Pucin namiaknuŭ pra pastaŭki zbroi ŭ Biełaruś, kab «nanosić udary pa adčuvalnych abjektach inšych krain»
Prezident Rasii Uładzimir Pucin upieršyniu z 2021 hoda pravodzić na palach Pieciarburhskaha ekanamičnaha forumu sustreču z pradstaŭnikami zamiežnych infarmahienctvaŭ. Naturalna, šmat času pryśviečana pytańniam vajny, raźviazanaj Rasijaj va Ukrainie.
Siarod inšaha jon zajaviŭ, što ŭdary pa Rasii pry ŭdziele krain Zachadu aznačajuć ich pramuju vajnu suprać Rasii. Jon vidavočna mieŭ na ŭvazie niadaŭni aficyjny dazvoł mnohich krain Zachadu, uklučajučy ZŠA, bić zachodniaj zbrojaj pa vajskovych abjektach na terytoryi Rasii, kali heta nieabchodna dla abarony ŭkrainskaj terytoryi.
Adnačasova z hetym Pucin pahražaje zachadami ŭ adkaz:
«Kali chtości ličyć mahčymym pastaŭku Ukrainie zbroi, jakaja dazvalaje nanosić udary pa Rasii, to čamu Rasija nie moža pastaŭlać padobnuju zbroju ŭ rehijony, adkul buduć nanosicca ŭdary pa adčuvalnych abjektach inšych krain?»
Jakija heta rehijony, Pucin nie nazvaŭ, ale možna mierkavać, što jon mieŭ na ŭvazie Biełaruś jak adzinuju krainu ź jahonych blizkich sajuźnikaŭ, jakaja niepasredna miažuje z NATA i z terytoryi jakoj sapraŭdy zručna pahražać Polščy i krainam Bałtyi. Raniej užo było pryniata rašeńnie ab raźmiaščeńni na terytoryi Biełarusi taktyčnaj jadziernaj zbroi, i jana, jak miarkujecca, užo ŭ Biełaruś dastaŭlenaja.
Pry hetym Pucin, jak i raniej, nasupierak vidavočnym faktam admaŭlaje toje, što mienavita Rasija raźviazała šyrokamaštabnuju vajnu ŭ rehijonie, pierakładajučy vinu na ZŠA i inšyja zachodnija krainy.
«Usie ličać, što Rasija pačała vajnu va Ukrainie. Ale nichto na Zachadzie i Jeŭropie nie choča ŭspaminać, z čaho pačałasia hetaja trahiedyja. Jana pačałasia ź dziaržaŭnaha pieravarotu… Voś pačatak vajny!» — skazaŭ Pucin.
Pucin pačaŭ nasić na publičnych mierapryjemstvach broniekamizelku
Rasija namahajecca sarvać Samit miru, a Kitaj vystupaje instrumientam u rukach Pucina — Zialenski
Jak Ukraina pierakonvała ZŠA dazvolić bić amierykanskaj zbrojaj pa celach u Rasii
ZŠA hatovyja abmiarkoŭvać z Ukrainaj pašyreńnie hieahrafii ŭdaraŭ pa Rasii
Kamientary