Žychar Barysava napisaŭ skarhu ŭ kinaprakat z-za nazvy filma, jakaja ŭviała ŭ zman
Zvyčka ruskamoŭnych łakalizataraŭ prydumlać novyja nazvy filmaŭ zamiest aryhinalnych daŭno ŭžo pieratvaryłasia ŭ miem: čaho tolki vartyja biaskoncyja «sikveły» «Astrała» abo čarhovaja «Jašče niejkaja bratva». U pahoni za pryciahnieńniem uvahi ŭžo mała chto dumaje, što takija vykrutasy mohuć i praŭda ŭvieści ŭ zman i sapsavać kamuści pachod u kino — heta i adbyłosia niadaŭna z žycharom Barysava, piša Onliner.by.
3 lipienia Uładzimir razam z žonkaj i synam pajšoŭ u kinateatr «Kastryčnik» na pakaz filma «Hulnia ŭ kalmara: Pierazahruzka». Mužčyna raźličvaŭ na praciah chitovaha karejskaha sieryjała — na jaho namiakali i dyzajn postara, i stylizacyja nazvy. Ale padčas sieansu vyśvietliłasia, što nijakaha dačynieńnia da franšyzy Netflix karcina nie maje
Pravaŭładalnik iłžyvaj «Hulni ŭ kalmara» ŭ SND — kampanija RWV Film. Kampanija ŭžo daŭno słavicca tym, što prasoŭvaje nieviadomyja zamiežnyja relizy, pierajmianoŭvajučy ich u niešta bolš hučnaje
Naprykład, u 2024 hodzie ŭ prakat vychodzili «Piła. Džokier» (u aryhinale prosta DarkGame) i «Miljarder u truščobach» (na afišy kitajskaj kamiedyi jašče dadavaŭsia słohan: «Šou Trumana» praciahvajecca»). A ŭ hetym miesiacy na ekranach źjaviŭsia tryler «Sapraŭdnyja detektyvy» (jon ža Neighborhood Watch), zrazumieła, nijak nie źviazany ź sieryjałam HBO.
Zasmučany Uładzimir vyrašyŭ znajści ŭpłyŭ na dystrybjutara i napisaŭ skarhu ŭ «Minabłkinavideaprakat».
Praz amal dźvie tydni pradpryjemstva prysłała davoli padrabiazny adkaz. Kali koratka: usio narmalna, nijakich parušeńniaŭ, jak i padstaŭ dla viartańnia hrošaj za bilety, niama.
— U suviazi z praktykaj u suśvietnym kinarepiertuary vytvorca filma maje prava adaptavać aryhinalnuju nazvu svajoj filmapradukcyi dla inšych terytoryj, tamu niaredkija vypadki, kali adzin i toj ža film u roznych krainach maje adroznyja nazvy.
U dadzienym vypadku vytvorca realizavaŭ prava prakata dadzienaha filma na terytoryi Rasijskaj Fiederacyi i Respubliki Biełaruś pad nazvaj «Hulnia ŭ kalmara. Pierazahruzka». Kinateatry adpaviedna nie majuć prava pa svaim mierkavańni ŭnosić karektyvy va ŭzhodnienuju damovaj i Dziaržaŭnym rehistram filmaŭ nazvu. Akramia taho, raźmieščanaja ŭ sietcy internet anatacyja źmiaščaje papiaredžańnie dla hledačoŭ pra toje, što dadzieny film — tajłandski tryler, jaki nie maje dačynieńnia da papularnaha paŭdniovakarejskaha sieryjała «Hulnia ŭ kalmara», a taksama źmiaščaje inšyja vyčarpalnyja źviestki, što paćviardžajuć: havorka idzie pra inšy samastojny kiniematahrafičny kantent.
Rekamiendujem Vam pierad nabyćciom biletaŭ praviarać infarmacyju pra film na aficyjnych resursach, takich jak sajt kinateatra, abo ŭdakładniać padrabiaznaści ŭ rabotnikaŭ kinateatra.
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu16
Kamientary