Va Ukrainie biełarusa asudzili za raspalvańnie varožaści i anulavali dazvoł na žycharstva
Zakarpackaje abłasnoje ŭpraŭleńnie Dziaržaŭnaj mihracyjnaj słužby Ukrainy na padstavie dakumienta Słužby biaśpieki ab pahrozie dla nacyjanalnaj biaśpieki z boku hramadzianina Biełarusi, uradženca Homiela, anulavała jamu dazvoł na imihracyju i adpaviedna na stałaje žycharstva va Ukrainie, daviedałasia «Radyjo Svaboda».
Jak vynikaje z sudovaha rašeńnia, jakoje maje ŭ rasparadžeńni «Radyjo Svaboda», pierad hetym biełarusa aštrafavali pavodle častki 1 artykuła 161 Kryminalnaha kodeksa Ukrainy za raspalvańnie nacyjanalnaj varožaści.
Užo ŭ razhar poŭnamaštabnaj rasijskaj vajny suprać Ukrainy hramadzianin Biełarusi, pavodle rašeńnia suda, «na sistemnaj asnovie» publikavaŭ u sacyjalnaj sietcy Facebook fota, dopisy i kamientary abraźlivaha charaktaru na adras vajskova-palityčnaha kiraŭnictva Ukrainy, u tym liku prezidenta Uładzimira Zialenskaha, supracoŭnikaŭ pravaachoŭnych orhanaŭ, vajskoŭcaŭ Uzbrojenych sił Ukrainy, a taksama suprać pradstaŭnikoŭ jaŭrejskaj nacyjanalnaści.
Uradžencu Homiela pahražała da troch hadoŭ pazbaŭleńnia voli, ale jon pajšoŭ na ździełku sa śledstvam, pryznaŭ svaju vinu i vypłaciŭ štraf.
Heta adbyłosia ŭ červieni 2023 hoda, a ŭ sakaviku 2025 hoda SBU nakiravała ŭ mihracyjnuju słužbu dakumient, u jakim utrymlivalisia, jak adznačajecca ŭ sudovym rašeńni, «kankretnyja fakty i apisańnie abstavin dziejańniaŭ hramadzianina Biełarusi, jakija mohuć paŭpłyvać niehatyŭna na stan zabieśpiačeńnia nacyjanalnaj biaśpieki Ukrainy».
Na padstavie hetaha dakumienta mihracyjnaja słužba anulavała ŭsie dazvolnyja dakumienty, jakija praduhledžvali mahčymaść stała pražyvać va Ukrainie, a taksama ŭchvaliła rašeńnie ab prymusovym viartańni jaho ŭ krainu pachodžańnia abo ŭ inšuju, treciuju, krainu.
Biełarus sprabavaŭ abskardzić hetaje rašeńnie, ale apielacyjny sud admoviŭsia zadavolić jahonuju zajavu. Ciapier jon jašče moža źviarnucca z kasacyjaj u Vośmy apielacyjny administracyjny sud.
Biełarus žyŭ u Bierahavym Zakarpackaj vobłaści z 2013 hoda. Tam jon nabyŭ ziamielny ŭčastak i ažaniŭsia z hramadziankaj Ukrainy. Mienavita na hetaj padstavie jon u 2017 hodzie atrymaŭ dazvoł na imihracyju i stałaje pražyvańnie va Ukrainie.
U svajoj zajavie ŭ sud biełarus asobna paviedamiŭ, što padčas pražyvańnia ŭ Biełarusi ŭdzielničaŭ u apazicyjnych mitynhach i «litaralna ŭciok z krainy, bo jamu pahražała turemnaje źniavoleńnie na doŭhija hady». U toj ža čas nijakich kankretnych faktaŭ u sudovym rašeńni nie zhadvajecca.
Da zaviaršeńnia sudovaha pracesu hramadzianin Biełarusi zastajecca na terytoryi Ukrainy.
Lidar mahiloŭskich fanataŭ paśla sutak źbiraŭsia va Ukrainu pa svabodu, a ciapier jon za Łukašenku, HUBAZiK i Rasiju
Biełarusy, jakija chočuć ukrainski pašpart, ale nie mohuć admovicca ad hramadzianstva Biełarusi aficyjna, zmohuć zrabić heta dekłaratyŭna
«Spytali, čyj Krym». Biełarus padaŭsia adrazu na dva DNŽ u Polščy i Litvie, a ŭ vyniku musiŭ pakinuć ES
Kamientary