MZS Polščy prakamientavała prablemy z atrymańniem viz

Biełarusam usio ciažej atrymać polskija vizy. Dadatkovyja techničnyja pracedury, jakija ŭvodzić Polšča ŭ zmahańni z pasiarednikami i botami, tolki ŭskładnili praceduru.

Paśla publikacyi ab prablemach ź vizami kiraŭnik Narodnaha antykryzisnaha ŭpraŭleńnia i namieśnik kiraŭnicy ŭ Abjadnanym pierachodnym kabiniecie Pavieł Łatuška skiravaŭ u Ministerstva zamiežnych spraŭ Polščy zvarot. Jon paprasiŭ u budučyni abmierkavać praceduru vydačy viz biełarusam i mahčymyja sposaby padtrymki, jakija «mahli b być ukaranionyja z metaj źmiakčeńnia ciažkaściaŭ, što ŭźnikajuć u biełarusaŭ, jakija padajuć zajaŭki na vizy».

Na zvarot palityka adkazała dyrektarka konsulskaha ŭpraŭleńnia MZS Justyna Chržanoŭska. Pavieł Łatuška padzialiŭsia z «Našaj Nivaj» listom.

Na pačatku Chržanoŭska zapeŭnivaje, što «reforma vizavaj sistemy, jakaja realizujecca z pačatku minułaha hoda, u tym liku niadaŭna ŭviedzienyja novyja pravavyja rehulavańni ŭ halinie viz i mihracyi, nijakim čynam nie skiravanyja suprać hramadzian Biełarusi».

Meta zakona ad 4 krasavika 2025 hoda i inšych narmatyŭnych aktaŭ — «uparadkavańnie pracedur ujezdu i lehalizacyi znachodžańnia zamiežnikaŭ na terytoryi Polščy, a nie ŭskładnieńnie dziejnaści zamiežnikaŭ, jakija pracujuć lehalna, ich pracadaŭcaŭ abo studentaŭ», padkreślivajuć u MZS.

«Statystyka vydačy viz biassprečna śviedčyć pra stanoŭčy vynik dziejańniaŭ pa vypraŭleńni i ŭdaskanaleńni vizavaj pracedury, praviedzienych da hetaha času. (…)

Paśla paŭtara hoda pracy my nazirajem u mnohich miescach śvietu źmianšeńnie vizavaha cisku, uparadkavańnie mihracyjnych pracesaŭ, spynieńnie złoŭžyvańnia polskimi vizami, adtok niesumlennych zajaŭnikaŭ na vizy i abmiežavańnie dziejnaści niesankcyjanavanych pasiarednikaŭ», — piša Chržanoŭska.

Stanoŭčyja źmieny MZS Polščy fiksuje i ŭ Biełarusi:

«My taksama zafiksavali pryviadzieńnie da realnaha ŭzroŭniu abjomu vizavych zajaŭ, jakija razhladajucca ŭ Biełarusi. Adnaŭleńnie naležnych pryncypaŭ vydačy humanitarnych vizaŭ likvidavała złoŭžyvańni, što ŭźnikali raniej, i ciapier konsuły pry padtrymcy Uschodniaha departamienta MZS mohuć sapraŭdy dapamahać hramadzianam Biełarusi, jakim pahražajuć represii z boku režymu».

Chržanoŭska śćviardžaje, što novyja pracedury pryviali da źmianšeńnia takoj źjavy, jak visa shopping (atrymańnie vizy adnoj krainy dla pajezdki ŭ inšuju), vyklikanaj tym, što bolšaść dziaržaŭ-členaŭ Šenhienskaj zony prypynili vydaču vizaŭ, što pryviało da nienaturalna vysokaha popytu na polskija vizy.

Jak tłumačyć čynoŭnica, konsuły atrymali ŭkazańnie pravodzić pahłyblenuju pravierku zajaŭ na vydaču vizy, «kab vyklučyć vypadki, kali meta ŭjezdu adroźnivajecca ad zajaŭlenaj, a krainaj pryznačeńnia źjaŭlajecca nie Polšča».

«U toj ža čas chaču padkreślić, što — niezaležna ad vyšejskazanaha — Polšča zastajecca krainaj, jakaja vydaje najbolšuju kolkaść vizaŭ hramadzianam Biełarusi, dziakujučy hetamu mižasabovyja kantakty i suviazi, jakija jadnajuć abodva hramadstvy, zastajucca blizkimi i tryvałymi», —

— davodzić Chržanoŭska.

Kali kazać tolki pra turystyčny šenhien (vizy typu S), to najbolš ich u 2024-m vydała Hiermanija — 50 tysiač. Ale Polšča vydaje šmat pracoŭnych viz, a taksama humanitarnyja. Za 2024 hod Polšča vydała biełarusam 151 tysiaču pieršych dazvołaŭ na znachodžańnie (ličba ŭklučaje DNŽ i doŭhaterminovyja vizy).

Chržanoŭska dadaje, što kab zrabić vizy bolš dastupnymi, uviali, naprykład, «formu novych damoŭ z vonkavym pastaŭščykom pasłuh na vykanańnie peŭnych dziejańniaŭ, źviazanych z pryniaćciem vizavych zajaŭ na terytoryi Biełarusi», jakija praduhledžvajuć «pavieličeńnia kolkaści pryniatych vizavych zajaŭ u najbližejšyja miesiacy», i adkryli novy punkt pryjomu vizavych zajaŭ u Viciebsku.

• 4
• 7
• 3
• 4
• 1
• 0
• 0
• 0