KNDR adkryła kurort «suśvietnaha kłasa». Jon moža być aryjentavany na rasijskich turystaŭ FOTY
Paŭnočnaja Kareja zaviaršyła budaŭnictva maštabnaha turystyčnaha kurortu «Vansan-Kalma» — heta adzin z pryjarytetnych prajektaŭ lidara KNDR Kima Čen Yna. Pchieńjan pazicyjanuje jaho jak «kulturny kurort suśvietnaha kłasa», zajaviła dziaržaŭnaje ahienctva Centralnaje telehrafnaje ahienctva Karei (CTAK).
Mahčyma, u budučyni tudy zmohuć trapić i inšaziemcy — pierš za ŭsio rasijanie, bo Paŭnočnaja Kareja jak turystyčny kirunak, pačynajučy ź minułaha hoda, pastupova nabiraje papularnaść u Rasii, piša Bi-bi-si.
Kurort raźmieščany na ŭschodnim uźbiarežžy, u horadzie Vansan na paŭvostravie Kalma. Uračystaje adkryćcio prajšło 24 červienia, na im, jak paviedamiła CTAK, prysutničaŭ pasoł Rasii ŭ KNDR Alaksandr Macehora.
Dla miascovych turystaŭ kurortnaja zona adkryjecca 1 lipienia, kali jana budzie dastupnaja i inšym hramadzianam — pakul nie paviedamlajecca.
Kurort raźmieščany na ŭčastku plažu daŭžynioj 4 km i zdolny pryniać da 20 000 naviedvalnikaŭ, śćviardžajuć u KNDR. Jon uklučaje ŭ siabie «abjekty dla marskoha kupańnia, roznyja spartyŭnyja i zabaŭlalnyja zbudavańni» i «abstalavany ŭsim nieabchodnym dla demanstracyi pryhažości malaŭničaha ŭschodniaha ŭźbiarežža ŭ lubuju paru hoda». Na terytoryi, jak zajavili, znachodziacca hateli, restarany, handlovyja centry i akvapark — adnak paćvierdzić hetyja źviestki pakul niemahčyma.
Kim Čen Yn jašče ŭ pieršyja hady svajho kiravańnia prajaŭlaŭ žyvuju cikavaść da raźvićcia turystyčnaj haliny krainy, i prajekt hetaj turystyčnaj zony ličyŭsia klučavym, kažuć analityki.
Kim pastaviŭ metaj pieratvaryć Vansan, horad, dzie jon pravodziŭ dziacinstva i dzie ŭ mnohich pradstaŭnikoŭ paŭnočnakarejskaj elity jość pryvatnyja viły, u turystyčny centr vartaściu ŭ miljardy dołaraŭ. Płany byli ŭpieršyniu anansavanyja bolš za 10 hadoŭ tamu i z taho času istotna pašyrylisia.
«Turyzm moža stać mahutnym ruchavikom raźvićcia ekanomiki, stymułam dla kulturnaha ŭniosku i rehijanalnaha roskvitu», — zajaviŭ jon paśla zakančeńnia budaŭnictva.
Paŭnočnakarejski lidar z «vialikim zadavalnieńniem» zajaviŭ, što budaŭnictva kurortu ŭvojdzie ŭ historyju jak «adzin z najbolšych pośpiechaŭ hoda», i dadaŭ, što KNDR pabuduje jašče bolš maštabnych turystyčnych zon «u najkaraciejšyja terminy».
Na apublikavanych CTAK fotazdymkach bačna, jak paŭnočnakarejski lidar siadzić na kreśle i naziraje za čałaviekam, jaki spuskajecca z horki ŭ basiejn, a taksama vychodzić na plaž u kaściumie.
Kima supravadžali jaho dačka Kim Čžu E i žonka Li Sol Čžu. Paŭdniovakarejskija ŚMI, praanalizavaŭšy fota z Pchieńjana, paviedamili, što na Čžu E, mahčyma, byŭ hadzińnik Cartier — niahledziačy na toje, što takija pradmiety kłasa «luks» zabaronienyja dla ŭvozu ŭ Paŭnočnuju Kareju ŭ ramkach sankcyj AAN, uviedzienych z-za jaje jadziernaj prahramy.
Pieršapačatkova kurort płanavali adkryć u kastryčniku 2019 hoda, ale budaŭnictva zatrymałasia, a zatym pačałasia pandemija karanavirusu.
Padčas pandemii Paŭnočnaja Kareja była całkam zakrytaja dla turystaŭ i znoŭ adkryła miežy tolki ŭ žniŭni 2023 hoda. U minułym hodzie kraina ŭpieršyniu paśla pandemii dazvoliła ŭjezd rasijskim turystam, u mai hetaha hoda adnaviła ruch ciahnika Rason— Uładzivastok, a 25 červienia na Jarasłaŭski vakzał u Maskvie prybyŭ pasažyrski ciahnik z Pchieńjana — pieršy za piać hadoŭ.
U studzieni 2025 hoda staršynia ŭrada Prymorskaha kraju paviedamiła, što za papiaredni hod u KNDR pabyvała 1,5 tys. rasijskich turystaŭ. Niekatoryja turysty jeździli na hornałyžnyja kurorty, a rasijskija dzieci pabyvali ŭ karejskich letnich łahierach. Pavodle jaje słoŭ, u 2024 hodzie kolkaść avijarejsaŭ pa maršrucie Uładzivastok — Pchieńjan pavialičyłasia da piaci na tydzień. U lutym hetaha hoda KNDR karotkačasova puściła turystaŭ ź Vialikabrytanii, Francyi, Hiermanii i Aŭstralii. Jany pierasiekli miažu z Kitajem. Adnak praź niekalki tydniaŭ turyzm znoŭ niečakana spyniŭsia biez tłumačeńnia pryčyn.
Rovan Bird, suzasnavalnik turfirmy Young Pioneer Tours, raskazaŭ BBC, što spadziavaŭsia, što Paŭnočnaja Kareja adkryjecca dla mižnarodnaha turyzmu bolš šyroka, ale hetaha nie adbyłosia.
«Klučavymi słavutaściami zastanucca Pchieńjan, demilitaryzavanaja zona i inšyja abjekty ŭ brutalisckim ci kamunistyčnym styli, jakija tradycyjna cikaviać mižnarodnych turystaŭ», — ličyć jon.
Adnak dyrektar turkampanii Uri Tours Elijot Devis adznačaje, što Paŭnočnaja Kareja zachoŭvaje «nišavuju pryvabnaść» dla padarožnikaŭ, jakija cikaviacca niezvyčajnymi napramkami.
«Cikava adčuć znajomy dośvied, naprykład, pajezdku na plažny kurort, ale ŭ asiarodździ ŭnikalnaha kulturnaha kantekstu Paŭnočnaj Karei», — ličyć jon.
-
Naŭsieda: Ja budu siarod tych, chto najbolš žorstka patrabuje padaŭžeńnia sankcyj ES suprać Biełarusi
-
Bił i Chiłary Klintan pahadzilisia dać pakazańni Kanhresu ab suviaziach z Epštejnam. Admova pahražała im kryminalnaj spravaj
-
U Jeŭropie raście razryŭ u praciahłaści žyćcia pamiž rehijonami. U čym pryčyny?
Ciapier čytajuć
«Vy ašaleli! Kolki my tracim hrošaj!» Łukašenka daručyŭ źmienšyć aśviatleńnie na vulicach11
«Vy ašaleli! Kolki my tracim hrošaj!» Łukašenka daručyŭ źmienšyć aśviatleńnie na vulicach
«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ99
Kamientary