Miarkujučy pa pasažyrapatoku transpartu, nasielnictva Biełarusi z 2019-ha skaraciłasia, moža, navat na 1,2 miljona čałaviek
Biełstat zasakreciŭ mnohuju statystyku, ale ŭ adkrytym dostupie zastajucca danyja ab transparcie. Jany šakujuć.
Jość pakazčyki spažyvańnia, jakija słaba źmianiajucca z hadami. Da takich adnosiacca, prykładam, pajadańnie bazavych tavaraŭ — chleba i bulby. Da takich ža pakazčykaŭ adnosicca i spažyvańnie bazavych pasłuh — u tym liku kolkaść pajezdak na transparcie. Ludzi jeździać na pracu i z pracy, u škoły i sa škoły, da baćkoŭ i ad baćkoŭ praktyčna niaźmiennuju kolkaść razoŭ štohod.
Na hetuju kolkaść upłyvajuć tolki nadzvyčajnyja padziei — jak pandemija kavidu ci ekanamičny abvał, kali mnohija ludzi prosta pierastajuć jeździć na pracu ci ŭ adpačynak.
U imknieńni schavać realnaść Biełstat paśla 2020 hoda zasakreciŭ samuju roznuju statystyku — pačynajučy z demahrafičnaj i zakančvajučy danymi ab eksparcie naftapraduktaŭ. Siarod inšaha, ad 2022 hoda pierastali publikavać i źviestki pra pasažyraaborot pa asobnych vidach transpartu. Ale sumarnyja ahulnyja danyja zastalisia ŭ adkrytym dostupie.
Jak bačym, u 2016—2019 hadach ahulnaja kolkaść pasažyraŭ, pieraviezienych usimi vidami transpartu: na haradskich, mižharodnych i miždziaržaŭnych maršrutach, aŭtobusami, mietro, čyhunkaj i samalotami, trymałasia praktyčna niaźmiennaja — 1,97-1,99 miljarda pajezdak.
U 2020 hodzie pasažyrapatok rezka ŭpaŭ, bo, niahledziačy na aficyjnaje ihnaravańnie ŭładami kavidu, mnohija ludzi samaabmiežavali karystańnie hramadskim transpartam, kab pieramahčy pandemiju. U vyniku ŭžo ŭ 2020-m pasažyrapatok źniziŭsia da 1,64 miljarda.
Adnak i paśla skančeńnia pandemii kavidu i postkavidnaha adnaŭleńnia ekanamičnaj aktyŭnaści pasažyrapatok u Biełarusi zastajecca našmat mienšym, čym byŭ u 2016—2019 hady. Tak, u 2024 hodzie jon skłaŭ 1,72 miljarda pajezdak. Heta amal na 14% mienš!
U 2019 hodzie nasielnictva Biełarusi, zhodna z danymi pierapisu, składała 9,4 miljona čałaviek.
Skaračeńnie pasažyraabarotu na 13,7% adpaviadaje skaračeńniu nasielnictva ŭnutry krainy na 1,2 miljona čałaviek proci 2019 hoda.
Kali brać statystyku pa pasažyra-kiłamietrach, zhodna sa źviestkami Biełstata, u 2024 hodzie pasažyraabarot skłaŭ 26,5 miljarda pasažyra-kiłamietraŭ. U 2019 hodzie jon składaŭ 27,6 miljarda pasažyra-kiłamietraŭ, abo na 3,9% bolš.
Skaračeńnie na 3,9% adpaviadaje skaračeńniu nasielnictva na prykładna 400 tysiač čałaviek.
Ciažka skazać, čamu isnuje takaja vialikaja raźbiežka ŭ biełstataŭskich ličbach padzieńnia pasažyraabarotu, vyličanaha ŭ kolkaści pajezdak i ŭ ich kiłamietražy. Heta moža być jak prykmieta manipulacyi statystykaj, tak i vynik mižnarodnaj izalacyi Biełarusi: ludzi skaracili kolkaść dalnich pajezdak. Heta moža być taksama vynik masavaj emihracyi pracazdolnaha nasielnictva. Moładź bolš schilnaja vandravać na dalokija adlehłaści, piensijaniery abmiažoŭvajucca miascovym transpartam.
Niama nijakich vidavočnych inšych pryčyn, akramia skaračeńnia nasielnictva, kab za piać hadoŭ adbyłosia takoje značnaje skaračeńnie pasažyraabarotu. Dla paraŭnańnia pryviadziom anałahičnyja danyja pa Rasii i Jeŭrasajuzie.
Ahulny pasažyrapatok u Rasii ŭ 2019 hodzie składaŭ 626,1 miljarda pasažyra-kiłamietraŭ. U 2024 hodzie jon, pavodle papiarednich danych, skłaŭ 627,1 miljarda pasažyra-kiłamietraŭ. Jak bačym, jon niaźmienny — jak i kolkaść nasielnictva krainy, dzie vymirańnie kampiensujecca imihracyjaj.
Rasijskaja čyhunka paviedamiła, što ŭ 2024 hodzie pieraviezła 1,28 miljarda pasažyraŭ. Heta rekordny za 17 hadoŭ pakazčyk. Dla paraŭnańnia: u 2019 hodzie jon składaŭ 1,19 miljarda.
U Jeŭrasajuzie pasažyraabarot aŭtatranspartam u 2019 hodzie składaŭ 4299 miljarda pasažyra-kiłamietraŭ. U 2025 hodzie, pa papiarednich acenkach, jon składzie 4354 miljarda pasažyra-kiłamietraŭ. Nasielnictva Jeŭrasajuza za hety pieryjad vyrasła prykładna na 1%.
Pasažyrapatok jeŭrapiejskich čyhunak u 2023 hodzie skłaŭ 429 miljarda pasažyra-kiłamietraŭ. U 2019 hodzie jon składaŭ 411 miljarda.
Jak bačym, i ŭ Rasii, i ŭ ES ličby pasažyraabarotu adnavilisia da pieradpandemičnych i navat trochi vyraśli. U Biełarusi ž adbyłosia značnaje skaračeńnie.
Statystyka Biełstata pakazvała, što bolš za 90 tysiač čałaviek skłała «zališniaja śmiarotnaść» u vyniku kavidu. Biełaruś pa hetym pakazčyku najhoršaja na śviecie.
Ličyłasia, što prykładna 200 tysiač čałaviek emihravali ź Biełarusi ŭ Polšču, Litvu dy inšyja krainy ES u 2021-2024, ratujučysia ad palityčnych represij i ekanamičnych prablem.
Padzieńnie abjomu pasažyraabarotu pakazvaje, što ahulnaja ličba emihracyi našmat bolšaja. Napeŭna, značnaja kolkaść biełarusaŭ vyjechała i ŭ Rasiju, a vialikaja kolkaść ekanamičnych emihrantaŭ choć i pryjazdžaje na radzimu, ale pracuje ŭ Jeŭrasajuzie.
Pavodle aficyjnych danych Biełstata, nasielnictva Biełarusi z 2019 da 2025 hadoŭ skaraciłasia na 320 tysiač čałaviek, da 9,11 miljona.
Vyhladaje, što realnuju kolkaść nasielnictva Biełarusi my daviedajemsia tolki paśla adychodu Alaksandra Łukašenki ad ułady. Pierad jaho prychodam da ŭłady ŭ 1994 hodzie ŭ Biełarusi žyło 10,2 miljona čałaviek.
«Naša Niva» — bastyjon biełaruščyny
PADTRYMAĆCiapier čytajuć
Na naradzie ŭ Łukašenki publična pasvarylisia čynoŭniki. Jon nie viedaŭ, kaho padtrymać6
Kamientary