Dynamika abmienaŭ pakazvaje, jak mianiaŭsia raskład siłaŭ na poli boju.
Skončyŭsia čarhovy etap abmienu pałonnymi miž Ukrainaj i Rasijaj. 9, 10 i 14 červienia byli abmienienyja vialikija hrupy pałonnych u katehoryjach «paranienyja i ciažkachvoryja» i «pałonnyja da 25 hadoŭ». Abmieny adbyvajucca na miažy Biełarusi. Takija abmieny stali mahčymyja ŭ miežach damoŭlenaściaŭ, dasiahnutych na pieramovach u Stambule. Ličby bajcoŭ, jakija viarnulisia da rodnych u kankretna hetyja dni, nie nazyvajucca. Ale analiz źviestak za bolš praciahłyja pieryjady dazvalaje ich vyznačyć davoli dakładna ahulnuju tendencyju.
Usiaho z pačatku vajny da siaredziny červienia 2025 hoda pa infarmacyi ŭkrainskaha ahienctva Ukrinfarm va Ukrainu viarnulisia 6 293 čałaviek — 5 757 vyklučna praz abmieny + 536 vyzvalenyja pa-za imi. Adpaviedna, prykładna anałahičnaja kolkaść rasijskich vajennapałonnych viarnułasia ŭ Rasiju.
Danych pra kolkaść vajskoŭcaŭ, jakija zastajucca ŭ pałonie, ni rasijski, ni ŭkrainski bok nie raskryvaje da kanca.
Na sustrečy z žurnalistami mižnarodnych infarmacyjnych ahienctvaŭ 5 červienia 2024 hoda Uładzimir Pucin zajaŭlaŭ, što ŭ rasijskim pałonie znachodzicca 6465 ukrainskich vajskoŭcaŭ. Tady ž jon nazvaŭ ličbu ŭ 1348 rasijskich vajskoŭcaŭ, jakija znachodziacca va ŭkrainskim pałonie.
Ukrainski bok, u pryvatnaści, pradstaŭnik Hałoŭnaha ŭpraŭleńnia raźviedki Andrej Jusaŭ, abvierh hetyja ličby, nazvaŭšy ich prapahandaj. Ukraina nie raskryvaje svaich aficyjnych danych pa ahulnaj kolkaści pałonnych.
Hetaja ličba nie była paćvierdžanaja i mižnarodnymi arhanizacyjami, naprykład, Mižnarodnym Čyrvonym Kryžam, jaki ŭsio jašče nie atrymaŭ paŭnavartasnaha dostupu da ŭsich miescaŭ utrymańnia pałonnych.
Toj fakt, što Ukraina nie nazyvaje danych ab pałonnych, uskosna pakazvaje na dysbałans: ukraincaŭ u rasijskim pałonie ŭsio jašče bolš, čym rasijan va ŭkrainskim. I heta maje tłumačeńnie.
U pieršyja ž dni vajny, karystajučysia efiektam niečakanaści, kliny rasijskich vojskaŭ hłyboka ŭvajšli na terytoryju Ukrainy. U pieršyja ž tydni vajny ŭ akružeńnie trapiŭ harnizon Maryupala — hety horad pratrymaŭsia daŭžej, čym Bresckaja krepaść. Jany pryniali ŭdar na siabie, adciahnuli na siabie bajazdolny kułak rasijskaj armii. Vynikam takoj abarony Maryupala staŭ niepaźbiežny pałon. U pieršyja tydni rasijanie ŭ pałon amal nie traplali, a ŭkraincaŭ zdavałasia šmat: pamiežniki, bajcy Unutranych vojskaŭ, jakija ścierahli Čarnobylskuju AES, siłaviki-tyłaviki ŭ zachoplenych pieršym udaram haradach.
Ukraincy mocna papoŭnili abmienny fond padčas razhromu rasijskich kałonaŭ pad Kijevam i ŭ Mikałajeŭskaj vobłaści ŭ sakaviku-krasaviku 2022 hoda, a paśla — padčas Iziumskaha kontrudaru ŭ žniŭni 2022-ha i Kurskaj apieracyi ŭ 2024-m.
Pałonnych biaruć pry nastupie, a z vosieni 2024 hoda ŭkrainskaja armija tolki abaraniałasia i adstupała. Kijeŭ vybraŭ taktyku hłuchoj abarony, tamu što Ukraina maje mienš žyvoj siły i vymušanaja jaje bierahčy. Zdavałasia b, pry takoj taktycy kolkaść pałonnych ukraincaŭ pavinna raści chutčej, čym kolkaść pałonnych rasijan. Ale ličby abmienaŭ pakazvajuć, što heta nie tak. Roźnica, zdajecca, nie vyrasła, a moža być navat źmienšyłasia.
Hladzicie: z 5 červienia 2024 hoda, dnia toj zajavy Pucina, Rasija sumarna viarnuła 1769 pałonnych. Heta ŭžo bolš, čym ličba, ahučanaja kiraŭnikom Rasii.
Tak, siarod abmienienych nie tolki pałonnyja vajskoŭcy, jość i cyvilnyja kałabaranty, jakich vyrašyli addać Rasii.
Ale va Ukrainie ŭsio jašče zastajucca šmatlikija pałonnyja, rychtujucca novyja abmieny.
Hetyja ličby paćviardžajuć, što nastup rasijan idzie nie tak hładka, jak im chaciełasia b, i što matyvacyi rasijskim vajskoŭcam brakuje.
«Heta novy typ vajny. 15 km ad linii frontu — ciapier zona sucelnaj śmierci», — adznačyŭ niadaŭna hienierał Valer Załužny. Jak bačym, mnohija rasijanie nie chočuć pamirać, a addajuć pieravahu pałonu.
Užo sam fakt taho, što tysiačy rasijskich vajskoŭcaŭ trapili ŭ pałon, śviedčać pra nievysokuju bajazdolnaść rasijskaj armii. Dla paraŭnańnia: za čas vojnaŭ u Iraku i Afhanistanie, kali amierykancy praciahły čas akupavali varoža nastrojenyja terytoryi, u pałon trapiła ŭsiaho 7 amierykanskich vajskoŭcaŭ.
Rasijski pieramoŭnik Uładzimir Miadzinski, pahražajučy Ukrainie, niadaŭna ŭ Stambule pravioŭ paralel z Paŭnočnaj vajnoj, jakaja doŭžyłasia 21 hod.
Adnak cana, jakuju płacić Rasija, moža być zavialikaja navat dla maskoŭskaha kiraŭnictva.
Kamientary