Žančyna zajmałasia seksam z budysckimi manachami, a paśla šantažavała ich
Paśla vykryćcia niekalki śviataroŭ byli pazbaŭleny sanu, dvoje źbiehli. A palityki prapanujuć razhladać seks z manachami jak złačynstva, ale mnohija ličać, što vina na manachach.
Jak piša The Times, u Tajłandzie razhareŭsia hučny skandał, źviazany z 35-hadovaj Viłavan Emsavat (Wilawan Emsawat) pad nikam Holf. Pavodle padazreńniaŭ palicyi, jana šantažavała vysokapastaŭlenych manachaŭ, majučy videa– i fotadokazy ich pałavych suviaziaŭ ź joju.
Viłavan była aryštavanaja 15 lipienia ŭ svaim šykoŭnym domie pablizu Banhkoka. Žančynu abvinavačvajuć u admyvańni hrošaj i atrymańni vykradzienaj majomaści.
Jak paviedamlaje Centralnaje śledčaje ŭpraŭleńnie Tajłanda, na piaci telefonach, kanfiskavanych padčas zatrymańnia, znojdzienyja videa i fota, na jakich žančyna zajmajecca seksam z roznymi manachami. Na niekatorych ź ich — manaskaje adzieńnie šafranavaha koleru.
Paviedamlajecca, što dzieviać manachaŭ, siarod jakich byli i nastajacieli viadomych chramaŭ, byli pazbaŭleny sanu. Jak minimum dvoje schavalisia.
Palityčny kamitet Sienata prapanuje ŭnieści źmieny ŭ zakon, kab praduhledzieć kryminalnuju adkaznaść dla žančyn, jakija majuć pałavyja znosiny z manachami. Heta vyklikała krytyku, bo šmat chto ličyć, što adkaznaść pavinny nieści ŭ pieršuju čarhu sami manachi.
«Hety skandał raskryvaje sistemu chłuśni i kryvadušnaści siarod vysokaha duchavienstva, — cytuje vydańnie ahladalnicu Bangkok Post Sanicuda Ekačaj (Sanitsuda Ekachai). — Žančyny z daŭnich časoŭ u tradycyjnych vučeńniach pradstaŭlalisia jak «vorahi duchoŭnaj čyścini manachaŭ»… I ciapier, kali maralny zaniapad duchavienstva vidavočny, adkaznaść uskładajuć na žančynu, a manachi paŭstajuć u roli achviaraŭ».
Skandał pačaŭsia paśla taho, jak raptoŭna źnik Pchra Tchep Vačyrapamok (Phra Thep Wachirapamok), viadomy jak Arč — nastajaciel adnaho ź viadomych chramaŭ u Banhkoku. U červieni jon niečakana pakinuŭ manaski san i ŭciok u Łaos.
Rasśledavańnie pakazała, što ŭ jaho byli adnosiny ź Viłavan, jakaja śćviardžała, što ciažarnaja ad jaho, i patrabavała 7,8 miljona bat (kala 240 000 dalaraŭ). Kali nastajaciel admoviŭsia płacić, žančyna paviedamiła inšym manacham pra suviaź, i jon pakinuŭ krainu.
Palicyja znajšła na telefonach žančyny paviedamleńni i intymnyja videa z udziełam inšych budysckich lidaraŭ, jakija buduć aŭtamatyčna pazbaŭlenyja sanu za parušeńnie zaroku cnoty.
Ciapier śledstva sprabuje vyśvietlić, ci płacili jany Viłavan z asabistych srodkaŭ, ci vykarystoŭvali hrošy chramaŭ.
Śledčyja taksama pradstavili bankaŭskija dakumienty, zhodna ź jakimi praz rachunki žančyny za apošnija try hady prajšło kala 385 miljonaŭ bat (prykładna 11,9 miljona dalaraŭ). Značnuju častku hetych hrošaj, jak śćviardžaje zatrymanaja, jana patraciła na nielehalnyja internet-hulni.
Niekatoryja manachi pryznalisia ŭ adnosinach ź Viłavan. Pavodle adnoj ź viersij, jana vychodziła na ich praz sacyjalnyja sietki. Adzin z manachaŭ śćviardžaje, što znachodziŭsia ź joj u stabilnych doŭhaterminovych adnosinach i navat atrymaŭ ad jaje ŭ padarunak aŭtamabil. Ale kali daviedaŭsia, što jana sustrakajecca ź inšym manacham, i jana pačała patrabavać hrošy — adnosiny sapsavalisia.
Kiraŭnik śledčaj hrupy hienierał-major palicyi Čarunkijat Pankajeŭ (Charoonkiat Pankaew) zajaviŭ, što jaho kamanda budzie analizavać kožnaje videa ŭ pošukach dokazaŭ parušeńnia manaskaha kodeksu.
«Kožny, chto jaho parušaje, musić być pazbaŭleny sanu», — skazaŭ jon. — «My chočam zachavać davier hramadstva da budyzmu. Heta čałaviečaja słabaść, ale ihnaravać jaje nielha».
U Tajłandzie rezka vyrasła kolkaść biełaruskich turystaŭ
Na «vostravie piedafiłaŭ» u Vialikabrytanii manachi zhvałcili bolš za 50 dziaciej
Biełarus abmieńvaŭsia intymnymi zdymkami i trapiŭ pad šantaž
«Tut jość uvohule ŭsio — i naohuł ničoha nie treba». Biełaruska pierajechała ŭ Tajłand i raskazvaje, jak kazačna tam žyviecca
Ciapier čytajuć
Jak siońnia žyvuć Kuźniečyki, jakija amal dva hady chavalisia ŭ pasolstvie Šviecyi, kab nie trapić u kipciury siłavikoŭ?2
Kamientary