Voś kolki kaštuje Izrailu vajna ź Iranam. Samaje darahoje — abarona svajho nieba

Jak piša The Wall Street Journal, zhodna z papiarednimi acenkami ekanamistaŭ i vajskovych analitykaŭ, vajna ź Iranam abychodzicca Izrailu ŭ sotni miljonaŭ dalaraŭ u dzień.

Asnoŭnaja častka vydatkaŭ — heta vykarystańnie darahoha supraćrakietnaha ŭzbrajeńnia, nieabchodnaha dla pierachopu iranskich rakiet. Tolki na hetuju metu Izrail moža vydatkoŭvać da 200 miljonaŭ dalaraŭ u dzień. Akramia taho, vialikija hrošy iduć na bajavuju avijacyju, bojeprypasy i adnaŭleńnie razburanych budynkaŭ.

Pavodle niekatorych padlikaŭ, tolki adnaŭleńnie paškodžanaj infrastruktury moža kaštavać nie mienš za 400 miljonaŭ dalaraŭ. Hetyja vydatki stvarajuć ekanamičny cisk na Izrail, kab jak maha chutčej zaviaršyć vajennuju apieracyju.

«Asnoŭnym faktaram, jaki sapraŭdy budzie vyznačać košt vajny, źjaŭlajecca praciahłaść. Kali heta tydzień, heta adno, kali dva tydni ci miesiac — heta ŭžo inšaja historyja», — cytuje vydańnie byłuju kiraŭnicu Banka Izraila Karnit Fluh.

Darahoje nieba

Za apošnija dni Iran vypuściŭ pa Izrailu bolš za 400 rakiet. Kožnaja takaja ataka patrabuje vykarystańnia darahoha ŭzbrajeńnia dla pierachopie.

Kožny zapusk sistemy supraćrakietnaj abarony «Praščy Davida», jaki moža vykarystoŭvać minimum dźvie rakiety, kaštuje kala $700 000. Sistema «Chiec-3» (Arrow 3), pryznačanaja dla pierachopu mižkantynientalnych rakiet, kaštuje prykładna $4 miljony za adzin zapusk, a jaje papiarednica «Chiec-2» — kala $3 miljonaŭ.

Pavodle acenak analitykaŭ, tolki pavietrany kampanient vajennych dziejańniaŭ — vykarystańnie źniščalnikaŭ F-35, što lotajuć na adlehłaści da 1600 kiłamietraŭ, abychodzicca ŭ $10 000 za hadzinu palotu na kožny samalot. Da hetaha treba dadać vydatki na zapraŭku, JDAM-bomby, avijacyjnyja rakiety typu MK84 i inšyja bojeprypasy.

Vajna i ekanomika

Pa acenkach analitykaŭ, vajna ź Iranam abychodzicca Izrailu značna daražej, čym apieracyi ŭ Hazie ci suprać Chiezbały, asnoŭnyja vydatki składajuć bojeprypasy. Kali vajna praciahniecca miesiac, jana moža kaštavać kala $12 miljardaŭ.

Chacia dziaržaŭnyja vydatki na abaronu rezka pavialičylisia, ekanamisty pakul nie pradkazvajuć recesii. Adnak značnaja častka izrailskaj ekanomiki spyniłasia. U apošnija dni pracujuć tolki pradpryjemstvy krytyčnaj infrastruktury, restarany i inšy biznes časova začynienyja. Hałoŭny mižnarodny aeraport krainy byŭ začynieny na niekalki dzion, ale ciapier adkryty dla abmiežavanych palotaŭ.

Kampanija S&P apublikavała acenku ryzyk eskałacyi ź Iranam, ale pakul nie źmianiła rejtynh krainy. Izrailski fondavy rynak praciahvaje raści i abychodzić amierykanskija indeksy, što śviedčyć pra vieru inviestaraŭ u chutkaje zaviaršeńnie kanfliktu.

Adnak ekanamičnyja nastupstvy ad iranskich udaraŭ buduć adčuvalnyja jašče doŭha. Inžyniery adznačajuć, što razbureńni ad bujnych balistyčnych rakiet biesprecedentnyja za apošnija dziesiacihodździ vajny ŭ Izraili.

Pavialičyć

Sotni budynkaŭ byli zrujnavanyja abo mocna paškodžany, a ich adnaŭleńnie budzie kaštavać sotni miljonaŭ dalaraŭ. Ramont tolki adnaho ź niadaŭna pabudavanych chmaračosaŭ u centry Tel-Aviva budzie kaštavać dziasiatki miljonaŭ dalaraŭ.

Sacyjalny cisk i niebiaśpieka infrastruktury

Bolš za 5000 čałaviek byli evakujavany z razburanych damoŭ i časova pasieleny ŭ hatelach za košt dziaržavy. Asablivuju zakłapočanaść vyklikaje infrastruktura. Dva ŭdary pa najbujniejšym naftapierapracoŭčym zavodzie na poŭnačy Izraila pryviali da jaho zakryćcia i hibieli troch supracoŭnikaŭ.

Urad časova zabaraniŭ pracu častcy rabotnikaŭ z pradpryjemstvaŭ krytyčnaj važnaści. U sieradu kamandavańnie tyłu Izraila častkova admianiła zabaronu na schody, dazvoliŭšy sustrečy da 30 čałaviek, a pracoŭnyja miescy ŭ bolšaści rehijonaŭ mohuć adkrycca, kali pobač jość schovišča.

Adnak škoły zastajucca začynienymi, i mnohija siemji vymušanyja sumiaščać dohlad dzieciej z pracaj z domu.

Niahledziačy na ŭsie ciažkaści, urad Izraila, pa słovach premjera Nietańjachu, nie spynić apieracyju, pakul nie dasiahnie met: źniščeńnie iranskaj jadziernaj prahramy i rakietnych kompleksaŭ. Adnak ekśpierty ličać, što čas stanie hałoŭnym faktaram.

• 1
• 0
• 0
• 0
• 0
• 3
• 0
• 0