Miłyja ci pačvarnyja? Čamu lalki Labubu stali suśvietnaj siensacyjaj
Hetyja plušavyja cacki ŭžo zachapili rynki Kitaja, Jeŭropy, ZŠA. Ich nosiać takija zorki, jak Ryjana, Dua Lipa, Kim Kardašjan, Lisa z Blackpink i Aryna Sabalenka.
Adny ličać ich miłymi, inšyja — dziŭnymi i navat pačvarnymi, ale amal usie čuli pra puchnataha monstra Labubu (Łabubu), što staŭ suśvietnym fienomienam, paviedamlaje Bi-bi-si.
Tysiačy ludziej ad Šanchaja da Łondana hadzinami stajać u čerhach, kab kupić žadanuju cacku. Apantanaść joju nastolki vialikaja, što dachodzić časam navat da bojkaŭ.
«Adčuvaješ sapraŭdnaje zadavalnieńnie, kali zdabyvaješ jaje ŭ takoj žorstkaj kankurencyi», — kaža zaciataja fanatka lalki Fijona Čžan.
Hłabalnaje zachapleńnie Łabubu za apošni hod patroiła prybytak jaje vytvorcy Pop Mart i, na dumku niekatorych, navat umacavała miakkuju siłu Kitaja, jaki paciarpieŭ ad pandemii i napružanych adnosin z Zachadam.
Dyk što ž heta za cacki i adkul jany ŭzialisia?
Što aznačaje Łabubu
Samo słova ničoha nie aznačaje. Heta imia piersanaža, jakoha prydumaŭ hankonhski mastak Kasin Lun, natchniony skandynaŭskaj mifałohijaj.
Upieršyniu Łabubu źjaviłasia na staronkach ilustravanych knih jak fonavy piersanaž u kazačnym śviecie fiej i trolaŭ.
Ale ŭ 2015 hodzie kitajskaja kampanija Pop Mart zaprasiła Luna da supracoŭnictva. Tak źjaviłasia sieryja fihurak Monsters, kudy i ŭvajšła Łabubu, jakaja paźniej pieratvaryłasia ŭ mižnarodny brend.
Sama fihurka — sumieś trusa i kazačnaha monstra, što pryciahvaje ludziej svaim niezvyčajnym vyhladam: vialikimi vačyma i chitraj zubataj uśmieškaj (z roŭna dzieviaćciu zubami).
Lalka vyklikaje roznyja dumki. Niekatorym ludziam padabajecca jaje niezvyčajny dyzajn, u toj čas jak inšyja ličać jaje niepryjemnaj.
«Niahledziačy na hareźlivy vyhlad, Łabubu maje dobraje serca i zaŭsiody choča dapamahčy, ale časta vypadkova dasiahaje procilehłaha», — tak apisvaje lalku jaje vytvorca na svaim aficyjnym sajcie.
Papularnaja cacka vyjšła ŭ niekalkich sieryjach «Monstraŭ»: Big into Energy, Have a Seat, Exciting Macaron i Fall in Wild.
Brend Labubu maje i inšych piersanažaŭ — naprykład, pravadyr plemieni Zimoma, bojfrend Łabubu Tajkoka i jaje siabroŭka Makoka.
Niedaśviedčanamu voku ciažka adroźnić detali lalek. Heta dastupna tolki znaŭcam, ale słava Łabubu spryjała tamu, što inšyja členy jaje siamji taksama raźlatajucca z palic, jak haračyja piražki.
Chto pradaje Łabubu
Zasnavaŭ kampaniju Pop Mart pradprymalnik Van Nin, jaki staŭ adnym z samych bahatych ludziej u Kitai praz šalonuju papularnaść lalki.
Na praciahu niekalkich hadoŭ, kali Pop Mart supracoŭničaŭ z Kasing Lung, Łabubu pradavali ŭ tak zvanych «ślapych skryniach», što aznačaje, što pakupnik nie viedaje zahadzia, jakuju viersiju jon atrymaje.
Elemient siurpryzu, pastajanna novyja varyjacyi dyzajnu spryjali chutkamu rostu trendu. U śniežni 2020-ha kampanija pačała pradavać svaje akcyi na Hankonhskaj fondavaj biržy. Za apošni hod jany ŭźlacieli bolš čym na 500%.
Pop Mart stała vialikim rytejleram, jaki maje bolš za 2 000 handlovych aŭtamataŭ, abo «roba-kramaŭ», pa ŭsim śviecie.
Ciapier Łabubu možna nabyć u bolš čym 30 krainach — ad ZŠA i Brytanii da Aŭstralii i Sinhapura, choć mnohija ź ich niadaŭna prypynili prodažy praz praźmierny popyt.
Prodažy za miežami macierykovaha Kitaja skłali amal 40% ad ahulnaha dachodu kampanii ŭ 2024 hodzie.
U paćvierdžańnie papularnaści Łabubu kitajskija mytniki zajavili na hetym tydni, što za apošnija dni kanfiskavali bolš za 70 000 padroblenych lalek.
Adnak taki popyt nie vyras za adnu noč. Spatrebiłasia niekalki hadoŭ, kab elfijskija monstry stali miejnstrymam.
Łabubu i suśvietny rynak
Spačatku cikavaść da Łabubu abmiažoŭvałasia vyklučna Kitajem. Pavodle słoŭ Ešli Dudaronak, zasnavalnicy daśledčaj kampanii ChoZan, cacka stała trendam naprykancy 2022 hoda, kali kraina ačuniała ad pandemii.
«Paśla pandemii šmat ludziej u Kitai chacieli emacyjna rassłabicca… a Łabubu byŭ vielmi pryvabnym i adnačasova dziŭnym piersanažam, jaki ŭvasablaŭ antypierfiekcyjanizm».
Jaho papularnaść chutka raspaŭsiudziłasia na susiedniuju Paŭdniova-Uschodniuju Aziju.
Fijona, jakaja žyvie ŭ Kanadzie, raspaviadaje, što ŭpieršyniu pačuła pra Łabubu ad filipinskich siabroŭ u 2023 hodzie. Mienavita tady jana pačała ich nabyvać.
Kaža, što ličyć ich miłymi, ale najbolš pryciahvaje ŭsio bolšaja papularnaść: «Čym papularniejšyja jany stanoviacca, tym bolš ja ich chaču».
«Moj muž nie razumieje, čamu ja, čałaviek, jakomu za 30, tak zacyklena na niečym padobnym, naprykład, na vybary koleru».
Jany taksama dastupnyja pa canie, dadaje Fijona.
Choć ciapier popyt značna padniaŭ ceny, pieršapačatkova cacku možna było nabyć za 25—70 dalaraŭ, što było prymalna dla bolšaści jaje znajomych.
«U našy dni mienavita stolki kaštuje aksesuar dla sumki, i bolšaść ludziej mohuć sabie heta dazvolić».
Asablivuju papularnaść Łabubu nabyli dziakujučy znakamitaściam.
Adna ź jaje najviadomiejšych prychilnic — repierka Lisa z Blackpink, jakaja nie raz dapaŭniała svoj vobraz hetym plušavym piersanažam.
Śpiavačku Ryjanu taksama zaŭvažali z Łabubu — brałkom na sumcy, što spryjała papularyzacyi cacki siarod jaje prychilnikaŭ.
A ŭ mai Łabubu pachvaliŭsia były kapitan zbornaj Anhlii pa futbole Devid Bekchem. 50-hadovy spartoviec apublikavaŭ fota sumki z karyčnievym brałkom Łabubu. Bekchem adznačyŭ, što lalku padaryła jamu 13-hadovaja dačka Charpier.
Što staić za apantanaściu Łabubu
Jak i bolšaść virusnych trendaŭ, pryvabnaść Łabubu ciažka patłumačyć — heta źbieh času, hustu i vypadkovaści, jakoj nadzieleny internet.
Piekin, biezumoŭna, zadavoleny vynikam. Dziaržaŭnaje infarmacyjnaje ahienctva Sińchua zapeŭnivaje, što Łabubu «demanstruje pryvabnaść kitajskaj tvorčaści, jakaści i kultury zrazumiełaj usiamu śvietu movaj», a taksama daje ŭsim mahčymaść ubačyć «kruty Kitaj».
Niekatoryja analityki ździŭlajucca, što kitajskija kampanii — ad vytvorcaŭ elektramabilaŭ i raspracoŭščykaŭ štučnaha intelektu da rytejleraŭ — dasiahnuli takoha pośpiechu, niahledziačy na zakłapočanaść Zachadu adnosna ambicyj Piekina.
«BYD, DeepSeek, usie hetyja kampanii, uklučna z Labubu, abjadnoŭvaje adna vielmi cikavaja rysa — jany nastolki dobryja, što nichto nie źviartaje ŭvahu na toje, što jany z Kitaja. Vy prosta nie možacie ich ihnaravać», — skazaŭ BBC Krys Pierejra z kansałtynhavaj kampanii iMpact.
Tym časam Labubu praciahvajuć nabirać padpisčykaŭ u sacsietkach, i miljony ludziej nazirajuć za tym, jak novyja ŭładalniki raspakoŭvajuć svaju darahuju pakupku.
Na Wildberries u Biełarusi Labubu pradajecca ad 28 da 79 rubloŭ, asnoŭny siehmient — 30-40 rubloŭ, pastaŭka ŭžo zaŭtra.
Aryna Sabalenka pachvaliłasia modnaj cackaj łabubu
Za miesiac popyt na lalek Łabubu vyras na «Kufry» ŭ 6,5 raza
Biełaruski śviatar rastłumačyŭ, ci možna dzieciam hulać z šalona papularnymi monstrykami łabubu
U Brytanii źniali z prodažu modnyja lalki-monstry Łabubu — praź ich zdaralisia bojki pamiž pakupnikami
Kamientary