«Vieryli ŭ Trampa-miratvorca». Udar Izraila pa Iranie zaśpieŭ Kreml źnianacku

«My vieryli ŭ ekstraardynarnyja dziejańni Trampa, jaho žadańnie zachavać areoł miratvorca. Čakali, što jon moža pajści na časovyja damoŭlenaści, jakija b dazvolili Iranu zachavać tvar — nie zabaraniali całkam uzbahačeńnie ŭranu. I što jon pasprabuje praduchilić napad Izraila», — skazaŭ The Moscow Times vysokapastaŭleny čynoŭnik Kramla ŭ adstaŭcy.

Ź im nie zhodny adstaŭny rasijski dypłamat, jaki ličyć dziejańni Maskvy niepavarotlivymi.

«Paśla taho, jak Izrail pa čarzie raźbiŭ svaich vorahaŭ pa susiedstvie, potym abrynuŭsia varožy jamu režym u Damasku i jany zaniali Hałany, było vidavočna, što pryjšła čarha Irana», — skazaŭ jon.

Adnak Kreml vieryŭ, što stanovišča Irana dastatkova stabilnaje. Hetyja acenki hruntavalisia na tym, što Tramp źmianiŭ padychody dypłamatyi i pakazvaŭ hatoŭnaść da kampramisu, a irancy «demanstravali hnutkaść u pieramovach i hatovyja byli abmiarkoŭvać chaj nie prypynieńnie, ale źnižeńnie ŭzroŭniu ŭzbahačeńnia ŭranu», skazaŭ The Moscow Times dziejny supracoŭnik rasijskaha ŭrada, znajomy z abmierkavańniem pytańnia.

U jakaści niehatyŭnych scenaryjaŭ razhladalisia vychad Irana z Damovy ab nieraspaŭsiudžvańni jadziernaj zbroi (DNIAZ) i pahadnieńnia pa jadziernaj prahramie, za jakimi pajšli b dadatkovyja sankcyi. Zrešty, sankcyi ŭ cełym nie tak važnyja, pakolki Iran i tak abkładzieny najmahutnymi abmiežavańniami, prahnazavali ekśpierty blizkaha da rasijskaha MZS analityčnaha centra «Vałdaj».

«Pramaja vajennaja apieracyja Izraila i ŭžo tym bolš znos kiroŭnaha režymu — heta toje, čamu ŭ nas davali vielmi nizkuju vierahodnaść», — skazaŭ The Moscow Times adzin z kiraŭnikoŭ analityčnaha centra «Vałdaj».

«Prahnozy byli niedastatkova dakładnyja»

Adnak situacyja pajšła pavodle samaha rezkaha i niehatyŭnaha jak dla Tehierana, tak i dla Maskvy scenaryju.

«Vidavočna, našyja prahnozy byli niedastatkova dakładnyja i pakul nie apraŭdalisia. Choć situacyju jašče možna stabilizavać», — skazaŭ The Moscow Times vysokapastaŭleny čynoŭnik Kramla ŭ adstaŭcy, znajomy sa źniešniepalityčnym płanavańniem.

Rasija chacieła b umiašacca ŭ situacyju, bo pad udaram blizki partnior i sajuźnik, adnak u Kramla prosta nie zastałosia kazyroŭ, kab zrabić niešta ŭ adzinočku, kažuć dva surazmoŭcy The Moscow Times, blizkija da zamiežnapalityčnaha błoku Kramla i da rasijskaha MZS.

«My zrabili šmat krokaŭ i namahańniaŭ pa dypłamatyčnych kanałach, kab viarnuć Izrail i Iran za stoł pieramoŭ. Adnak usio biespaśpiachova», — kanstatavaŭ rasijski dypłamat.

Publičnaja reakcyja Rasii na kanflikt Izraila ź Iranam była mlavaj, niahledziačy na zaklučanaje paŭhoda tamu pahadnieńnie ab stratehičnym partniorstvie i vajskovuju dapamohu, jakuju Tehieran akazvaŭ Kramlu. MZS vystupiŭ ź dziažurnym zaklikam spynić kanflikt i sieści za stoł pieramoŭ, a Uładzimir Pucin aściarožna prakamientavaŭ izrailskija ŭdary tolki praź niekalki dzion.

«My kaliści prapanoŭvali našym iranskim siabram papracavać u halinie sistemy SPA. Vialikaj cikavaści tady partniory nie prajavili, i ŭsio», — zajaviŭ rasijski prezident na pres-kanfierencyi ŭ Sankt-Pieciarburhu.

Ź jahonych słoŭ, pra pastaŭki zbroi «iranskija siabry» Maskvu «nie prosiać».

Rasijska-iranskaja damova ab stratehičnym partniorstvie nie praduhledžvaje vajskovaj dapamohi, i čakać ad Maskvy «demanstracyi muskułaŭ» u padtrymku Irana naŭrad ci varta, upeŭnieny były dypłamat rasijskaha pastajannaha pradstaŭnictva pry AAN u Ženievie Barys Bondaraŭ.

«Dapamahčy Iranu vajskovym čynam — naprykład, pieradačaj kompleksaŭ C-400 — budzie vielmi składana. Pa-pieršaje, nieviadoma, kolki takich kompleksaŭ u Rasii ŭ najaŭnaści i nakolki mahčymaja ich pieradača biez škody dla ŭłasnaj SPA. A heta pytańnie dla Rasii ŭsio bolš balučaje. Pa-druhoje, niama ŭpeŭnienaści, što ich nie adsočać i nie źniščać», — ličyć Bondaraŭ.

«Nietańjachu nie słuchaje Pucina»

Surjoznych ryčahoŭ paŭpłyvać na Izrail u Kramla nie zastałosia nijakich, ličyć vysokapastaŭleny adstaŭny kramloŭski čynoŭnik. Adnosiny Rasii ź Izrailem prykmietna sapsavalisia za apošnija niekalki hadoŭ — spačatku praz uvarvańnie va Ukrainu, a zatym — paśla teraktu CHAMAS 7 kastryčnika i apieracyi adpłaty ŭ Hazie.

Kreml pasprabavaŭ prapanavać svaje pasrednickija namahańni. Adnak Tramp publična admoviŭ Pucinu, prapanavaŭšy spačatku zaniacca ŭrehulavańniem va Ukrainie.

«Adnosiny, viadoma, nie pierapynienyja. Ale ŭ Izraili ličać našu pazicyju varožaj. Nietańjachu ciapier nie słuchaje našaha prezidenta. Na jaho moža paŭpłyvać tolki Tramp», — upeŭnieny vysokapastaŭleny adstaŭny kramloŭski čynoŭnik.

Kreml usio roŭna budzie sprabavać umiašacca ŭ situacyju ŭ partniorstvie ź inšymi važnymi hulcami — Kitajem, Brazilijaj i Indyjaj, miarkuje dziejny čynoŭnik rasijskaha ŭrada:

«Budziem sprabavać stvaryć niejki front krain, jakija vystupajuć za mirnaje raźviazańnie iranskaj jadziernaj prablemy. Vielmi važna niejkim čynam pasprabavać pierakanać amierykanskich partnioraŭ u zonie [Piersidskaha] zaliva, kab jany taksama pastaralisia paŭpłyvać na Vašynhton u płanie bolšaj strymanaści».

Hetamu padychodu, adnak, budzie zaminać raźviazanaja Pucinym vajna va Ukrainie.

«Nam moža być ciažka lidziravać u hetaj mahčymaj kaalicyi, tamu što ŭ nas na rukach svaja prablema. Luby partnior moža zadać łahičnaje pytańnie: «Nu dobra, vy vystupajecie za mir, suprać vykarystańnia vajskovaj siły. A što ž vy sami nie možacie vyrašyć prablemu dypłamatyčnym šlacham z Ukrainaj?» — prahnazuje dziejny rasijski dypłamat.

Pry ŭsich minusach situacyi, jakaja skłałasia, Maskva moža pasprabavać atrymać ź jaje vyhadu, miarkuje rasijski vajskovy ekśpiert Rusłan Puchaŭ.

«Novaja vajna na Blizkim Uschodzie nie tolki adciahnie ŭvahu ŭsiaho śvietu ad vajny [va Ukrainie], ale i, mabyć, budzie spryjać kančatkovaj pieraaryjentacyi ZŠA na nadańnie vajskovaj dapamohi Izrailu», — piša Puchaŭ.

Ź inšaha boku, kali Maskva nie raspačnie rašučych sprobaŭ abaranić sajuźnika, jaje reputacyja mocnaj dziaržavy jak u rehijonie Blizkaha Uschodu, tak i hłabalna istotna pacierpić, ličyć ekśpiert Centra daśledavańniaŭ krain Piersidskaha zaliva Katarskaha univiersiteta Mikałaj Kažanaŭ.

• 0
• 0
• 0
• 2
• 0
• 0
• 0
• 0