Žančyna śćviardžaje, što na praciahu 15 hadoŭ žyła ŭ lasach 20 krain i samastojna naradžała dziaciej.
9 lipieni 2025 hoda ŭ paŭdniovaindyjskim horadzie Hokarna (štat Karnataka) palicyja vypadkova vyjaviła niezvyčajnuju žycharku miascovaha lesu. Patrulujučy ŭ pošukach turystaŭ niebiaśpiečnuju zonu, dzie časam zdarajucca apoŭźni, inśpiektar palicyi ŭ huščary zaŭvažyŭ statuju induisckaha bažastva, a za joj — firanki z čyrvonych sary, jakija chavali ŭvachod u piačoru. Unutry jon znajšoŭ rasijanku Ninu Kucinu i dźviuch jaje dačok, čatyroch i šaści hadoŭ, paviedamlaje The New York Times,
Jak vyśvietliłasia, 40-hadovaja Kucina ŭžo dzieviać hadoŭ žyvie ŭ Indyi ŭ pošukach duchoŭnaj harmonii. U piačory, dzie jaje znajšoŭ palicejski, siamja praviała prykładna tydzień. Tam žančyna miedytavała pry śviatle śviečak, zajmałasia johaj i hatavała ježu na prymityŭnaj kuchni na drovach. Ścieny piačory byli ŭpryhožanyja vyjavami induisckich bahoŭ.
Niahledziačy na niebiaśpieku, žančyna admoviłasia pakidać piačoru. Tolki paśla doŭhich pieramovaŭ palicyja pierakanała jaje i dačok pierajechać u prytułak dla žančyn, jaki kirujecca dabračynnaj arhanizacyjaj.
Pavodle palicyi, uradženka Krasnajarska Kucina ŭpieršyniu pryjechała ŭ Indyju ŭ 2016 hodzie pa šaścimiesiačnaj biznes-vizie i spyniłasia ŭ Hoa — kurortnym štacie, jaki pryciahvaje zamiežnikaŭ, što šukajuć duchoŭnaść.
Kucina pražyła ŭ krainie hod paśla zakančeńnia vizy, ale ŭ 2018-m joj dazvolili vyjechać ź Indyi. Zatym jana nakiravałasia ŭ Niepał, dzie znachodziłasia 90 dzion pa turystyčnaj vizie. Ale ŭ 2020 hodzie Kucina viarnułasia ŭ Indyju ŭžo pa šmatrazovaj turystyčnaj vizie razam z dvuma synami i dačkoj.
Zhodna z uradavymi zapisami, jaje starejšy syn zahinuŭ u avaryi ŭ minułym hodzie va ŭzroście 21 hoda. Prach syna Nina zaŭsiody nasiła z saboj.
Dzie znachodzicca druhi syn Kucinaj, jakomu ciapier 11, nieviadoma. Adna ź jaje dačok naradziłasia va Ukrainie, druhaja — užo ŭ Indyi.
Jak paviedamlaje The Hindustan Times, Kucina zajaviła palicyi, što jaje siamja «lubić pryrodu», i što jana sama žyła ŭ lasach bolš čym 20 krain za apošnija 15 hadoŭ.
«Maje dzieci naradzilisia ŭ roznych miescach. Ja naradziła ich usich sama, biez balnic i lekaraŭ, bo ja viedaju, jak heta rabić. Mnie nichto nie dapamahaŭ, ja zrabiła heta sama», — pierakonvała jana.
Rasijskija ŚMI paviedamlajuć, što Kucina była zamužam dva razy. Pieršy jaje muž, ad jakoha jana mieła syna, trahična zahinuŭ. Z druhim mužam jana niekatory čas žyła ŭ Maskvie, zatym va Lvovie, padarožničała pa Kaŭkazie i Karpatach, była ŭ Indaniezii, Małajzii i Tajłandzie. U hetym šlubie naradziŭsia druhi syn. Paśla taho, jak para rasstałasia, Nina adpraviłasia ŭ Indyju.
U Hoa žančyna padpracoŭvała vykładčycaj u miascovaj škole dla ruskamoŭnych dziaciej. Jana nieadnarazova naviedvała Hokarnu i, pavodle palicyi, pravodziła ŭ piačory časam pa niekalki tydniaŭ. Palicejski, jaki jaje znajšoŭ, raskazaŭ, što Kucina viedaje šmat pra pryrodu, umieje pryhatavać prostyja stravy z aharodniny i muki.
Paśla zatrymańnia Kucina adpraviła elektronny list rodnym: «Naš spakojny piačorny raj skončyŭsia — naša žytło źniščana. Za hady žyćcia pad adkrytym niebam u harmonii z pryrodaj nivodzin źvier ci źmiaja nam nie naškodzili».
Adnak hetym razam ułady Indyi pastavilisia da jaje losu surjozna. Žančynu i jaje dačok pieravieźli ŭ Bienhałuru — stalicu štata Karnataka, dzie orhany mihracyjnaha kantrolu pastanavili nazirać za siamjoj i padrychtavać departacyju ŭ Rasiju. Pakul ich źmiaścili ŭ śpiecyjalny centr dla zatrymanych.
Jak piša The Hindustan Times, palicyja zdoleła adšukać hramadzianskaha muža Kucinaj i baćku jaje dźviuch dačok — 40-hadovaha hramadzianina Izraila Drora Haldštejna.
«Ja patrabuju sumiesnaj apieki. Žadaju mieć mahčymaść sustrakacca ź imi, być pobač ź imi i być baćkam. Voś i ŭsio», — cytuje słovy mužčyny vydańnie.
U čas razmovy ź psichołaham rasijanka raskazała ab adnosinach z Haldštejnam i ab tym, što naradziła małodšuju dačku ŭ piačory ŭ Hoa. Pa jaje słovach, svaje adnosiny ź izrailcianinam, jaki handluje ŭ Indyi tekstylem, jana nie rehistravała. Paśla naradžeńnia druhoj dački jany rasstalisia.
Jak paviedamlajuć ŚMI, palicyja spadziavałasia, što Haldštejn zmoža apłacić bilety na pieralot. Ci vyrašana heta pytańnie, nieviadoma.
Ciapier čytajuć
Chto taki Michaił Miachovič — siłavik, jaki viadzie kanał HUBAZiKa i adkazvaje za prabiŭ ludziej5
Kamientary