«Zamiest kvietak»: maładyja z Mahilova paprasili ŭ haściej na viasielle niezvyčajnyja padarunki
Zusim niadaŭna para z Mahilova zhulała viasielle. Žanicha zavuć Uład, a niaviestu — Volha. Jašče da dnia Ch budučyja maładyja źviarnulisia da haściej ź niezvyčajnaj prośbaj: nie daryć na viasielle raskošnyja bukiety, a kupić zamiest ich dziciačyja cacki, piša Onliner.by.
Cvajo rašeńnie jany patłumačyli tak: mašynki, lalki, kociki i zajčyki stanuć padarunkami dla dziaciej, jakija prosta zaraz prachodziać lačeńnie ad ankałahičnych zachvorvańniaŭ. Akazałasia, historyja vielmi asabistaja dla niaviesty: u rańnim dziacinstvie jana sama zmahałasia z rakam.
Dyjahnaz «vostry limfabłasny lejkoz» paćvierdziŭsia, kali Voli było ŭsiaho dva hady. U pracesie dvuchhadovaha lačeńnia ŭ Minsku i Mahilovie była projdzienaja chimijaterapija, taksama spatrebiłasia pieralivańnie kryvi.
— Dalej mnie treba było prachodzić rehularnyja abśledavańni. Davodziłasia časta lažać u balnicach, tam mianie dobra viedaŭ uvieś piersanał. Ja navat pravodziła inšych dziaciej na abśledavańni! Jašče ź dziacinstva ja sprabavała pahłybicca ŭ svoj stan, zadavała pytańni daktaram, navat čytała vypiski, jakija traplalisia ŭ ruki, — uśmichajecca dziaŭčyna.
Užo 28 hadoŭ Volha znachodzicca ŭ stojkaj remisii. Ale suviaź ź miedycynaj nie abarvałasia: dziaŭčyna pracuje doktaram chutkaj dapamohi. Jana ŭpeŭnienaja: na vybar prafiesii paŭpłyvali ŭražańni ad pieražytaha ŭ dziacinstvie, znosiny z daktarami i dni, praviedzienyja ŭ balnicach.
A ciapier pra historyju, jakaja rasčuliła tysiačy čałaviek. Usio zdaryłasia na viasielli, jakoje adśviatkavali zusim niadaŭna ŭ rodnym horadzie pary.
— Jašče da znajomstva z mužam vyrašyła: kali ŭ mianie budzie viasielle, to paprašu haściej prynieści padarunki dla dziaciej. Darečy, Uład ab hetaj idei nie viedaŭ. Ale ŭ niejki momant jon pračytaŭ historyju pary, jakaja taksama paprasiła haściej zamianić bukiety na cacki dla dziaciej ź dziciačaha doma. Jon napisaŭ mnie pra heta, i ja padumała: jak kłasna, što nie zmaŭlajučysia ŭ nas zdaryŭsia metč! Navat jašče bolš u jaho zakachałasia, — uśmichajecca dziaŭčyna.
Idejaj zamianić kvietki na cacki Uład i Volha padzialilisia ź viasielnym kaardynataram. Dziaŭčyna prapanavała źviarnucca da vałancioraŭ dabračynnaj arhanizacyi KinderVita. Kala čatyroch hadoŭ jany dapamahajuć dzieciam, jakija znachodziacca na lačeńni ŭ ankacentrach.
— My zrazumieli, što dla nas heta budzie mieć asablivaje značeńnie, bo ja taksama chvareła, — raspaviadaje Vola. — Tamu ŭ zaprašeńniach paprasili haściej zamiest kvietak prynieści na viasielle cacki. Paźniej u asobnym čacie ja raśpisała, jakija mienavita patrebnyja i dla kaho jany. My vielmi rady, što našu ideju padtrymali, a mnohija hości navat prynosili pa niekalki štuk!
Kranalnym rolikam z uračystaści Ułada i Voli padzialilisia ŭ zapisie KinderVita. U kamientarach mnohija napisali słovy padtrymki, pažadali pary ščaścia i padziakavali za dapamohu dzieciam. Darečy, dakładnuju kolkaść padoranych cacak maładyja nie ličyli, ale viadoma: usie źmiaścilisia ŭ try vielizarnyja miaški. Padarunki para ŭžo pieradała vałancioram.
-
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»
-
«Paznajomiłasia z tureckim vajskoŭcam praź internet. Praź miesiac razam siadzieli nad asmanska-biełaruskim słoŭnikam Sokałava-Vojuša»
-
«Sdiełano v Biełoruśsii». Sacsietki ŭzbudzilisia ad syru zahadkavaha pachodžańnia
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim32
Kamientary
znachodzicca - i pra "znajści" i pra "być u niejkim stanie"
"nachodzicca" - hata kali niechta budzie doŭha špacyravać ))
Stu lat!
(čuŭ takoje pažadańnie navat na pravasłaŭnych viasiellach) )