Pit Chehsiet na pieršaj pres-kanfierencyi amierykanskaha vajennaha kamandavańnia paśla ataki na Iran zajaviŭ pra jaje nievierahodny pośpiech.
«Heta byŭ nievierahodny i ašałamlalny pośpiech. My źniščyli iranskuju jadziernuju prahramu», — skazaŭ Pit Chehsiet na pres-kanfierencyi.
Kiraŭnik Pientahona padkreśliŭ, što vajennyja i cyvilnyja abjekty nie byli metaj udaru. Raniej Iranski Čyrvony Paŭmiesiac paviedamiŭ, što ŭ vyniku amierykanskaj ataki nichto nie zahinuŭ.
Ataka na Iran, pavodle słoŭ Chehsieta, nie była nakiravanaja na źmienu režymu.
Pavodle papiaredniaj infarmacyi, usie try atakavanyja jadziernyja abjekty Irana atrymali «nadzvyčaj surjoznyja paškodžańni i razbureńni», — zajaviŭ kiraŭnik Abjadnanaha kamiteta načalnikaŭ štaboŭ ZŠA hienierał Den Kiejn. U adroźnieńnie ad Trampa, jon nie vykarystaŭ słova «źniščanyja», adznačaje The New York Times.
Apieracyja ZŠA atrymała nazvu «Paŭnočny mołat». Jana ŭklučała vykarystańnie 75 vysokadakładnych kiravanych bojeprypasaŭ, u tym liku pieršaje bajavoje prymianieńnie 14 prabivalnych bombaŭ — bojeprypasaŭ pranikalnaha dziejańnia GBU-57.
«Pakul što zanadta rana kazać, ci zachavaŭ Iran niejki jadzierny patencyjał», — skazaŭ hienierał Den Kiejn u adkaz na pytańni žurnalistaŭ.
U apieracyi ŭdzielničali bolš za 120 samalotaŭ, uklučajučy stratehičnyja bambardziroŭščyki B-2. Jany znachodzilisia ŭ pavietranaj prastory Irana 20 chvilin. Hetaja misija stała samaj praciahłaj apieracyjaj z udziełam B-2 z času teraktaŭ 11 vieraśnia, adznačyŭ hienierał Kiejn.
Iran nie atakavaŭ amierykanskija vajennyja samaloty padčas ich udaraŭ pa jadziernych abjektach, adznačyŭ hienierał Den Kiejn. Sa svajho boku, Pit Chehsiet papiaredziŭ Iran ad adkazu na ataku ZŠA, zajaviŭšy, što nastupnyja dziejańni Vašynhtona buduć jašče bolš žorstkimi.
«Irancam pa roznych kanałach pieradajucca jak publičnyja, tak i pryvatnyja paviedamleńni, što daje im usie mahčymaści sieści za stoł pieramovaŭ. Jany cudoŭna razumiejuć pazicyju Amieryki, jakija mienavita kroki jany mohuć zrabić dla dasiahnieńnia miru, i my spadziajomsia, što jany heta zrobiać», — skazaŭ Chehsiet.
«Naša Niva» — bastyjon biełaruščyny
PADTRYMAĆ
Kamientary