Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada
U amierykanskaha śpievaka Džejsana Deruła — ahramadnaja aŭdytoryja. U instahramie i jutubie jon maje pa 40 miljonaŭ padpisčykaŭ. Siońnia ŭ telehram-kanale biełaruskaha ŭrada źjaviłasia videa, što jon pryjechaŭ u Biełaruś i sam premjer-ministr Alaksandr Turčyn pravodzić jamu ekskursiju pa Domie ŭrada.
Vitajučy niezvyčajnaha hościa, Turčyn adznačyŭ pośpiechi ŭ muzyčnaj karjery artysta i ŭražvalnuju kolkaść płacinavych dyskaŭ.
«Tak, na praciahu apošnich 16 hadoŭ ja budavaŭ svaju muzyčnuju karjeru», — paćvierdziŭ Džejsan Deruła i padziakavaŭ za mahčymaść hetaj sustrečy, jakaja dla jaho, maŭlaŭ, vialiki honar.
Alaksandr Turčyn zaprasiŭ hościa ŭ zału, dzie adbyvajucca sustrečy ź mižnarodnymi delehacyjami. Jon pacikaviŭsia, jakoje ŭražańnie na muzykanta zrabiŭ Minsk.
«Ja b chacieŭ zrabić hetaje miesca svaim domam», — z uśmieškaj adkazaŭ artyst.
«Mnie vielmi padabajucca ludzi tut. Usie staviacca vielmi pavažliva. Kali ja hulaŭ pa horadzie, usie vietliva padychodzili, prasili zrabić fota. Vielmi pryjemnaje ŭražańnie ad ludziej. Ježa vielmi smačnaja: usio, što ja tut sprabavaŭ, vielmi spadabałasia», — dadaŭ jon.
Deruła zapeŭniŭ, što heta nie apošni jahony vizit u Biełaruś, u jakuju jon pryjechaŭ z čatyrochhadovym synam.
«Kali vy vyrašycie nabyć dom — my hatovyja dapamahčy», — padkreśliŭ Alaksandr Turčyn.
Muzykant taksama vykazaŭ žadańnie padzialicca svajoj tvorčaściu ź biełarusami. Alaksandr Turčyn i Džejsan Deruła abmierkavali mahčymaść arhanizacyi kancerta ŭ kancy vieraśnia.
Džejsan Deruła — amierykanski śpiavak, aŭtar piesień, akcior, muzykant i tancor. Za čas svajoj karjery artyst zdabyŭ papularnaść u ZŠA, a taksama ŭ krainach Amieryki i Jeŭropy.
Raniej paviedamlałasia, što śpiavak Džejsan Deruła 26 i 28 vieraśnia vystupić z kancertami ŭ Maskvie i Sankt-Pieciarburhu.
Ciapier čytajuć
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ75
Kamientary