Na vybarach u Małdovie pieramahła prajeŭrapiejskaja partyja prezidenta Sandu, prarasijskaja apazicyja prajhrała

Kali było padličana kala 97% hałasoŭ, partyja «Dziejańnie i salidarnaść» (PAS) nabirała 49,7%, što daje joj 54 z 101 miesca ŭ parłamiencie. Heta, praŭda, mienš, čym było ŭ PAS u minułym składzie parłamienta — 61 deputat, piša Bi-bi-si.

Jašče adna prajeŭrapiejskaja palityčnaja arhanizacyja, błok «Alternatyva», atrymaje, pavodle papiarednich danych, vosiem mandataŭ.

Prarasijski «Patryjatyčny błok», pavodle padlikaŭ małdaŭskaj centralnaj vybarčaj kamisii, sabraŭ kala 24,5% hałasoŭ, što daje jamu 27 deputackich miescaŭ. U «Patryjatyčny błok» uvachodziać Partyja sacyjalistaŭ na čale z eks-prezidentam Iharam Dadonam, Partyja kamunistaŭ na čale ź inšym byłym prezidentam, Uładzimiram Varoninym, a taksama partyja «Budučynia Małdovy» eks-premjera (u 2011—2008 hh.) Vasile Tarleva.

Akramia hetych troch palityčnych sił, u parłamient prachodziać jašče dźvie partyi: «Demakratyja doma» nacyjanał-kansiervatara Vasile Kaściuka, jaki vystupaje za abjadnańnie Małdovy z Rumynijaj, a taksama «Naša partyja» papulista Renata Usataha.

«My nie aženimsia ni z ruskimi, ni z PAS», — zajaviŭ Usaty na pres-kanfierencyi paśla zakryćcia vybarčych učastkaŭ.

Vybary prachodzili pa partyjnych śpisach, dla pieraadoleńnia barjera partyi treba było nabrać nie mienš za 5% hałasoŭ, błoku — nie mienš za 7%.

Padčas kampanii było šmat skandałaŭ i ŭzajemnych abvinavačańniaŭ ułady i apazicyi ŭ padrychtoŭcy falsifikacyj. Niezadoŭha da dnia hałasavańnia byli zatrymanyja dziasiatki ludziej, jakich abvinavacili ŭ tym, što jany prachodzili padrychtoŭku da arhanizacyi masavych biesparadkaŭ.

Jašče z prezidenckaj kampanii minułaha hoda ŭ krainie hučali abvinavačańni ŭ bok abvieščanaha ŭ vyšuk biznesoŭca Iłana Šora, jaki chavajecca ŭ Rasii. Niezaležnyja rasśledavalniki i pradstaŭniki ŭrada prama zajaŭlali, što tak zvanaja «sietka Šora» z dapamohaj pramoha podkupu kantralavała dziasiatki tysiač vybarcaŭ.

Lidar prarasijskaha błoka Ihar Dadon na toj padstavie, što partyja Mai Sandu nie atrymała absalutnuju bolšaść hałasoŭ, zajaviŭ, što apazicyja vyjhrała — niahledziačy na toje, što inšyja apazicyjnyja partyi, jakija prajšli ŭ parłamient, nie padzialajuć jaho pohladaŭ.

Dadon zaklikaŭ svaich prychilnikaŭ u paniadziełak dniom vyjści na mitynh kala parłamienta, «kab abaranić našu pieramohu», a ŭžo ŭviečary niadzieli Dadon i Tarleŭ sa svaimi prychilnikami vyjšli pratestavać da budynka Centralnaj vybarčaj kamisii.

• 20
• 2
• 1
• 2
• 0
• 0
• 0
• 2