Navukoŭcy praanalizavali 100 tysiač ekzamienaŭ i vyznačyli najlepšy čas dla ich zdačy

Jak piša Science Daily, zhodna z novym daśledavańniem italjanskich navukoŭcaŭ, studenty, jakija zdajuć vusnyja ekzamieny pamiž 11-j i 13-j hadzinami, majuć istotna bolš šancaŭ na pośpiech.

Dla taho, kab pryjści da takich vynikaŭ, navukoŭcaŭ praanalizavali źviestki z bazy danych Univiersiteta Miesiny ab vynikach ekzamienaŭ, praviedzienych z kastryčnika 2018 pa luty 2020 hoda. Analizavaŭsia čas, data i acenka bolš 100 000 indyvidualnych adkazaŭ na ekzamienach, jakija praviali 680 ekzamienataraŭ pa 1243 roznych kursach.

Uličvałasia taksama kolkaść kredytaŭ, jakija student atrymlivaŭ za kožny vučebny kurs, jak pakazčyk składanaści ekzamienu. Heta dazvoliła daśledčykam uličyć roźnicu ŭ ciažkaści ekzamienaŭ i vyklučyć hety faktar z analizu.

Vyjaviłasia, što stanoŭčuju adznaku atrymlivali tolki 57% studentaŭ.

Pracent pośpiechu źmianiaŭsia ŭ zaležnaści ad času: jon mieŭ formu vyhnutaj kryvoj z vyraznym pikam apoŭdni.

Niezaležna ad taho, zdavaŭ student u 11:00 ci ŭ 13:00, vyniki byli prykładna adnolkavyja. A voś kali ispyt pačynaŭsia ranicaj (naprykład, u 08:00 abo 09:00) ci ŭžo ŭ druhoj pałovie dnia (u 15:00 abo 16:00), šancy zdać byli značna nižejšyja.

Čamu tak adbyvajecca?

Jak adznačajuć aŭtary, choć ich daśledavańnie i nie vyznačyła dakładnyja miechanizmy hetaj tendencyi, najbolšaja kolkaść stanoŭčych adznak u siaredzinie dnia moža być patłumačana niekalkimi abstavinami.

Pa-pieršaje, raniejšyja navukovyja pracy śviedčać, što ŭ pieršaj pałovie dnia razumovaja pradukcyjnaść pastupova pavialičvajecca, a paśla abiedu źnižajecca.

Heta moža aznačać, što z nabližeńniem viečara studenty chutčej stamlajucca, stračvajuć kancentracyju i pakazvajuć horšyja vyniki. A vykładčyki, u svaju čarhu, mohuć pakutavać ad stomlenaści ad pryniaćcia rašeńniaŭ, što pryvodzić da bolš strohich acenak.

Pa-druhoje, słabiejšyja vyniki ranicaj taksama mohuć być źviazanyja z roznymi chranatypami studentaŭ i vykładčykaŭ.

Maładyja ludzi, asabliva ŭ 20-hadovym uzroście, zvyčajna źjaŭlajucca «sovami», u toj čas jak vykładčyki va ŭzroście za 40 u bolšaści «žavaranki». U vyniku studenty mohuć traplać na ekzamien u toj momant, kali ich mozh jašče nie pracuje na poŭnuju moc, a vykładčyki — jakraz najbolš uvažlivyja.

Kab źmiakčyć upłyŭ času dnia, aŭtary rajać studentam sačyć za jakaściu snu, paźbiahać prachodžańnia ekzamienaŭ u hadziny svajoj nizkaj aktyŭnaści i davać sabie mahčymaść adnavić kancentracyju pierad ekzamienami.

Navučalnym ustanovam rajać razhledzieć mahčymaść bolš poźniaha pačatku ispytaŭ. Heta moža pavysić šancy studentaŭ na pośpiech.

Važnaść vynikaŭ u bolš šyrokim kantekście

Adzin z suaŭtaraŭ, prafiesar Alesija Avienanci z Bałonskaha ŭniviersiteta, adznačaje:

«Hetyja vysnovy majuć šyroki śpiektr nastupstvaŭ. Jany padkreślivajuć, jak bijałahičnyja rytmy, jakija časta ihnarujucca ŭ kantekście pryniaćcia rašeńniaŭ, mohuć nieprykmietna, ale mocna ŭpłyvać na toje, jak aceńvajuć čałavieka ŭ adkaznych situacyjach».

Navukoŭcy miarkujuć, što ich vysnovy mohuć być aktualnyja nie tolki dla adukacyi, ale i dla inšych śfier, dzie vynosicca subjektyŭnaja acenka — naprykład, pry pryjomie na pracu abo navat u sudzie.

Raniejšyja daśledavańni ŭžo pakazvali, što sudździ čaściej vynosiać spryjalnyja rašeńni paśla pierapynku na ježu — ciapier ža jość danyja, što padobny efiekt isnuje i ŭ navučańni.

Aŭtary padkreślivajuć, što niahledziačy na ŭlik składanaści ekzamienaŭ, jany nie mieli dostupu da indyvidualnych danych, takich jak zvyčki snu, stresavaja nahruzka ci chranatyp kankretnaha studenta abo vykładčyka. Tamu jany zaklikajuć praciahnuć pracu z ulikam fizijałahičnych i pavodzinskich paramietraŭ, kab vyjavić asnoŭnyja miechanizmy, jakija ŭpłyvajuć na atrymany vynik.

• 3
• 0
• 1
• 0
• 1
• 0
• 0
• 0