministarka abarony Litvy Davile Šakalenie adznačyła, što zakryćcio budzie dziejničać, pakul nie nabudzie moc novy zakanadaŭčy paradak, jaki dazvolić hałoŭnakamandujučamu apieratyŭna zakryvać patrebnyja zony pavietranaj prastory. Ciapier praciahvajecca praca nad praktyčnaj realizacyjaj: stvarajucca nieabchodnyja techničnyja rašeńni, ałharytmy i sistemy.
Na minułym tydni Siejm pryniaŭ papraŭki, jakija dazvalajuć vojsku chutčej i praściej niejtralizavać bieśpiłotniki, što ŭjaŭlajuć pahrozu, a taksama pry nieabchodnaści źviartacca da avijacyjnych słužbaŭ z patrabavańniem nieadkładna abmiežavać paloty ŭ asobnych zonach.
Hetyja źmianieńni źviazanyja ź incydentami letam, kali ŭ pavietranuju prastoru Litvy ŭvarvalisia dva rasijskija bieśpiłotniki typu Gerbera, adzin ź jakich nios vybuchoŭku.
Kamientary